JUMUROVUL MAHALLASIDA BILIMLI VA MAʼNAVIYaTLI YoShLAR KAMOL TOPMOQDA

Tobora shiddat bilan rivojlanib borayotgan dunyoda yoshlarni har xil oqim va gʻoyalardan ishonchli himoya qilishning birdan-bir vositasi – taʼlim-tarbiya ishlarini yuksak maqomda yoʻlga qoʻyish, yoshlar ongida maʼnaviy immunitetni mustahkamlash, ularning bilimli, intiluvchan shaxs sifatida shakllanishlari uchun sharoit yaratishdir. Shu bois, Prezidentimiz taraqqiyotimizning maqsadi Uchinchi Renessansni bunyod etish ekanligini taʼkidlar ekanlar, Uchinchi Renessansning asosiy bunyodkorlari – bilimli va maʼnaviyatli yoshlar ekanligiga alohida urgʻu bergan edilar.

Bu borada Amudaryo tumanidagi “Taraqqiyot koʻzgusi” gazetasi tahririyati tomonidan “Najot – taʼlimda, najot – tarbiyada, najot bilimda” shiori ostida amalga oshirilayotgan “Bilimli va maʼnaviyatli yoshlar bilan – Uchinchi Renessans sari” nomli davlat granti loyihasi doirasidagi tadbirlar ham muhim ahamiyat kasb etmoqda. Grant loyihasi doirasida yozuvchi-shoirlar bilan tajribali pedagoglar, ijodkor-yoshlarning davra suhbatlarini, “Kitobxonlik va mutolaa madaniyati”, “Kitob sayllari”, “Bilimdon yoshlar – yurt kelajagi”, “Bolalar va oʻsmirlar kitob haftaligi” kabi maʼnaviy-maʼrifiy tadbirlarni, yoshlar kitobxonligini targʻib etuvchi aktsiyalar, insholar tanlovlarini tashkil qilish, Amudaryo televideniyesi tahririyati bilan hamkorlikda “Kitobxon yoshlar” koʻrsatuvlarini suratga olish va efirga uzatish kabi ishlar rejalashtirilmoqda.

Loyiha doirasida yoshlarni mafkura maydonining har qanday xurujlaridan himoya qilish, ularning maʼnaviy dunyosini boyitish maqsadida taʼlim-tarbiya ishlari yaxshi yoʻlga qoʻyilgan namunali maktablarning tajribali pedagoglari va kitobxon yoshlari ishtirokidagi davra suhbatlari yoshlarda katta qiziqish uygʻotmoqda.

Ana shunday maʼnaviy-maʼrifiy tadbirlardan biri Amudaryo tumanidagi 45-sonli umumtaʼlim maktabida ham boʻlib oʻtdi. “Najot – taʼlimda, najot – tarbiyada, najot - bilimda” shiori ostida “Bilimli va maʼnaviyatli yoshlar bilan – Uchinchi Renessans sari” grant-loyihasi doirasida oʻtkazilgan davra suhbatida 45-sonli maktab direktori Guloyim Qalandarova, “Jayxun ilhomlari” NNT aʼzosi, taniqli shoir va yozuvchi Ahmad Nafasov, Oʻzbekiston Yozuvchilari ijodiy Uyushmasi aʼzosi, Qoraqalpogʻiston Respublikasida xizmat koʻrsatgan jurnalist, shoira Robiya Yoʻldosheva, maktabning bir guruh tajribali oʻqituvchilari va kitobsevar ijodkor yoshlar ishtirok etishdi.

Samimiy va dildan suhbat tarzidagi tadbirda Robiya Yoʻldosheva “Bilimli va maʼnaviyatli yoshlar bilan – Uchinchi Renessans sari” grant-loyihasining ish rejasini amalga oshirishdan kutilayotgan natijalar, loyiha ijodkorlari tomonidan amalga oshirilayotgan maʼnaviy-maʼrifiy tadbirlarning yoshlar taʼlim-tarbiyasida tutgan oʻrni xususida batafsil maʼlumot berdi. Shu bilan birga Jumurovul mahallasining oʻziga xos boy tarixi, bu zamindan yetishib chiqqan davlat va jamoat arboblari, tarixiy shaxslar, ayniqsa, mustaqillik yoʻlidagi kurashlarda jon fido etgan, jumurovulliklarninggina emas, butun xalqimizning faxr-u iftixoriga aylangan, oʻz davrining yetuk siyosatchisi Bobooxun (Muhammadoxun) Salimovning hayoti va faoliyati xususida keng toʻxtalib, bu boradagi Jumurovul yoshlarining fikrlari bilan ham oʻrtoqlashdi.

