“Инсон” ИҲМ ходимлари томонидан “Ёлғиз кекса” реестрига киритилган фуқароларнинг хонадонларида ҳашар ташкил этилди

Мамлакатимиз бўйлаб Ўзбекистон Республикаси давлат мустақиллигининг 35 йиллик байрамини муносиб кутиб олиш ва уни юқори савияда нишонлаш мақсадида кенг кўламли тайёргарлик ишлари қизғин паллага кирди. Байрам арафасида юртимизда “Ягона Ватан, ягона халқ бўлиб, янги ҳаёт ва келажак яратамиз!” деган эзгу шиор остида барча ҳудудларда халқимизнинг меҳр-оқибат, ҳамжиҳатлик ва бағрикенглик каби энг гўзал фазилатлари янада яққол намоён бўлмоқда.

Хусусан, Ўзбекистон Республикаси Вазирлар Маҳкамасининг 2026 йил 17 июлдаги йиғилиш баёни ижросини таъминлашга қаратилган “Долзарб 40 кунлик” тадбирлари доирасида жойларда кенг қамровли ободонлаштириш, бунёдкорлик ва ижтимоий ҳимояга муҳтож аҳоли қатламларини манзилли қўллаб-қувватлаш ишлари уюшқоқлик билан амалга оширилмоқда. Ана шундай эзгу ташаббусларнинг амалий ифодаси сифатида Амударё туманида ҳам аҳолининг ижтимоий ҳимояга муҳтож қатламлари, хусусан, ёлғиз кексалар ва ногиронлиги бўлган шахслар ҳолидан хабар олиш, уларнинг яшаш шароитларини яхшилашга қаратилган тизимли ишлар йўлга қўйилди.

Жумладан, Амударё тумани “Инсон” ижтимоий хизматлар марказининг масъул ходимлари томонидан “Ёлғиз кекса” реестрига киритилган, доимий эътибор ва ғамхўрликка муҳтож фуқароларнинг хонадонларида ҳашар йўли билан тозалик ва ободонлаштириш тадбирлари ташкил этилди.

Тумандаги Чойкўл овули ҳудудида истиқомат қилувчи, ёлғиз яшовчи ногиронлиги бўлган шахслар Раҳима Жуманиязова ҳамда Тўхта Сабурова, шунингдек, Уйшин маҳалласида яшовчи ёлғиз ногиронлиги бўлган фуқаро Шавкат Рахимабаевнинг хонадонларида санитария-тозалаш ишлари олиб борилди. Мазкур хайрли ва савобли ишлар Амударё тумани “Инсон” ижтимоий хизматлар маркази ходимлари, “Маҳалла еттилиги” вакиллари ҳамда “Қурбониязов Жасур” масъулияти чекланган жамияти ассистентларининг ўзаро фаол ҳамкорлигида амалга оширилди.

Жараён давомида ушбу хонадонлар ва уларнинг атроф ҳудудларида жойлашган дарахтларга оҳак суртилиб, теварак-атрофга шакл берилди. Бундан ташқари, чуқур тозалаш ишлари олиб борилиб, ҳовли ва уй атрофи турли хил маиший чиқиндилар ҳамда ёввойи бегона ўтлардан тўлиқ тозаланди. Натижада ҳудуд қатъий санитария ва гигиена талабларига мувофиқ ҳолатга келтирилиб, озодалик ва тартиб ўрнатилди.

Албатта, бундай тадбирлар фақатгина жисмоний меҳнат ёки тозалаш ишлари билан чекланиб қолмайди. Масъуллар томонидан ушбу фуқароларнинг ҳолидан хабар олиниб, уларнинг яшаш шароитлари, соғлиғи ва руҳий ҳолати яқиндан ўрганилди. Улар билан ўтказилган дилдан суҳбатлар давомида тиббий, психологик ва бошқа турдаги маиший-ижтимоий хизматларга бўлган эҳтиёжлари таҳлил қилиниб, мутахассислар томонидан тегишли маслаҳат ва керакли йўл-йўриқлар берилди.

Олиб борилган ободонлаштириш ва кўкаламзорлаштириш ишлари натижасида ушбу хонадонларнинг санитария ҳолати яхшиланиб, ёлғиз кексалар ва ногиронлиги бўлган шахсларнинг муносиб яшаши учун янада қулай ва озода муҳит яратилди. Бундай хайрли ва инсонпарварлик тадбирлари жамиятимизда ёлғиз кексалар ҳамда ногиронлиги бўлган шахсларни ҳар томонлама ва манзилли қўллаб-қувватлаш, уларнинг ҳаётга бўлган қизиқиши ва турмуш сифатини оширишга хизмат қилиши билан бирга, маҳаллаларда меҳр-оқибат, ўзаро ҳурмат ҳамда ҳамжиҳатлик муҳитини янада мустаҳкамлашда муҳим омил бўлмоқда.

Мамлакатимиз бўйлаб Ўзбекистон Республикаси давлат мустақиллигининг 35 йиллик байрамини кўтаринки руҳда нишонлашга тайёргарлик кўриш ҳамда байрам тадбирларини юқори савияда ўтказиш юзасидан белгиланган чора-тадбирлар ижроси доирасидаги бу каби эзгу ишлар тасдиқланган режа асосида барча ҳудудларда изчил давом эттирилмоқда. Ҳеч бир инсон меҳр эътибордан четда қолмайдиган юртимизда ҳақиқий байрам шукуҳи ҳар бир хонадонга, ҳар бир юртдошимиз қалбига кириб бормоқда.