30-сонли мактабда “Барҳаёт сиймолар” номли тадбир бўлиб ўтди

Мана орадан беш асрдан ортиқ вақт ўтибдики, улуғ мутафаккир боболаримиз, сўз мулкининг султони Алишер Навоий ҳамда шоҳ ва шоир Заҳириддин Муҳаммад Бобурнинг бой маънавий мероси бутун дунёни ҳайратга солиб, инсонлар қалбига, онгу шуурига эзгулик, инсонпарварлик, саховат ва меҳр-мурувват нурини таратиб келмоқда. Шу кунларда юртимизда Алишер Навоий таваллудининг 584 ҳамда Заҳириддин Муҳаммад Бобур таваллудининг 542 йиллиги кенг нишонланмоқда. Таълим муассасалари ва маданият марказларида икки буюк сиймо таваллудига бағишлаб катта тадбирлар ташкил этилмоқда.

Шундай тадбирлардан бири Амударё туманидаги 30-сонли умумтаълим мактабида “Барҳаёт сиймолар” номи остида ўтказилди. Тадбирда мактаб директори Қувват Ниёзов, директор ўринбосари Дилноза Файзуллаева, мактабнинг ўзбек тили фани ўқитувчилари Фотима Эшимбетова, Умида Раҳимбоевалар қатнашишди.

Ўзбекистон “Миллий тикланиш” демократик партияси туман Кенгаши билан ҳамкорликда ташкил этилган мазкур тадбирда 9-“а”, 9-“б” ва 9-“в” синф ўқувчилари ҳам фаол иштирок этдилар.

Тадбирда мактабнинг она тили ва адабиёт фани ўқитувчиси Умида Раҳимбоева ҳар икки ижодкор дунё адабиёти тарихида жуда катта ўрин тутишини, халқпарвар давлат арбоби сифатида жамиятда тутган юксак мавқеи жиҳатидан ҳам, илм-фан, маданият ва санъат, адабиёт аҳлига кўрсатган ҳомийлиги жиҳатидан ҳам ўхшаши йўқ сиймо эканлигини, улар бугун ўзбек халқининг миллий ифтихорига, адабий, маънавий камолот тимсолига айланганлигини таъкидлади.

Шундан сўнг ўқувчилар Алишер Навоий ва Заҳириддин Муҳаммад Бобур қаламига мансуб ғазал, рубоий, қитъа ва фардлардан намуналар ўқиб, Навоий ғазали асосида ижро этилган куй-қўшиқларга рақсга тушдилар. Заҳириддин Муҳаммад Бобурнинг она Ватани Андижоннинг миллий рақсига айланган “Андижон полькаси”га, дарбадарликда юриб, қўним топган ҳинд элининг миллий куйларига ижро этилган рақслар томошабинларда катта таассурот қолдирди. Шунингдек, Алишер Навоийнинг зиддиятларга тўла мураккаб ҳаёт йўли бадиий бўёқларда таъсирчан тасвирланиб, иштирокчиларни хаёлан Навоий яшаган даврларга саёҳатга чорлади.

Навоий туркий тил асосида бетакрор боғ яратиб, дунё аҳлини ҳайратга солган бўлса, Бобур шу туркий назм гулшанидаги бепоён боғни чин маънода бўстонга айлантирган ва ҳинд юртида ҳам ижодкорлар раҳнамоси бўлган. Ҳазрат Бобур ҳақида дунё олимлари турли жанрда 12 мингдан зиёд катта-кичик асар ёзган. Навоий яратган жами 34 та йирик асарнинг ҳар бири ҳақида эса юзлаб тадқиқотлар қилинган, диссертация ва монографиялар ёзилган.

Тадбирда мактабнинг ўзбек тили фани ўқитувчиси Фотима Эшимбетова қайд этганидек, Алишер Навоий ўз ижодида барчани дўстликка ва бир-бирини ўзаро тўғри тушунишга даъват этган. Беназир сўз устаси ва доно давлат арбоби сифатида халқ билан ҳамиша бирга бўлган, унинг орзу-истаклари билан яшаган ва ижод қилган. У ўз ҳисобидан юздан зиёд биноларни қурдирган, оддий одамларга беғараз кўмак кўрсатган. Заҳириддин Муҳаммад Бобур эса нафақат шоир, балки ўз даврининг тарихчиси, этнографи, ўлкашуноси, географи ҳамдир.

Шу ўринда айтиш лозимки, мазкур тадбир рус тилида таҳсил олувчи синф ўқувчилари томонидан саҳналаштирилган бўлса-да, юқори даражадаги тайёргарлик ва кўтаринки кайфиятда бўлиб ўтди. Бу уларнинг Навоий ва Бобур ижодига бўлган қизиқишларини янада ошириб, буюк аждодларимизга муносиб авлод бўлишдек шарафли туйғуларни қалбларига сингдирди.

Фотима Эшимбетова 30-сонли мактабнинг ўзбек тили фани ўқитувчиси