OROMGOHLAR MAVSUMGA ShAY

Har yilgidek bu yil ham tumanimiz maktablarida taʼlim olayotgan oʻquvchi-yoshlarning yozgi dam olishlarini tashkil etish borasida xalq taʼlimi muassasalari faoliyatini metodik taʼminlash va tashkil etish boʻlimi tomonidan bir qancha ishlar amalga oshirilmoqda.

Jumladan tuman hokimining 2016-yil 19-apreldagi 198-sonli qarori asosida maxsus buyruq tayyorlanib, unga muvofiq, Mangʻit qishloq xoʻjalik kasb-hunar kollejida "Qaldirgʻoch” deb nomlangan oromgoh tashkil etilib, bu oromgohda taʼtil davrida 4 ta navbatda jami 400 nafar oʻquvchining dam olishi rejalashtirildi.

Shuningdek, Bobur nomli ovul hududida joylashgan Amudaryo melioratsiya va suv xoʻjaligi kasb-hunar kollejida tashkil etilgan "Oq kabutar” oromgohida har bir navbatda 85 nafardan, 4 navbatda jami 340 nafar oʻquvchining, "Doʻrman” ovulidagi Doʻrman qishloq xoʻjalik kasb-hunar kollejida tashkil etilgan "Lochin” oromgohida har bir navbatda 100 nafardan, jami 400 nafar oʻquvchining dam olishi rejalashtirilgan. Mavsum davomida ushbu 3 ta oromgohlarda 17 nafar yetim bolalarning dam olishlarini taʼminlashga alohida eʼtibor berilayapti.

Tumanimizda maktab oʻquvchilarining yozgi dam olishlarini tashkil etishda kunduzgi oromgohlardan foydalanishga ham eʼtibor qaratilayapti. Bu yil ham tumandagi barcha umumtaʼlim maktablari qoshida kunduzgi 12 kunlik oromgoh faoliyat koʻrsatadi. Bunday oromgohlarda yozgi taʼtil davomida 285 ta guruhda jami 8580 nafar oʻquvchining dam olishi rejalashtirilmoqda.

Barcha oromgohlarda taʼlim-tarbiya ishlarini yaxshi oʻtkazish uchun tarbiyachilar, oromgoh boshligʻi va yetakchilarning ish rejalari yozgi dam olish oromgohlari yoʻriqnomalari asosida tuzildi.

Azimjon BEKBERGENOV,

tuman XTMFMTTEB oʻquvchilarni maʼnaviy-axloqiy tarbiyalash shoʻʼbasi mutaxassisi.