ДХХ Чегара қўшинларига қарашли ҳарбий қисмда “Спорт ва ҳарбий интизом — келажак авлод пойдевори” мавзусида учрашув ўтказилди

Мамлакатимизда конституциявий тузум, ҳуқуқ-тартибот ва жамият хавфсизлигини сақлаш ҳамда фуқароларнинг ҳуқуқ ва эркинликларини, қонуний манфаатларини ҳимоя қилишга қодир бўлган юксак маданиятли, ижтимоий фаол, жисмонан ва ақлан етук, мустақиллик ғояларига садоқатли, ватанпарвар ёшларни тарбиялаш борасида кенг кўламли ишлар амалга оширилмоқда.

Албатта, кучли ва иродали, мард ва жасур, элпарвар ёшларни тарбиялаб вояга етказишда спортнинг аҳамияти катта. Шу боис, ўсиб келаётган ёш авлоднинг жисмоний етуклигини таъминлаш, уларни ўзлари қизиққан спорт турларига кенг жалб қилиш мақсадида мамлакат ва халқаро миқёсдаги спорт мусобақаларининг ғолиб ва совриндорлари билан умумтаълим мактаблари ўқувчиларининг учрашувлари ташкил этилиб, спортсевар ёшларни қўллаб-қувватлашга алоҳида эътибор қаратилмоқда.

Жорий йилнинг 24 декабрь санасида Давлат хавфсизлик хизмати Чегара қўшинларига қарашли ҳарбий қисмда “Спорт ва ҳарбий интизом — келажак авлод пойдевори” мавзусида ўтказилган тадбир ҳам ана шу мақсадларга қаратилгани билан аҳамиятлидир. Учрашувда Амударё тумани Мактабгача ва мактаб таълими бўлими тасарруфидаги мактабларда ўқиш билан бирга мамлакатимиз ва халқаро миқёсдаги турли спорт мусобақаларида қатнашиб, ғолибликка эришган ёш спортчилар иштирок этди. Мавзкур тадбир ўқувчи-ёшларни олимпия спорт турлари билан шуғулланишга, ҳарбий спорт ўйинларида фаол иштирок этиш орқали ўз куч ва иродасини намоён қилишга қаратилган даъваткор руҳда ўтгани билан муҳим тарбиявий аҳамият касб этди.

Учрашувда давлат хавфсизлик хизмати Чегара қўшинлари ҳарбий хизматчилари, таниқли спортчи-ёшлар, тумандаги 36-сонли мактаб ўқувчилари иштирок этди. Тадбир аввалида Давлат хавфсизлик хизмати Чегара қўшинлари ҳарбий хизматчиси Миржаҳон Мажидов сўзга чиқиб, мамлакатимизда ёшлар таълим-тарбияси, уларнинг қобилият ва алоҳида иқтидорларини юзага чиқариш, ҳарбий-ватанпарварлик, истиқлол ғояларига садоқат руҳида тарбиялашга қаратилган эътибор ва рағбат хусусида тўхталиб ўтди. У ўз нутқида спорт тадбирлари ҳамда ҳарбий интизомнинг ҳар томонлама баркамол шахсни вояга етказишдаги аҳамияти хусусида батафсил сўз юритиб, тадбир иштирокчиларини мунтазам равишда бирор бир спорт тури билан шуғулланишга даъват этди.

Учрашув тадбири давомида Давлат хавфсизлик хизмати Чегара қўшинлари ҳарбий хизматчиси, турли даражадаги ҳарбий спорт мусобақалари совриндори Умарбек Норбоев сўзга чиқиб, ўз ҳаётида эришаётган ютуқларда спортнинг ўрни муҳимлигини алоҳида қайд қилди. У ўқувчи-ёшларга спорт нафақат инсонни жисмонан, балки ақлан шакллантириши, кучли ва иродали бўлишга одатлантириши ҳақида қимматли фикр ва маслаҳатлар берди.

Шунингдек, учрашувда мамлакатимиз ҳамда халқаро миқёсдаги спорт мусобақаларида муваффақиятли иштирок этиб, Ўзбекистон байроғини баланд кўтаришга муваффақ бўлган совриндор спортчилар Дурдона Ибодуллаева, Дилёра Бектемирова, Жаҳоншер Абдурасуловлар ҳам тенгдошлари олдидасўзга чиқдилар. Улар спортчи бўлиш аввало инсон қалбида она Ватанга меҳр-муҳаббат туйғусини мустаҳкамлашини, масъулият ҳисси билан яшашга ўргатишини, бундан ҳам муҳими, фанларни ўзлаштиришдаги аҳамиятини алоҳида таъкидлаб, спорт ва ҳарбий интизом куч-қудрат манбаи эканлигини ҳаётий мисоллар билан изоҳладилар.

Ўзаро самимий мулоқот, қизиқарли савол-жавоблар, совриндор спортчи-ёшларнинг мароқли суҳбатлари асосида ўтган “Спорт ва ҳарбий интизом — келажак авлод пойдевори” мавзусидаги учрашув иштирокчиларда ёрқин таассуротлар қолдирди.