ЖУМУРОВУЛ МАҲАЛЛАСИДА БИЛИМЛИ ВА МАЪНАВИЯТЛИ ЁШЛАР КАМОЛ ТОПМОҚДА

Тобора шиддат билан ривожланиб бораётган дунёда ёшларни ҳар хил оқим ва ғоялардан ишончли ҳимоя қилишнинг бирдан-бир воситаси – таълим-тарбия ишларини юксак мақомда йўлга қўйиш, ёшлар онгида маънавий иммунитетни мустаҳкамлаш, уларнинг билимли, интилувчан шахс сифатида шаклланишлари учун шароит яратишдир. Шу боис, Президентимиз тараққиётимизнинг мақсади Учинчи Ренессансни бунёд этиш эканлигини таъкидлар эканлар, Учинчи Ренессанснинг асосий бунёдкорлари – билимли ва маънавиятли ёшлар эканлигига алоҳида урғу берган эдилар.

Бу борада Амударё туманидаги “Тараққиёт кўзгуси” газетаси таҳририяти томонидан “Нажот – таълимда, нажот – тарбияда, нажот билимда” шиори остида амалга оширилаётган “Билимли ва маънавиятли ёшлар билан – Учинчи Ренессанс сари” номли давлат гранти лойиҳаси доирасидаги тадбирлар ҳам муҳим аҳамият касб этмоқда. Грант лойиҳаси доирасида ёзувчи-шоирлар билан тажрибали педагоглар, ижодкор-ёшларнинг давра суҳбатларини, “Китобхонлик ва мутолаа маданияти”, “Китоб сайллари”, “Билимдон ёшлар – юрт келажаги”, “Болалар ва ўсмирлар китоб ҳафталиги” каби маънавий-маърифий тадбирларни, ёшлар китобхонлигини тарғиб этувчи акциялар, иншолар танловларини ташкил қилиш, Амударё телевидениеси таҳририяти билан ҳамкорликда “Китобхон ёшлар” кўрсатувларини суратга олиш ва эфирга узатиш каби ишлар режалаштирилмоқда.

Лойиҳа доирасида ёшларни мафкура майдонининг ҳар қандай хуружларидан ҳимоя қилиш, уларнинг маънавий дунёсини бойитиш мақсадида таълим-тарбия ишлари яхши йўлга қўйилган намунали мактабларнинг тажрибали педагоглари ва китобхон ёшлари иштирокидаги давра суҳбатлари ёшларда катта қизиқиш уйғотмоқда.

Ана шундай маънавий-маърифий тадбирлардан бири Амударё туманидаги 45-сонли умумтаълим мактабида ҳам бўлиб ўтди. “Нажот – таълимда, нажот – тарбияда, нажот - билимда” шиори остида “Билимли ва маънавиятли ёшлар билан – Учинчи Ренессанс сари” грант-лойиҳаси доирасида ўтказилган давра суҳбатида 45-сонли мактаб директори Гулойим Қаландарова, “Жайхун илҳомлари” ННТ аъзоси, таниқли шоир ва ёзувчи Аҳмад Нафасов, Ўзбекистон Ёзувчилари ижодий Уюшмаси аъзоси, Қорақалпоғистон Республикасида хизмат кўрсатган журналист, шоира Робия Йўлдошева, мактабнинг бир гуруҳ тажрибали ўқитувчилари ва китобсевар ижодкор ёшлар иштирок этишди.

Самимий ва дилдан суҳбат тарзидаги тадбирда Робия Йўлдошева “Билимли ва маънавиятли ёшлар билан – Учинчи Ренессанс сари” грант-лойиҳасининг иш режасини амалга оширишдан кутилаётган натижалар, лойиҳа ижодкорлари томонидан амалга оширилаётган маънавий-маърифий тадбирларнинг ёшлар таълим-тарбиясида тутган ўрни хусусида батафсил маълумот берди. Шу билан бирга Жумуровул маҳалласининг ўзига хос бой тарихи, бу заминдан етишиб чиққан давлат ва жамоат арбоблари, тарихий шахслар, айниқса, мустақиллик йўлидаги курашларда жон фидо этган, жумуровулликларнинггина эмас, бутун халқимизнинг фахр-у ифтихорига айланган, ўз даврининг етук сиёсатчиси Бобоохун (Муҳаммадохун) Салимовнинг ҳаёти ва фаолияти хусусида кенг тўхталиб, бу борадаги Жумуровул ёшларининг фикрлари билан ҳам ўртоқлашди.

