Фуқароларнинг уй-жойга бўлган ҳуқуқларини эътироф этиш бўйича амалий ишлар давом этмоқда

Маълумки, Ўзбекистон Республикаси Президентининг 2023 йилнинг 28 июнь санасида имзоланган “Қорақалпоғистон Республикаси аҳолисини ижтимоий қўллаб-қувватлаш ҳамда жисмоний шахслар томонидан қурилган уй-жойларга бўлган ҳуқуқларни эътироф этиш тўғрисида”ги фармони билан республика бўйлаб фуқароларнинг уй-жойга эгалик қилиш ҳуқуқларини таъминлаш бўйича амалий ишлар йўлга қўйилган эди. Ҳудудларда фармон ижросини таъминлаш, шунингдек, аҳолига мазкур фармон мазмун-моҳияти ва аҳамиятини тушунтириш борасидаги ишлар давом этмоқда.

Хусусан, яқинда Амударё тумани Ойбек маҳалласида яшовчи уй-жой эгаларига кўчмас мулк ҳуқуқини эътироф этувчи Қорақалпоғистон Республикаси Жўқорғи Кенгеси Президиуми қарори ҳамда тегишли ҳужжатлар топширилди.

Жараёнда Давлат кадастрлари палатаси Амударё тумани филиали муҳандиси Ўткирбек Ҳайитжонов, Ойбек маҳалла фуқаролар йиғини раиси Азамат Хидиров, маҳалладаги ҳоким ёрдамчиси Маҳмуд Сапарбоевлар иштирок этдилар. Масъуллар хонадонларга уйма-уй кирган ҳолда уй-жойга эгалик қилиш ҳамда турар жой жойлашган ер майдонига ижара ҳуқуқини эътироф этувчи Президиум қарорларини ўз эгаларига тантанали тарзда топширдилар.

Маҳалладаги Фитрат кўчаси 12-уйда яшовчи Азад Қурбаниязов кўп йиллардан буён уй-жойининг кадастр ҳужжати йўқлиги сабабли сарсон бўлиб келаётган эди. Масъуллар Азат Қурбаниязовга уй-жойига эгалик ҳуқуқини эътироф этишни назарда тутувчи қарорларни топширдилар ҳамда унга Президент фармонининг республика ижтимоий-иқтисодий ривожидаги аҳамияти хусусида маълумотлар бердилар.  

Истиқлол кўчаси 17-уйда яшовчи Бахтиёр Тўқлибоев ҳам турар жой иморатига нисбатан мулк ҳуқуқи ҳамда улар жойлашган ер участкаларига ижара ҳуқуқини эътироф этишни назарда тутувчи ҳужжатга эга бўлди. Хонадон эгаси билан суҳбат чоғида Давлат кадастрлари палатаси Амударё тумани филиали муҳандиси Ўткирбек Ҳайитжонов ушбу қарор асосида кадастр ҳужжатини олиш учун ариза бериши лозимлиги, кадастр ҳужжатини олгандан кейин ер-мулк эгаси қатор имкониятларга эга бўлиши хусусида тушунтиришлар берди.

Таъкидланганидек, кадастр ҳужжатини олган фуқаролар кўчмас-мулк билан боғлиқ ҳар қандай муносабатларда иштирок эта олади, фарзандларини ҳудуддаги давлат боғчаларига рўйхатга қўя олади, олдин 3 баравар ҳисобланган солиқ миқдори 1 бараварга камаяди, ўзи яшаётган ҳудудга рўйхатга тура олади, турар жойини сотиш, совға қилиш ҳамда мерос қолдириш ҳуқуқига эга бўлади, турар жойини гаровга қўйиш орқали кредит маблағи олиб, тадбиркорлик фаолияти билан шуғулланиши мумкин.

Масъуллар маҳалланинг Муқимий кўчасидаги 17-уйда яшовчи Разия Йўлдашева хонадонида ҳам бўлдилар ва фуқарога кадастр ҳужжатини олгандан кейин қўлга киритиладиган имкониятлар хусусида батафсил маълумотлар бердилар.

Қорақалпоғистон Республикаси Жўқорғи Кенгеси Президиумининг тегишли қарорини олган фуқаролар уй-жойга эгалик ҳуқуқини эътироф этувчи ҳужжатнинг берилганидан хурсанд эканлигини, давлатимиз раҳбари томонидан берилаётган имкониятлардан миннатдор эканини билдирдилар.

Чарос Арслонова, туман ҳокимлигининг Ахборот хизмати раҳбари.