Davra suhbati davomida tadbir ishtirokchilari Mehnat Qahramoni Oyim Kamolova va uning izdoshlari, shuningdek, kitobxon-yoshlar, ular erishayotgan yutuqlar, kitob mutolaasining inson kamolotidagi oʻrni haqida oʻzaro fikrlashdilar.

Tadbirning sheʼrxonlik bahsini taniqli shoir va yozuvchi “Salomchi mening unvonim”, “Keldim dovonlar oshib...” kitoblarining muallifi Ahmad Nafasov boshlab berdi. Ahmad Nafasovning vatanparvarlik, insoniylik, oʻzaro mehr-oqibat, doʻstlik, tinchlik tuygʻulari madh etilgan sheʼrlarini davra suhbati ishtirokchilari olqishlar bilan kutib oldilar. Oʻz navbatida maktabning amaliyotchi-psixologi Dilfuza Utegenova, maktabning ijodkor oʻquvchilaridan Nigora Bozorboyevalar ham oʻz ijodlaridan namunalar oʻqib berishdi.

Oʻzlari tugʻilib-oʻsgan ovuldan faxrlanish, ona Vatan taraqqiyoti uchun masʼullik tuygʻusi ifoda etilgan sheʼrxonlik bahsini maktab direktori Guloyim Qalandarova oʻzi faoliyat yuritayotgan oʻquv maskanida yaratilgan shart-sharoitlar, taʼlim-tarbiya sohasiga mamlakatimizda koʻrsatilayotgan eʼtibor va gʻamxoʻrlikdan cheksiz minnatdorlik soʻzlari bilan davom ettirdi.

Haqiqatan ham tumanning eng chekka hududlaridan birida joylashgan boʻlishiga qaramay, mazkur maktabda sezilarli yutuqlarga erishilmoqda. Maktab binosi 2022-2023 oʻquv yilida toʻliq rekonstruktsiya qilinib, taʼlim-tarbiya jarayonini muvaffaqiyatli olib borish uchun barcha imkoniyatlar yaratildi. Ayni paytda oʻquv maskanida 467 nafar jumurovullik yoshlar taʼlim-tarbiya olishmoqda. Ularning fan asoslarini chuqur egallashlari uchun 53 nafar malakali pedagog xodimlar masʼul. Pedagoglarning 4 nafari oliy, 13 nafari birinchi, 28 nafari ikkinchi toifali malakaga ega oʻqituvchilardir. Oʻqituvchilarning 3 nafari xalqaro, 3 nafari milliy sertifikatga ega.

Maktabning 2022-2024 oʻquv yilidagi bitiruvchilaridan 22 nafari OTM talabalari boʻlishdi va bu boradagi koʻrsatkich 66 foizni tashkil etdi. Oʻquvchi-yoshlar orasida fanlar olimpiadasi va turli sport musobaqalari gʻoliblarining borligidan ayonki, muassasada yoshlarni maʼnaviy-maʼrifiy jihatdan tarbiyalash borasidagi ishlar Guloyim Qalandarova faxrlanib aytganicha bor, chunki maktab yashil toifadagi taʼlim muassasalari qatoridan joy olgan. Buni davra suhbati ishtirokchilarining fikr-mulohazalaridan ham yaqqol bildik.

Davra suhbati yakunida Robiya Yoʻldosheva yangi sheʼrlaridan oʻqib berdi va oʻquvchi-yoshlar bilan kitob mutolaasining foydalari yuzasidan samimiy suhbatlashdi.

Dildan, samimiy muloqot tarzida oʻtgan davra suhbatidan ishtirokchilar katta taassurotlar oldilar.

Eslatib oʻtamiz: bundan sal avval 73-sonli maktabning tajribali-oʻqituvchilari va ijodkor yoshlari bilan shoir va yozuvchilarning uchrashuvi boʻlib oʻtgani haqida xabar qilgan edik.