Nukusda chegarachilar oʻrtasida "Quvnoqlar va zukkolar" koʻrik-tanlovi oʻtkazildi

Bugun zamonaviy harbiy xizmatchining hushyor, zukko va maʼnaviy yetuk boʻlishi davlat tinchligi va xavfsizligini, chegaralar daxlsizligini asrashda muhim omil sanaladi. Shu bois ham mamlakatimizda chegarachilarning nafaqat jangovar va jismoniy tayyorgarligini, balki ijodiy va intellektual salohiyatni oshirishga qaratilgan muhim tadbirlar izchillik bilan amalga oshirib kelinmoqda. Iqtidorli yosh harbiy xizmatchilarning salohiyatini roʻyobga chiqarish, sanʼatga qiziqishini oshirish va ularning madaniy hordiq olishini taʼminlash maqsadida qator tadbirlar oʻtkazilayotgani fikrimizning tasdigʻidir.

10-oktyabr kuni Nukus shahrida Oʻzbekiston Respublikasi Yoshlar ittifoqi Markaziy Kengashi hamda Qurolli Kuchlar tarkibidagi vazirlik va idoralar bilan hamkorlikdagi maxsus dastur doirasida "Quvnoqlar va zukkolar" koʻrik-tanlovi oʻtkazildi.

Qoraqalpoq Davlat qoʻgʻirchoq teatri sahnasida mamlakatimizning Shimoli-gʻarbiy sarhadlarini himoya qiluvchi jasur chegarachilar oʻrtasida oʻtkazilgan koʻrik-tanlovda chegarachilarning zukkoligi bilan bir qatorda, ularning hazil-mutoyibaga moyilligi va hozirjavobligi ham yaqqol namoyon boʻldi.

Musobaqaning adolatli va shaffof oʻtishini taʼminlash maqsadida, hakamlar hayʼati tarkibiga "Quvnoqlar va zukkolar" assotsiatsiyasining malakali vakillari, shuningdek, Davlat xavfsizlik xizmati Chegara Qoʻshinlari Qoʻmondonligining masʼul vakillari jalb etilib, chiqishlarni xolisona baholab bordilar.

Mazkur koʻrik-tanlovda uchta jamoa: "Quvnoq chegarachilar", "Xorazmliklar" va "Nazoratchi askarlar" jamoalari ishtirok etib, murosasiz va qiziqarli bellashuv olib bordilar. Jamoalar "Salomlashish", "Savol-javob" va "Musiqiy chiqish" kabi shartlarda oʻz mahoratlarini namoyish etdilar.

Hakamlar hayʼati tomonidan ishtirokchilarning chiqishlarini baholashda mutoyibalarning dolzarbligi va yorqinligi, musobaqa mavzusiga mosligi, tomoshabopligi va ishtirokchilarning yuqori ijro mahorati, shuningdek, sahna madaniyatiga rioya etilishi va tartib-qoidalarga amal qilish kabi mezonlarga qatʼiy amal qilindi.

Hazil-mutoyibaga boy boʻlgan musobaqada ishtirokchi jamoalar gʻoliblik uchun astoydil harakat qilishdi. Bu ezgu intilish ishtirokchilarning har bir chiqishining rang-barangligini va mazmundorligini taʼminladi, natijada tadbir tomoshabinlarga koʻtarinki ruh va unutilmas taassurotlar bagʻishladi.

Qizgʻin bahslardan soʻng, hakamlar hayʼatining shaffof va oqilona baholash natijalariga koʻra, eng munosiblar saralandi.

Tadbir yakunida harbiy qism komandiri tomonidan barcha ishtirokchilarga faxriy diplomlar va qimmatbaho sovgʻalar topshirildi. Tanlovning eng yuqori pogʻonasini – faxrli birinchi oʻrinni egallagan "Nazoratchi askarlar" jamoasi esa "Quvnoqlar va zukkolar" koʻrik-tanlovining koʻchma kubogi bilan taqdirlandi. Eng muhimi, "Nazoratchi askarlar" jamoasi oʻz mahorati va zukkoligi bilan tanlovning Davlat xavfsizlik xizmati Chegara Qoʻshinlari miqyosida boʻlib oʻtadigan respublika bosqichiga yoʻllanmani qoʻlga kiritishga muvaffaq boʻldilar.

Bu kabi tadbirlar harbiy xizmatchilarning xizmatdan boʻsh vaqtlarini mazmunli tashkil etish, ularning ruhiy tetikligini oshirish va askarlar oʻrtasidagi jamoaviy ruhni hamda oʻzaro hamjihatlikni mustahkamlashda muhim oʻrin tutadi. Bunday ijodiy musobaqalar orqali harbiy kadrlarning kreativ fikrlash qobiliyati yanada rivojlanib, dunyoqarashi yanada kengayadi. Fursatdan foydalanib, "Nazoratchi askarlar" jamoasiga koʻrik-tanlovning respublika bosqichida ham muvaffaqiyatlar tilaymiz.