JURNALISTLAR – ZAMON QAHRAMONLARI

“Boshqalarni bilmadim-u,

lekin menga jurnalistlar yoqadi”.

Sh. M. Mirziyoyev.

Oʻzbekistonda XV asrning oʻrtalariga kelib zamonaviy jurnalistikaga asos solindi. Shundan buyon koʻpgina nashrlar paydo boʻldi va xalq manfaati yoʻlida chop etildi. Albatta, bunda milliy jurnalistikamizning atoqli namoyandalari oʻz jonini jabborga berib haqiqat uchun kurashdi. Ular orasida M. Behbudiy, M.Abdurashidxonov, A.Avloniy, I.Obidiy, U.Asadullaxoʻjayev va shu singari adiblar bor edi. Dastlabki gazetalardan esa “Turkiston viloyati gazeti”, “ Turkestanskiy vedomosti”, “Taraqqiy” va boshqa gazetalarni aytishimiz mumkin. Aynan “Taraqqiy” gazetasi chop etilgan sana, yaʼni, 27-iyun Oʻzbekiston Respublikasining Birinchi Prezidenti Farmoniga binoan Matbuot va ommaviy axborot vositalari xodimlari kuni deb eʼlon qilingan. Shu yili oʻzbek matbuotining toʻngʻich gazetasi boʻlmish “Taraqqiy”ning chop etilganligiga 114-yil toʻldi.

Zamon rivojlangan sari jurnalistikamiz ham rivoj topdi. Bugungi kunda pandemiya davrida jurnalistlar “Zamon qahramonlari” deya eʼtirof etilmoqda. Albatta, tezkor xabar va yangiliklarga boʻlgan ehtiyoj kun sayin ortib borayotgani xech kimga sir emas. Mana shu jihatdan bloger va jurnalistlar tezkorlik bilan ish faoliyatini olib bormoqdalar. Bugun biz “Dunyo hamjamiyatida jurnalistlarning oʻrni qanchalik ortdi?” degan savol bilan soha vakillari va fuqarolarga internet tarmoqlari orqali murojaat etib, suhbatlashdik.

Oʻrozboy AbduraHmOnov, Oʻzbekiston va Qoraqalpogʻiston xalq yozuvchisi:

Karantin davrida insoniyatning boshiga tushgan umumiy dard jurnalist va blogerlarning masʼuliyatini kuchaytiradi. OAV va ijtimoiy tarmoqlarda yolgʻon va vahimalarning kamayishiga harakat qilish kerak, ayniqsa, matbuotning yolgʻon tashishiga yoʻl qoʻyib boʻlmaydi. Xabar tezligi ortgani sari yolgʻonlar tezligi ham ortadi. Mualliflar pozitiv pozitsiyadan koʻproq tahlillarga eʼtibor bergani maʼqul. Sensatsiya quvmaslik kerak. Odamlarning ruhini koʻtaradigan xabar va tahlillarga zarurat kuchaymoqda.

Muxtor Xudoyqulov, yozuvchi, jurnalist:

Matbuot, yaʼni OAV ijtimoiy hayotning barcha tomonlarini oʻzida aks ettiradi, undagi boʻlayotgan voqea va hodisalarni yoritadi, biladi, tahlil qiladi va jamiyat hayotiga qaytadan taʼsir koʻrsatadi. Koronavirus pandemiyasi paytida ham matbuot oʻz vazifasini bajarmoqda. Koʻpchilik jurnalistlar bu hodisani tushuntirish, uning oldini olish va tezroq undan xalos boʻlish yoʻlida ishlab, yozishdi, koʻrsatishdi va hk. Albatta, har vaqtdagi kabi odamlar jurnalistlarga quloq tutib, oʻqishmoqda, maʼlumot olishmoqda. Bu voqeani reportyorlar, informatorlar yoritib borishmoqda, tahlilchilar tahlil qilishmoqda.

Lobar Toʻrayeva, talaba:

Oldin xalq axborotga tashna edi. Pandemiya sabab yuzaga kelgan karantin bu tashnalikni ikki karra oshirdi. Ertalab ham yangilik, tushlikda va kechki payt ham yangilik. Menimcha karantin davrida jurnalistlarning mavqei shifokor va IIV xodimlari bilan bir xil darajaga yetdi. Bu esa sifatli faoliyat yuritishga boʻlgan talabning ikki hissa oshishiga sabab boʻldi.

Muxtor Umbetov,

QDU talabasi.