Qilichboydagi zamonaviy oʻquv markazi yuzlab yoshlar uchun imkoniyatlar eshiklarini ochmoqda

Mamlakatimizda yoshlarning bandligini taʼminlash, ularning tadbirkorlik tashabbuslarini har tomonlama qoʻllab-quvvatlash va iqtidorlarini yuzaga chiqarish davlat siyosatining eng ustuvor yoʻnalishiga aylangan. Bu borada yaratilayotgan keng koʻlamli imkoniyatlar chekka hududlardagi yoshlar hayotida qanday ulkan oʻzgarishlarga sabab boʻlayotganini bugun yaqqol koʻrishimiz mumkin. Xususan, Oʻzbekiston Respublikasi Prezidentining 2025-yil 14-fevraldagi “Yoshlar tadbirkorligini hamda ularning bandligini taʼminlashga qaratilgan biznes loyihalarni qoʻllab-quvvatlash tizimini takomillashtirish chora-tadbirlari toʻgʻrisida”gi qarori bu yoʻnalishdagi ishlarni mutlaqo yangi bosqichga olib chiqdi. Mazkur tarixiy qaror asosida Yoshlar ishlari agentligi huzuridagi “Yoshlar tadbirkorligini rivojlantirish davlat maqsadli jamgʻarmasi” davlat muassasasining tashkil etilishi koʻplab yigit-qizlar uchun oʻz orzularini roʻyobga chiqarishda mustahkam poydevor boʻlib xizmat qilmoqda.

Aynan ushbu jamgʻarma tomonidan hayotga tatbiq etilayotgan “Koʻmak” loyihasi nafaqat tadbirkorlikni rivojlantirish, balki chekka qishloq va ovullarda taʼlim sifatini oshirishga xizmat qilayotgan muhim tashabbuslardandir. Ushbu loyihaning asosiy maqsadi olis hududlarda chet tillariga ixtisoslashgan oʻquv markazlarini ochish istagida boʻlgan shijoatli yoshlarni moliyaviy jihatdan qoʻllab-quvvatlashga qaratilgan. Loyiha doirasida yaratilgan eng katta imkoniyat shundaki, ushbu imtiyozdan foydalanish istagini bildirgan yoshlarga 3-yil muddatga, 6 oylik imtiyozli davr bilan 130 million soʻmgacha foizsiz qarz, yaʼni ssuda ajratilishi belgilangan. Bu esa oʻz biznesini boshlash arafasida turgan yosh tadbirkorlar uchun juda katta moliyaviy koʻmak demakdir.

Amudaryo tumanining Qilichboy ovulida istiqomat qiluvchi Sardorbek Imomiddinov faoliyati misolida ushbu qaror bilan yaratilgan imkoniyatlarning amaldagi yorqin ifodasini koʻrishimiz mumkin. Oliy taʼlim muassasasini axborot texnologiyalari yoʻnalishi boʻyicha muvaffaqiyatli tamomlagan bu yosh mutaxassis Yoshlar ishlari agentligi tomonidan tashkil etilgan Oʻquv markazlari forumida faol ishtirok etdi. Natijada u yuqorida qayd etilgan 130 million soʻmlik ssudani olish imkonini beruvchi maxsus vaucherni qoʻlga kiritishga muvaffaq boʻldi. Olingan mablagʻ evaziga u Qilichboy ovulida yoshlarning zamon talablariga mos ravishda bilim olishlari uchun barcha sharoitlarga ega boʻlgan, zamonaviy qiyofadagi chet tillariga ixtisoslashgan oʻquv markazini bunyod etdi.

Bugungi kunda mazkur taʼlim maskani hududdagi yoshlarning eng gavjum va sevimli joyiga aylanib ulgurdi. Markazda ayni paytda Qilichboy ovuli va unga yondosh hududlar yoshlari haftasiga 7 kun mobaynida, 2 smenada bilim olmoqda.

