КОНСТИТУЦИЯ БЕРГАН БАХТ

Давлат ўқитувчиларнинг шаъни ва қадр-қимматини ҳимоя қилиш, уларнинг ижтимоий ва моддий фаровонлиги, касбий жиҳатдан ўсиши тўғрисида ғамхўрлик қилади.

Конституциянинг 52-моддасидан.

Ўқитувчи бўлишни ният қилган инсон ўз зиммасига жамият ва давлатни ривожлантиришга ҳисса қўшиш, ҳар томонлама соғлом, маънавий баркамол авлодни вояга етказиш, уларни Ватанга меҳр-муҳаббатли инсонлар қилиб тарбиялашдек юксак масъулиятни олади.

Амударё тумандаги 30-сонли мактабнинг она тили ва адабиёт фани ўқитувчиси Умидахон Раҳимбоева умумтаълим мактабини тугатиб, ўқитувчи бўлишни ният қилганида, кейинчалик Қорақалпоқ Давлат Университетининг филология ва тилларни ўқитиш факультетида таҳсил олган кезларида ҳам ўқитувчи зиммасидаги ана шу юксак масъулият залворини қайта-қайта, юрагидан ҳис этди. Умидахоннинг талабалик даври 2013-2017 йилларга, талаба-ёшлар, ҳатто профессор-ўқитувчилар учун ҳам пахта яганасига чиқиш, пахта терими-ю, адоғи кўринмайдиган турли хил шанбаликлар тарзидаги мажбурий меҳнатга жалб этиш билан боғлиқ ишлар авж олган даврга тўғри келди.

Ҳақиқатан ҳам ўша йиллари талаба-ёшлар билан ўқитувчилар жалб этилмаган соҳанинг ўзи йўқ эди. Ободонлаштириш ишлари, аҳолини рўйхатга олиш, пахта яганалаш, чопиқ қилиш, бегона ўтлардан тозалаш, чилпиш, пахта териш, турли тадбирларда зални тўлдириш, ҳатто намунали уйлар қурилишига ҳашарга чиқиш, ... каби саноғига етиб бўлмайдиган “вазифалар”ни бажаришарди ўқитувчилар.

Умидахон бундайин “вазифалар”нинг талабаликда минг машаққатини чеккани учунми, айни пайтда ўқитувчи обрўсига, шаънига ҳурматсизлик тарзидаги бу каби ҳатти-ҳаракатларга барҳам берилганидан мамнунлигини қувониб изоҳлайди:

– Ўқитувчи учун берилиб, чин дилдан ишлайдиган давр энди бошланди, – дейди у. – Янги таҳрирдаги Конституциямизда ўқитувчи мақоми тўғрисида давлат беқиёс ғамхўрлик кўрсатиши белгилаб қўйилган. Биз ўқитувчилар учун ана шу конституциявий кафолатдан ҳам юксак ғамхўрлик йўқ.

Дарвоқе, Янги таҳрирдаги Конституциямизнинг 52-моддасида ўқитувчи давлат ва жамиятни ривожлантирувчи буюк маънавият ва маърифат соҳиби сифатида эътироф этилиб, “... давлат уларнинг ижтимоий ва моддий фаровонлиги, касбий жиҳатдан ўсиши тўғрисида ғамхўрлик қилиши” белгилаб қўйилган.

Ана шу давлат ғамхўрлигидан баҳраманд фаолият юритаётган ўқитувчи ва мураббийлар ёш авлод таълим ва тарбияси соҳасида қувонарли ютуқларга эришмоқдалар. Ўзининг педагогик фаолиятини бошлаганига энди 6 йил бўлган У.Раҳимбоева эришаётган ютуқлар, у амалга ошираётган ибратли ишлар ҳам ана шу ғамхўрликнинг самарасидир. Илк фаолиятини 2017 йилдан 30-сонли мактабда она тили ва адабиёт фани ўқитувчиси сифатида ишлашдан бошлаган Умидахон  ўзининг изланувчанлиги, ташаббускор ва билимдонлиги билан касбдошларининг ҳурмат-эътиборини қозонди. 2020 йилда у Халқаро тадқиқотларга тайёргарлик кўриш “Ўқиш саводхонлиги” йўналиши тренери, 2021 йилдан эса она тили ва адабиёт фани бўйича тренер-ўқитувчи мақомига эга бўлди. Шунингдек, 2022 йилда “Энг яхши она тили ва адабиёт фани ўқитувчиси” кўрик-танловининг туман ва ҳудудий босқичлари ғолиби, “Ёш китобхон” танловининг энг ташаббускор, фаол иштирокчиси бўлди. Ўша йили “Ўзбек тилим – ифтихорим” эсселар танловида ўқувчиси, “Маънавиятли жамият – Учинчи Ренессанс пойдевори” эсселар танловида Умидахоннинг ўзи туман ва ҳудудий босқичлар ғолиблигини қўлга киритди. 2023 йил ҳам Умидага ўз билим ва салоҳиятини намойиш этиш учун имкониятлар йили бўлди. Ташаббускор ва изланувчан  педагог Халқ таълими вазири жамғармаси мукофоти соҳибаси бўлди. Ўзбекистон миллий тикланиш демократик партияси марказий Кенгаши томонидан ташкиллаштирилган “Нодираи давронлар” кўрик-танловининг ҳудудий босқичида 2-ўринни эгаллади.

Умидахон, ўқитувчининг жамиятдаги мақоми юксак тутилиб, қадр-қиммати, обрў-эътибори ошиши, аввало унинг намунали меҳнат фаолиятининг маҳсули эканлигини чуқур англагани учун ҳам қисқа вақт ичида эл аро ҳурмат, эътибор топди, моҳир педагог сифатида шаклланди. Буларнинг барчаси Умидахон Раҳимбоевага Конституция берган имконият. Зеро, ўқитувчи учун эмин-эркин, ўқувчилари даврасида ўзининг севимли касбий фаолияти билан шуғулланишдан ҳам улуғроқ бахт йўқ.

Робия ЙЎЛДОШЕВА.