ОРОМГОҲЛАР МАВСУМГА ШАЙ

Ҳар йилгидек бу йил ҳам туманимиз мактабларида таълим олаётган ўқувчи-ёшларнинг ёзги дам олишларини ташкил этиш борасида халқ таълими муассасалари фаолиятини методик таъминлаш ва ташкил этиш бўлими томонидан бир қанча ишлар амалга оширилмоқда.

Жумладан туман ҳокимининг 2016 йил 19 апрелдаги 198-сонли қарори асосида махсус буйруқ тайёрланиб, унга мувофиқ, Манғит қишлоқ хўжалик касб-ҳунар коллежида "Қалдирғоч” деб номланган оромгоҳ ташкил этилиб, бу оромгоҳда таътил даврида 4 та навбатда жами 400 нафар ўқувчининг дам олиши режалаштирилди.

Шунингдек, Бобур номли овул ҳудудида жойлашган Амударё мелиорация ва сув хўжалиги касб-ҳунар коллежида ташкил этилган "Оқ кабутар” оромгоҳида ҳар бир навбатда 85 нафардан, 4 навбатда жами 340 нафар ўқувчининг, "Дўрман” овулидаги Дўрман қишлоқ хўжалик касб-ҳунар коллежида ташкил этилган "Лочин” оромгоҳида ҳар бир навбатда 100 нафардан, жами 400 нафар ўқувчининг дам олиши режалаштирилган. Мавсум давомида ушбу 3 та оромгоҳларда 17 нафар етим болаларнинг дам олишларини таъминлашга алоҳида эътибор берилаяпти.

Туманимизда мактаб ўқувчиларининг ёзги дам олишларини ташкил этишда кундузги оромгоҳлардан фойдаланишга ҳам эътибор қаратилаяпти. Бу йил ҳам тумандаги барча умумтаълим мактаблари қошида кундузги 12 кунлик оромгоҳ фаолият кўрсатади. Бундай оромгоҳларда ёзги таътил давомида 285 та гуруҳда жами 8580 нафар ўқувчининг дам олиши режалаштирилмоқда.

Барча оромгоҳларда таълим-тарбия ишларини яхши ўтказиш учун тарбиячилар, оромгоҳ бошлиғи ва етакчиларнинг иш режалари ёзги дам олиш оромгоҳлари йўриқномалари асосида тузилди.

Азимжон БЕКБЕРГЕНОВ,

туман ХТМФМТТЭБ ўқувчиларни маънавий-ахлоқий тарбиялаш шўъбаси мутахассиси.