Ushbu oʻquv markazining ochilishi qishloq yoshlari va ularning ota-onalari uchun gʻoyatda katta qulaylik yaratdi. Ilgarilari chet tillarini oʻrganish istagida boʻlgan oʻquvchilar boshqa hududlarga, tuman markazlariga qatnab oʻqishga majbur edilar. Bu esa, oʻz navbatida, yoʻlkira uchun qoʻshimcha xarajatlarni talab qilar, eng muhimi, yoshlarning koʻp vaqti yoʻllarda zoye ketar edi. Endilikda esa ular oʻz uylariga yaqin joyda, xavfsiz va qulay sharoitda, ortiqcha sarf-xarajatlarsiz sifatli taʼlim olish imkoniyatiga ega boʻldilar.

Oʻquv markazining oʻz faoliyatini boshlaganiga endigina 6 oy boʻlganiga qaramay, erishilayotgan dastlabki amaliy natijalar tahsinga sazovor. Yaqindagina markazda tahsil olayotgan 22 nafar iqtidorli yoshlar chet tillari va turli fanlarni bilish darajasi boʻyicha nufuzli sertifikatlarni qoʻlga kiritishga muvaffaq boʻlishdi. Chekka hududlarda bunday xayrli tashabbuslarni qoʻllab-quvvatlashda tuman hokimligining ham oʻrni beqiyos boʻlmoqda. Xususan, tuman hokimi Sobir Xojametov tashabbusi bilan ushbu yangi oʻquv markazining moddiy-texnik bazasini yanada mustahkamlash va yoshlarga qoʻshimcha shart-sharoitlar yaratish maqsadida 5 ta eng soʻnggi rusumdagi zamonaviy kompyuter jamlanmasi olib berildi. Shu bilan birgalikda, markaz qoshida boy maʼnaviy xazinaga ega boʻlgan yangi kutubxona tashkil etish uchun 500 dan ortiq turli xil kitoblar taqdim etildi.

Globallashuv va axborot texnologiyalari jadal rivojlanayotgan bugungi asrda yoshlarning chet tillarini mukammal bilishi hamda kompyuter savodxonligiga ega boʻlishi nafaqat shaxsiy kamolot, balki butun mamlakat iqtisodiyotining raqobatbardoshligini oshirishda muhim omil hisoblanadi. Ayniqsa, xorijiy tillarni yaxshi bilish qishloq yoshlari uchun nufuzli oliygohlarda taʼlim olish va xalqaro dasturlarda ishtirok etish eshiklarini ochadi. Qilichboy ovulida yaratilgan bunday sharoitlar esa yoshlarning boʻsh vaqtlarini mazmunli oʻtkazish bilan birga, kelajakda oʻz oʻrnini topa oladigan barkamol avlod boʻlib voyaga yetishida mustahkam koʻprik vazifasini oʻtaydi. Tadbirkorlik, intilish va davlat koʻmagining bunday uygʻunligi natijasida hududlarda nafaqat taʼlim infratuzilmasi yaxshilanmoqda, balki aholining kayfiyati va kelajakka boʻlgan ishonchi ham yuksalib bormoqda.

Bugungi kunda markazning zamonaviy kompyuter xonasida yoshlar dasturlash ilmlarini va axborot texnologiyalarini bepul oʻrganishmoqda. Markaz qoshida tashkil etilgan yangi kutubxona esa nafaqat oʻquvchi yoshlar, balki butun Qilichboy ovuli aholisi uchun doimiy ravishda ochiq boʻlib, barcha bemalol kelib, kitob mutolaa qilishlari uchun imkoniyat yaratilgan. Eng quvonarlisi shundaki, oliy taʼlim muassasasida tahsil olgan Sardorbek Imomaddinov oʻzining dasturlash va kompyuter texnologiyalari boʻyicha egallagan bilimlarini hamqishloqlari bilan chin dildan baham koʻrmoqda. U yoshlar uchun kompyuter savodxonligi darslarini bepul tashkil etib, ularni kelajakning eng talabgir kasblariga tayyorlashga oʻzining munosib hissasini qoʻshib kelmoqda.

Xulosa qilib aytganda, davlatimiz tomonidan berilgan va toʻgʻri yoʻnaltirilgan moliyaviy resurslar Sardorbek singari koʻplab yosh mutaxassislarning fidoyiligi sababli minglab yoshlar hayotida yangi sahifa ochmoqda.