DXX Chegara qoʻshinlariga qarashli harbiy qismda “Sport va harbiy intizom — kelajak avlod poydevori” mavzusida uchrashuv oʻtkazildi

Mamlakatimizda konstitutsiyaviy tuzum, huquq-tartibot va jamiyat xavfsizligini saqlash hamda fuqarolarning huquq va erkinliklarini, qonuniy manfaatlarini himoya qilishga qodir boʻlgan yuksak madaniyatli, ijtimoiy faol, jismonan va aqlan yetuk, mustaqillik gʻoyalariga sadoqatli, vatanparvar yoshlarni tarbiyalash borasida keng koʻlamli ishlar amalga oshirilmoqda.

Albatta, kuchli va irodali, mard va jasur, elparvar yoshlarni tarbiyalab voyaga yetkazishda sportning ahamiyati katta. Shu bois, oʻsib kelayotgan yosh avlodning jismoniy yetukligini taʼminlash, ularni oʻzlari qiziqqan sport turlariga keng jalb qilish maqsadida mamlakat va xalqaro miqyosdagi sport musobaqalarining gʻolib va sovrindorlari bilan umumtaʼlim maktablari oʻquvchilarining uchrashuvlari tashkil etilib, sportsevar yoshlarni qoʻllab-quvvatlashga alohida eʼtibor qaratilmoqda.

Joriy yilning 24-dekabr sanasida Davlat xavfsizlik xizmati Chegara qoʻshinlariga qarashli harbiy qismda “Sport va harbiy intizom — kelajak avlod poydevori” mavzusida oʻtkazilgan tadbir ham ana shu maqsadlarga qaratilgani bilan ahamiyatlidir. Uchrashuvda Amudaryo tumani Maktabgacha va maktab taʼlimi boʻlimi tasarrufidagi maktablarda oʻqish bilan birga mamlakatimiz va xalqaro miqyosdagi turli sport musobaqalarida qatnashib, gʻoliblikka erishgan yosh sportchilar ishtirok etdi. Mavzkur tadbir oʻquvchi-yoshlarni olimpiya sport turlari bilan shugʻullanishga, harbiy sport oʻyinlarida faol ishtirok etish orqali oʻz kuch va irodasini namoyon qilishga qaratilgan daʼvatkor ruhda oʻtgani bilan muhim tarbiyaviy ahamiyat kasb etdi.

Uchrashuvda davlat xavfsizlik xizmati Chegara qoʻshinlari harbiy xizmatchilari, taniqli sportchi-yoshlar, tumandagi 36-sonli maktab oʻquvchilari ishtirok etdi. Tadbir avvalida Davlat xavfsizlik xizmati Chegara qoʻshinlari harbiy xizmatchisi Mirjahon Majidov soʻzga chiqib, mamlakatimizda yoshlar taʼlim-tarbiyasi, ularning qobiliyat va alohida iqtidorlarini yuzaga chiqarish, harbiy-vatanparvarlik, istiqlol gʻoyalariga sadoqat ruhida tarbiyalashga qaratilgan eʼtibor va ragʻbat xususida toʻxtalib oʻtdi. U oʻz nutqida sport tadbirlari hamda harbiy intizomning har tomonlama barkamol shaxsni voyaga yetkazishdagi ahamiyati xususida batafsil soʻz yuritib, tadbir ishtirokchilarini muntazam ravishda biror bir sport turi bilan shugʻullanishga daʼvat etdi.

Uchrashuv tadbiri davomida Davlat xavfsizlik xizmati Chegara qoʻshinlari harbiy xizmatchisi, turli darajadagi harbiy sport musobaqalari sovrindori Umarbek Norboyev soʻzga chiqib, oʻz hayotida erishayotgan yutuqlarda sportning oʻrni muhimligini alohida qayd qildi. U oʻquvchi-yoshlarga sport nafaqat insonni jismonan, balki aqlan shakllantirishi, kuchli va irodali boʻlishga odatlantirishi haqida qimmatli fikr va maslahatlar berdi.

Shuningdek, uchrashuvda mamlakatimiz hamda xalqaro miqyosdagi sport musobaqalarida muvaffaqiyatli ishtirok etib, Oʻzbekiston bayrogʻini baland koʻtarishga muvaffaq boʻlgan sovrindor sportchilar Durdona Ibodullayeva, Dilyora Bektemirova, Jahonsher Abdurasulovlar ham tengdoshlari oldidasoʻzga chiqdilar. Ular sportchi boʻlish avvalo inson qalbida ona Vatanga mehr-muhabbat tuygʻusini mustahkamlashini, masʼuliyat hissi bilan yashashga oʻrgatishini, bundan ham muhimi, fanlarni oʻzlashtirishdagi ahamiyatini alohida taʼkidlab, sport va harbiy intizom kuch-qudrat manbai ekanligini hayotiy misollar bilan izohladilar.

Oʻzaro samimiy muloqot, qiziqarli savol-javoblar, sovrindor sportchi-yoshlarning maroqli suhbatlari asosida oʻtgan “Sport va harbiy intizom — kelajak avlod poydevori” mavzusidagi uchrashuv ishtirokchilarda yorqin taassurotlar qoldirdi.