Нукусда чегарачилар ўртасида "Қувноқлар ва зукколар" кўрик-танлови ўтказилди

Бугун замонавий ҳарбий хизматчининг ҳушёр, зукко ва маънавий етук бўлиши давлат тинчлиги ва хавфсизлигини, чегаралар дахлсизлигини асрашда муҳим омил саналади. Шу боис ҳам мамлакатимизда чегарачиларнинг нафақат жанговар ва жисмоний тайёргарлигини, балки ижодий ва интеллектуал салоҳиятни оширишга қаратилган муҳим тадбирлар изчиллик билан амалга ошириб келинмоқда. Иқтидорли ёш ҳарбий хизматчиларнинг салоҳиятини рўёбга чиқариш, санъатга қизиқишини ошириш ва уларнинг маданий ҳордиқ олишини таъминлаш мақсадида қатор тадбирлар ўтказилаётгани фикримизнинг тасдиғидир.

10 октябрь куни Нукус шаҳрида Ўзбекистон Республикаси Ёшлар иттифоқи Марказий Кенгаши ҳамда Қуролли Кучлар таркибидаги вазирлик ва идоралар билан ҳамкорликдаги махсус дастур доирасида "Қувноқлар ва зукколар" кўрик-танлови ўтказилди.

Қорақалпоқ Давлат қўғирчоқ театри саҳнасида мамлакатимизнинг Шимоли-ғарбий сарҳадларини ҳимоя қилувчи жасур чегарачилар ўртасида ўтказилган кўрик-танловда чегарачиларнинг зукколиги билан бир қаторда, уларнинг ҳазил-мутойибага мойиллиги ва ҳозиржавоблиги ҳам яққол намоён бўлди.

Мусобақанинг адолатли ва шаффоф ўтишини таъминлаш мақсадида, ҳакамлар ҳайъати таркибига "Қувноқлар ва зукколар" ассоциациясининг малакали вакиллари, шунингдек, Давлат хавфсизлик хизмати Чегара Қўшинлари Қўмондонлигининг масъул вакиллари жалб этилиб, чиқишларни холисона баҳолаб бордилар.

Мазкур кўрик-танловда учта жамоа: "Қувноқ чегарачилар", "Хоразмликлар" ва "Назоратчи аскарлар" жамоалари иштирок этиб, муросасиз ва қизиқарли беллашув олиб бордилар. Жамоалар "Саломлашиш", "Савол-жавоб" ва "Мусиқий чиқиш" каби шартларда ўз маҳоратларини намойиш этдилар.

Ҳакамлар ҳайъати томонидан иштирокчиларнинг чиқишларини баҳолашда мутойибаларнинг долзарблиги ва ёрқинлиги, мусобақа мавзусига мослиги, томошабоплиги ва иштирокчиларнинг юқори ижро маҳорати, шунингдек, саҳна маданиятига риоя этилиши ва тартиб-қоидаларга амал қилиш каби мезонларга қатъий амал қилинди.

Ҳазил-мутойибага бой бўлган мусобақада иштирокчи жамоалар ғолиблик учун астойдил ҳаракат қилишди. Бу эзгу интилиш иштирокчиларнинг ҳар бир чиқишининг ранг-баранглигини ва мазмундорлигини таъминлади, натижада тадбир томошабинларга кўтаринки руҳ ва унутилмас таассуротлар бағишлади.

Қизғин баҳслардан сўнг, ҳакамлар ҳайъатининг шаффоф ва оқилона баҳолаш натижаларига кўра, энг муносиблар сараланди.

Тадбир якунида ҳарбий қисм командири томонидан барча иштирокчиларга фахрий дипломлар ва қимматбаҳо совғалар топширилди. Танловнинг энг юқори поғонасини – фахрли биринчи ўринни эгаллаган "Назоратчи аскарлар" жамоаси эса "Қувноқлар ва зукколар" кўрик-танловининг кўчма кубоги билан тақдирланди. Энг муҳими, "Назоратчи аскарлар" жамоаси ўз маҳорати ва зукколиги билан танловнинг Давлат хавфсизлик хизмати Чегара Қўшинлари миқёсида бўлиб ўтадиган республика босқичига йўлланмани қўлга киритишга муваффақ бўлдилар.

Бу каби тадбирлар ҳарбий хизматчиларнинг хизматдан бўш вақтларини мазмунли ташкил этиш, уларнинг руҳий тетиклигини ошириш ва аскарлар ўртасидаги жамоавий руҳни ҳамда ўзаро ҳамжиҳатликни мустаҳкамлашда муҳим ўрин тутади. Бундай ижодий мусобақалар орқали ҳарбий кадрларнинг креатив фикрлаш қобилияти янада ривожланиб, дунёқараши янада кенгаяди. Фурсатдан фойдаланиб, "Назоратчи аскарлар" жамоасига кўрик-танловнинг республика босқичида ҳам муваффақиятлар тилаймиз.