30-sonli maktabda “Barhayot siymolar” nomli tadbir boʻlib oʻtdi

Mana oradan besh asrdan ortiq vaqt oʻtibdiki, ulugʻ mutafakkir bobolarimiz, soʻz mulkining sultoni Alisher Navoiy hamda shoh va shoir Zahiriddin Muhammad Boburning boy maʼnaviy merosi butun dunyoni hayratga solib, insonlar qalbiga, ongu shuuriga ezgulik, insonparvarlik, saxovat va mehr-muruvvat nurini taratib kelmoqda. Shu kunlarda yurtimizda Alisher Navoiy tavalludining 584 hamda Zahiriddin Muhammad Bobur tavalludining 542 yilligi keng nishonlanmoqda. Taʼlim muassasalari va madaniyat markazlarida ikki buyuk siymo tavalludiga bagʻishlab katta tadbirlar tashkil etilmoqda.

Shunday tadbirlardan biri Amudaryo tumanidagi 30-sonli umumtaʼlim maktabida “Barhayot siymolar” nomi ostida oʻtkazildi. Tadbirda maktab direktori Quvvat Niyozov, direktor oʻrinbosari Dilnoza Fayzullayeva, maktabning oʻzbek tili fani oʻqituvchilari Fotima Eshimbetova, Umida Rahimboyevalar qatnashishdi.

Oʻzbekiston “Milliy tiklanish” demokratik partiyasi tuman Kengashi bilan hamkorlikda tashkil etilgan mazkur tadbirda 9-“a”, 9-“b” va 9-“v” sinf oʻquvchilari ham faol ishtirok etdilar.

Tadbirda maktabning ona tili va adabiyot fani oʻqituvchisi Umida Rahimboyeva har ikki ijodkor dunyo adabiyoti tarixida juda katta oʻrin tutishini, xalqparvar davlat arbobi sifatida jamiyatda tutgan yuksak mavqei jihatidan ham, ilm-fan, madaniyat va sanʼat, adabiyot ahliga koʻrsatgan homiyligi jihatidan ham oʻxshashi yoʻq siymo ekanligini, ular bugun oʻzbek xalqining milliy iftixoriga, adabiy, maʼnaviy kamolot timsoliga aylanganligini taʼkidladi.

Shundan soʻng oʻquvchilar Alisher Navoiy va Zahiriddin Muhammad Bobur qalamiga mansub gʻazal, ruboiy, qitʼa va fardlardan namunalar oʻqib, Navoiy gʻazali asosida ijro etilgan kuy-qoʻshiqlarga raqsga tushdilar. Zahiriddin Muhammad Boburning ona Vatani Andijonning milliy raqsiga aylangan “Andijon polkasi”ga, darbadarlikda yurib, qoʻnim topgan hind elining milliy kuylariga ijro etilgan raqslar tomoshabinlarda katta taassurot qoldirdi. Shuningdek, Alisher Navoiyning ziddiyatlarga toʻla murakkab hayot yoʻli badiiy boʻyoqlarda taʼsirchan tasvirlanib, ishtirokchilarni xayolan Navoiy yashagan davrlarga sayohatga chorladi.

Navoiy turkiy til asosida betakror bogʻ yaratib, dunyo ahlini hayratga solgan boʻlsa, Bobur shu turkiy nazm gulshanidagi bepoyon bogʻni chin maʼnoda boʻstonga aylantirgan va hind yurtida ham ijodkorlar rahnamosi boʻlgan. Hazrat Bobur haqida dunyo olimlari turli janrda 12 mingdan ziyod katta-kichik asar yozgan. Navoiy yaratgan jami 34 ta yirik asarning har biri haqida esa yuzlab tadqiqotlar qilingan, dissertatsiya va monografiyalar yozilgan.

Tadbirda maktabning oʻzbek tili fani oʻqituvchisi Fotima Eshimbetova qayd etganidek, Alisher Navoiy oʻz ijodida barchani doʻstlikka va bir-birini oʻzaro toʻgʻri tushunishga daʼvat etgan. Benazir soʻz ustasi va dono davlat arbobi sifatida xalq bilan hamisha birga boʻlgan, uning orzu-istaklari bilan yashagan va ijod qilgan. U oʻz hisobidan yuzdan ziyod binolarni qurdirgan, oddiy odamlarga begʻaraz koʻmak koʻrsatgan. Zahiriddin Muhammad Bobur esa nafaqat shoir, balki oʻz davrining tarixchisi, etnografi, oʻlkashunosi, geografi hamdir.

Shu oʻrinda aytish lozimki, mazkur tadbir rus tilida tahsil oluvchi sinf oʻquvchilari tomonidan sahnalashtirilgan boʻlsa-da, yuqori darajadagi tayyorgarlik va koʻtarinki kayfiyatda boʻlib oʻtdi. Bu ularning Navoiy va Bobur ijodiga boʻlgan qiziqishlarini yanada oshirib, buyuk ajdodlarimizga munosib avlod boʻlishdek sharafli tuygʻularni qalblariga singdirdi.

Fotima Eshimbetova 30-sonli maktabning oʻzbek tili fani oʻqituvchisi