РЕЖА – ЧЕГАРА ЭМАС

Бизнинг Й.Ўрозбоев номли муқобил  машина-трактор паркимиз ҳудудимиздаги 32 та фермер хўжаликларига хизмат кўрсатади. Мазкур фермер хўжаликларида 1034 гектар пахта майдони бор, жами 2155 тонна ҳосил етиштириш юзасидан контрактация шартномаси тузишган.

Ҳозир пахта далаларимизда пудратчилар бутун куч-имкониятларини ҳосил  йиғим-теримига қаратишмоқда. Шунинг учун ҳам кунига йиллик режанинг 4-5 фоизи миқдоридаги ҳосил давлатимиз хирмонига топширилмоқда.

Мавсум олдидан дала ишларида қатнашадиган техникалар пухта созланиб, ишга шай қилиб қўйилганлиги терилган пахталарни ўз вақтида қабул пунктларига ташишда жуда қўл келмоқда.

Теримчиларнинг унумли ишлашлари учун қулай имкониятлар яратилиб, тушлик овқат, чой дала бошида ташкил қилингани, терилган пахталарнинг пешма-пеш ўлчаб олинаётганлиги ва терилган пахта ҳақи ҳар беш кунда ҳисоб-китоб қилиб борилаётганлиги иш суръатининг юқори бўлишини таъминламоқда.

Пахта йиғим-терими мавсумини уюшқоқлик билан ўтказиш, етиштирилган ҳосилни кузакнинг  ғанимат илиқ кунларида йиғиб-териб олиш учун ҳудудимиздаги ишга яроқли, ишсиз аҳоли ҳам жалб қилинди. Натижада сентябрь ойининг биринчи ўн кунлигидаёқ "Ибодуллаева Гулзебо”, "Равшанбек, Жавлонбек, Сардорбек”, "Матмуротов Эргаш”, "Умид-Жонибек,” "Камолиддин Бекниёз”, "Холимбетов Фурқатжон”, "Оллаберганов Иззатжон”, "Оллаберганов Умиджон”, "Улуғбек Ўрозбоев” номли фермер хўжаликларимиз йиллик шартномавий режаларини ортиғи билан уддаладилар. Бугунги кунгача мавжуд 32 та фермер хўжаликларимизнинг 30 тасида режа бажарилди ва режадан ташқари пахта топшириш давом этмоқда. Чунки режа – чегара эмас. Фермерларимиз, тажрибали пудратчиларимиз фидойилик, омилкорлик билан меҳнат қилишиб, жорий йилда кўзланганидан  анча юқори ҳосил етиштиришга эришдилар. Йиллик топшириқлар адо этилса-да, ҳали далаларимизда ҳосил мўл. Пахтакорларимиз кузак ташвишларини елкалашга кўмакдош бўлиб келган ҳашарчиларимиз билан биргаликда етиштирилган ҳосилни далада исроф қилиб қолдирмай, йиғиб-териб давлатимизга топширадилар.

Улуғбек ЎРОЗБОЕВ,  Йўлдош Ўрозбоев номли ММТП раиси.

(Фото - http://uz24.uz)