Давра суҳбати давомида тадбир иштирокчилари Меҳнат Қаҳрамони Ойим Камолова ва унинг издошлари, шунингдек, китобхон-ёшлар, улар эришаётган ютуқлар, китоб мутолаасининг инсон камолотидаги ўрни ҳақида ўзаро фикрлашдилар.

Тадбирнинг шеърхонлик баҳсини таниқли шоир ва ёзувчи “Саломчи менинг унвоним”, “Келдим довонлар ошиб...” китобларининг муаллифи Аҳмад Нафасов бошлаб берди. Аҳмад Нафасовнинг ватанпарварлик, инсонийлик, ўзаро меҳр-оқибат, дўстлик, тинчлик туйғулари мадҳ этилган шеърларини давра суҳбати иштирокчилари олқишлар билан кутиб олдилар. Ўз навбатида мактабнинг амалиётчи-психологи Дилфуза Утегенова, мактабнинг ижодкор ўқувчиларидан Нигора Бозорбоевалар ҳам ўз ижодларидан намуналар ўқиб беришди.

Ўзлари туғилиб-ўсган овулдан фахрланиш, она Ватан тараққиёти учун масъуллик туйғуси ифода этилган шеърхонлик баҳсини мактаб директори Гулойим Қаландарова ўзи фаолият юритаётган ўқув масканида яратилган шарт-шароитлар, таълим-тарбия соҳасига мамлакатимизда кўрсатилаётган эътибор ва ғамхўрликдан чексиз миннатдорлик сўзлари билан давом эттирди.

Ҳақиқатан ҳам туманнинг энг чекка ҳудудларидан бирида жойлашган бўлишига қарамай, мазкур мактабда сезиларли ютуқларга эришилмоқда. Мактаб биноси 2022-2023 ўқув йилида тўлиқ реконструкция қилиниб, таълим-тарбия жараёнини муваффақиятли олиб бориш учун барча имкониятлар яратилди. Айни пайтда ўқув масканида 467 нафар жумуровуллик ёшлар таълим-тарбия олишмоқда. Уларнинг фан асосларини чуқур эгаллашлари учун 53 нафар малакали педагог ходимлар масъул. Педагогларнинг 4 нафари олий, 13 нафари биринчи, 28 нафари иккинчи тоифали малакага эга ўқитувчилардир. Ўқитувчиларнинг 3 нафари халқаро, 3 нафари миллий сертификатга эга.

Мактабнинг 2022-2024 ўқув йилидаги битирувчиларидан 22 нафари ОТМ талабалари бўлишди ва бу борадаги кўрсаткич 66 фоизни ташкил этди. Ўқувчи-ёшлар орасида фанлар олимпиадаси ва турли спорт мусобақалари ғолибларининг борлигидан аёнки, муассасада ёшларни маънавий-маърифий жиҳатдан тарбиялаш борасидаги ишлар Гулойим Қаландарова фахрланиб айтганича бор, чунки мактаб яшил тоифадаги таълим муассасалари қаторидан жой олган. Буни давра суҳбати иштирокчиларининг фикр-мулоҳазаларидан ҳам яққол билдик.

Давра суҳбати якунида Робия Йўлдошева янги шеърларидан ўқиб берди ва ўқувчи-ёшлар билан китоб мутолаасининг фойдалари юзасидан самимий суҳбатлашди.

Дилдан, самимий мулоқот тарзида ўтган давра суҳбатидан иштирокчилар катта таассуротлар олдилар.

Эслатиб ўтамиз: бундан сал аввал 73-сонли мактабнинг тажрибали-ўқитувчилари ва ижодкор ёшлари билан шоир ва ёзувчиларнинг учрашуви бўлиб ўтгани ҳақида хабар қилган эдик.