“Қалдирғоч” болалар ёзги дам олиш оромгоҳида янги мавсумга тантанали старт берилди

Амударё туманида болаларнинг ёзги таътилини мазмунли ташкил этиш, уларнинг соғлом дам олиши ва бўш вақтини самарали ўтказиш мақсадида “Қалдирғоч” болалар ёзги дам олиш оромгоҳининг 2026 йилги мавсуми тантанали равишда очилди. “Дўрман” овули ҳудудидаги 84-сонли мактаб биносида ташкил этилган оромгоҳнинг очилиш маросими болажонлар, ота-оналар ҳамда таълим соҳаси вакиллари иштирокида кўтаринки руҳда ўтди.

Ёз фасли болалар учун қувонч, янги таассуротлар ва мароқли дам олиш даври ҳисобланади. Ана шундай эзгу мақсадларни рўёбга чиқаришга хизмат қиладиган “Қалдирғоч” оромгоҳи бу йил ҳам юзлаб ўқувчиларни ўз бағрига чорлаб, улар учун қулай ва замонавий шароитлар яратди.

Тантанали очилиш маросимида Амударё тумани ҳокими ўринбосари Нодирбек Камолов ҳамда туман Мактабгача ва мактаб таълими бўлими бошлиғи Ялғаш Шомуратов иштирок этиб, йиғилганларни ёзги соғломлаштириш мавсумининг бошланиши билан табрикладилар. Сўзга чиққанлар болаларнинг таътил кунларини мазмунли ташкил этиш, уларнинг жисмоний ва маънавий камолотига кўмаклашиш давлат сиёсатининг устувор йўналишларидан бири эканини алоҳида таъкидладилар.

Тадбирда умумтаълим мактаблари директорлари, директор ўринбосарлари, оромгоҳ ташкилотчилари, масъул мутахассислар, ота-оналар ва болажонлар қатнашди. Маросим давомида меҳмонларга оромгоҳ ҳудудида яратилган шарт-шароитлар, дам олувчилар учун ташкил этилган қулайликлар ҳамда ёзги мавсум дастури ҳақида батафсил маълумот берилди. Болаларнинг хавфсизлиги, соғлиғи ва бўш вақтини мазмунли ташкил этишга қаратилган ишлар иштирокчиларда катта таассурот қолдирди.

Байрам тадбири концерт дастури билан давом этди. Иқтидорли ёшлар томонидан ижро этилган куй-қўшиқлар, рақслар ва саҳна чиқишлари йиғилганларга кўтаринки кайфият улашди. Айниқса, болажонларнинг қувончга тўла нигоҳлари ва самимий табассумлари тадбирнинг энг ёрқин лаҳзаларидан бири бўлди.

“Қалдирғоч” ёзги оромгоҳида мавсум давомида спорт ва маданият соҳаси ходимлари билан ҳамкорликда турли спорт мусобақалари, интеллектуал беллашувлар, маънавий-маърифий учрашувлар, ижодий танловлар ҳамда қизиқарли лойиҳалар ташкил этилиши режалаштирилган. Бундай тадбирлар болаларнинг бўш вақтини мазмунли ўтказиш, истеъдод ва қобилиятларини юзага чиқариш, жамоада ишлаш кўникмаларини шакллантириш ҳамда ватанпарварлик туйғуларини мустаҳкамлашга хизмат қилади.

Маълум қилинишича, биринчи мавсум 3 июндан 15 июнгача давом этиб, 12 кунлик соғломлаштириш ва дам олиш дастурини ўз ичига олади. Оромгоҳда ҳар бир сменада 100 нафардан бола дам олади. Жами бешта смена давомида 500 нафар ўқувчини соғломлаштириш ва мазмунли ҳордиқ чиқаришини таъминлаш режалаштирилган.

Бугунги кунда болаларнинг таълим билан бир қаторда сифатли дам олишини ташкил этиш, уларнинг соғлом ва баркамол авлод бўлиб вояга етишида муҳим омил ҳисобланади. Шу маънода, “Қалдирғоч” болалар ёзги дам олиш оромгоҳи ёш авлоднинг таътилини сермазмун, қизиқарли ва унутилмас ўтказишига хизмат қиладиган маскан сифатида фаолиятини бошлади.

Шубҳасиз, оромгоҳда ташкил этиладиган турли тадбирлар, спорт мусобақалари ва ижодий лойиҳалар болажонларга нафақат мароқли ҳордиқ, балки янги дўстлар, ёрқин таассуротлар ва унутилмас хотираларни ҳам ҳадя этади.

Чарос Арслонова, туман ҳокимлигининг Ахборот хизмати раҳбари.