ҲАР ҚАРИЧ ЕР – РИЗҚ-РЎЗ МАНБАИ: АМУДАРЁДА ДАЛА ЧЕТЛАРИДАН САМАРАЛИ ФОЙДАЛАНИШНИНГ ЯНГИ БОСҚИЧИ

Она заминимизнинг саховати чексиз, аммо ундан омилкорлик билан фойдаланиш, ернинг ҳар бир қаричига меҳр бериш чинакам деҳқоннинг вазифасидир. Айниқса, табиат уйғониш палласига кираётган шу кунларда қишлоқ хўжалиги ходимларининг зиммасидаги масъулият ҳар қачонгидан ҳам ортади. Баҳор нафаси келаётган шу кунларда Амударё туманида бўлиб ўтган муҳим тадбир айнан ердан унумли фойдаланиш ва дастурхонларимиз тўкинлигини таъминлаш масалаларига бағишланди.

16 февраль куни Дўрман овули ҳудудида жойлашган "Пирназаров Тўрабой" фермер хўжалиги дала шийпонида Амударё тумани фермерлари кенгаши ҳамда Ўсимликлар карантини ва ҳимояси агентлиги туман бўлими ҳамкорлигида ташкил этилган амалий семинарда соҳанинг етук мутахассислари, қишлоқ хўжалиги корхоналари ва фермер хўжаликлари раҳбарлари иштирок этди.

Тадбирда сўз олган Қорақалпоғистон Республикаси Ўсимликлар карантини ва ҳимояси агентлиги ва агентликнинг Амударё тумани бўлими, Туман фермерлари кенгаши масъуллари бугунги куннинг долзарб масалалари хусусида атрофлича фикр юритдилар.

Сир эмаски, кейинги йилларда сайёрамизда кузатилаётган глобал иқлим ўзгаришлари, сув танқислиги ва кутилмаган табиий офатлар қишлоқ хўжалиги маҳсулотлари етиштиришда жиддий қийинчиликларни туғдирмоқда. Семинар иштирокчилари таъкидлаганидек, бу салбий жараёнлар юртимиз деҳқончилигига ҳам ўз таъсирини ўтказмай қолмаяпти. Айнан шундай шароитда озиқ-овқат хавфсизлигини таъминлашнинг энг самарали йўли – мавжуд имкониятлардан, хусусан, экин майдонларининг четларидан максимал даражада фойдаланишдир.

Бу борада Ўзбекистон Республикаси Президентининг 2024 йил 30 декабрдаги "Қишлоқ хўжалиги майдонларидаги қўшимча имкониятлардан фойдаланган ҳолда маҳсулот етиштиришни кўпайтиришга доир чора-тадбирлар тўғрисида"ги қарори дастуруламал бўлиб хизмат қилмоқда. Мазкур ҳужжат дала четлари, аҳоли томорқалари, кўп қаватли уйлар атрофи ва маҳалла кўчаларида қишлоқ хўжалиги маҳсулотлари етиштиришни янги босқичга олиб чиқишни кўзда тутади.

Семинарда фермерларга яратилаётган имтиёзлар ҳақида алоҳида тўхталиб ўтилди. Эндиликда дала четларидан самарали фойдаланиб, маҳсулот етиштираётган ишлаб чиқарувчиларга ички фитосанитария сертификатлари бепул тақдим этилади. Бу эса ортиқча қоғозбозлик ва харажатнинг олдини олади.

Яна бир қувонарли янгилик – Агросаноатни ривожлантириш ва қўллаб-қувватлаш давлат мақсадли жамғармаси томонидан ажратилаётган субсидиялардир. Дала четларига "in-vitro" усулида етиштирилган мевали кўчат пайвандтагларини харид қилиш харажатларининг 50 фоизи қоплаб берилади. Бунда ҳар бир кўчат учун субсидия миқдори 25 минг сўмдан ошмаслиги белгиланган. Бундай ғамхўрлик фермерларимизни янада шижоат билан меҳнат қилишга ундаши табиий.

Назарий билимлар амалий режалар билан мустаҳкамланди. Тумандаги 350 та фермер хўжалиги ва қишлоқ хўжалиги корхоналари 2026 йилнинг баҳор мавсумида улкан мақсадни кўзлашган. Жумладан, мавсум давомида дала четлари ва бўш майдонларга жами 30 минг туп мевали ва манзарали дарахт ҳамда буталар экиш режалаштирилган. Ушбу эзгу ишларни амалга ошириш учун Қипчоқ давлат ўрмон хўжалиги ҳамда Қува туманидаги кўчатчилик хўжаликлари билан шартномалар имзоланган.

Шунингдек, ҳудудда махсус ишчи гуруҳ тузилиб, каналлар, суғориш тармоқлари ва коллектор-дренаж атрофларидаги фойдаланилмаётган ерлар хатловдан ўтказилмоқда. Ушбу ҳудудларда экспортбоп мевали дарахтларни экишнинг прогноз кўрсаткичлари ва аниқ мезонлари ишлаб чиқилди.

"Пирназаров Тўрабой" фермер хўжалигида ўтган ушбу семинар шунчаки йиғилиш эмас, балки мўл ҳосил ва фаровонлик сари ташланган муҳим қадам бўлди. Зеро, ерга меҳр берган ҳеч қачон кам бўлмайди. Амударёлик миришкорларнинг дала четларидан ҳам ҳосил олиш йўлидаги бу саъй-ҳаракатлари нафақат ўз даромадларини оширишга, балки элимиз дастурхони тўкинлиги ва юртимиз экспорт салоҳияти юксалишига хизмат қилиши шубҳасиз.