Хизр эли маҳалласининг ҳоким ёрдамчиси аҳолининг яқин кўмакчисига айланмоқда

Ўзбекистон  Республикаси Президентининг 2021 йил 3 декабрь кунги “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида”ги Қарори қабул қилинган эди.

Қарорга мувофиқ маҳаллаларда иш бошлаган  ҳоким ёрдамчилари  ҳудудлардаги  ишсиз аҳолини иш билан таъминлаб,  уларга доимий даромад манбаини яратишга кўмаклашишмоқда. Маҳалладаги муваффақиятга эришган тадбиркорлик субъектларининг иш фаолиятини ўрнак қилиб кўрсатиш орқали барчани тадбиркорлик фаолиятига жалб қилишга ҳаракат қилишмоқда, ўзлари хизмат олиб бораётган овул ва маҳаллаларда ҳар бир хонадонга ташриф буюриб, мавжуд ҳолатни ўрганган ҳолда аҳолига амалга оширилаётган давлат сиёсати ва ислоҳотларнинг мазмун-моҳиятини тушунтириб, аниқланган муаммоларни жойида ҳал қилиш чораларини кўришмоқда.

Туманнинг Хизр эли маҳалласида фаолият олиб бораётган ҳоким ёрдамчиси Анвар Тожибоев 2023 йил бошида   маҳалла ҳудудидаги мавжуд  4126та хонадонларни тўлиқ хатловдан ўтказди.  Натижаларга кўра, хонадонлар  3та тоифага ажратиб олинди. Шундан, биринчи тоифага  265та, иккинчи тоифага 387та, учинчи тоифага  246та  хонадонлар киритилди.

Хатлов ўтказилган хонадонларда 161 нафар меҳнатга лаёқатли, ишсизлар аниқланиб, имтиёзли кредитлар ҳамда субсидиялар ажратиш орқали уларнинг бандлиги таъминланди.

Анвар Тожибоев маҳаллада тадбиркорлик қилиш истагида бўлган фуқаролар рўйхатини шакллантириб, уларга фаолият бошлашлари учун кўмаклашиш,  эскирган электр симёғочларини янгисига алмаштириш, кўчаларга  тупроқ-шағал ётқизиш, ҳунармандчилик ва томорқачиликни ривожлантириш, янги иш ўринлари яратиш каби йўналишларда режа асосида иш олиб бормоқда.

Маҳаллада турли йўналишларда тадбиркорлик қилиш учун шароит етарли. Жумладан, иссиқхона қуриш, чорвачилик, паррандачилик, асаларичилик, тадбиркорлик ва ҳунармандчилик билан шуғулланиш истагини билдирганлар эса талайгина. Ҳоким ёрдамчиси улар билан суҳбатлашиб, муаммоларини ўрганиш натижасида 274 нафар фуқарони домий иш билан таъминлаб, 163 нафар фуқароларга оилавий тадбиркорликни ривожлантириш дастури доирасида имтиёзли кредитлар ажратилишига ҳамда 70 нафар фуқарога “e-auksion” савдо платформаси орқали ер майдонлари ажратилишига  амалий ёрдам берди.

Шунингдек, ҳоким ёрдамчиси кўмагида маҳалладаги 166 нафар  ишсиз фуқарога субсидия асосида асбоб-ускуналар ажратилиб, бандлиги таъминланди,  76 нафар фуқарога эса 6 млрд. сўмлик кредитлар ажратилди. Албатта, бундан мақсад маҳаллада  ишсизликни камайтириш, фуқароларни томорқачилик, тадбиркорликка жалб қилиш ва ишлаб чиқариш соҳаларини, қолаверса, оилавий тадбикорликни ривожлантириш орқали уларнинг доимий  даромад манбаига эга бўлишига эришишдир.

Энг муҳими, ҳозирда бу фуқаролар  ўзларининг фаолиятларини йўлга қўйиб олишди. Кимдир ўз томорқасида асаларичилик, чорвачилик ва паррандачилик билан,  яна кимдир ҳунармандчилик билан шуғулланмоқда.

Аҳоли турмуш фаровонлигини оширишнинг муҳим шарти – бандликдир. Шу маънода олиб қарайдиган бўлсак, Хизр эли маҳалласида тадбиркорликни ривожлантириш, камбағалликни қисқартириш ва аҳоли бандлигини таъминлаш бўйича ҳоким ёрдамчиси Анвар Тожибоевнинг олиб бораётган саъй-ҳаракатлари ҳам келгусида ўзининг ижобий натижаларини беради, албатта.

Севара ИСМОИЛОВА.