“Ҳокимлик соати”да аҳоли мурожаатлари билан ишлашиш масаласига эътибор қаратилди
Ҳуқуқий демократик давлат ва кучли фуқаролик жамияти қуриш йўлида давлат хизматчиларининг ҳуқуқий саводхонлигини ошириш, уларнинг қонунчиликдаги янгиликлардан хабардорлигини таъминлаш бугунги куннинг энг муҳим талаблари сирасига киради. Маҳаллий ижро этувчи ҳокимият органларида фаолият юритаётган ходимларнинг аҳоли билан бевосита мулоқот қилиши, уларнинг муаммоларини қонуний ҳал этиши айнан мана шундай ҳуқуқий билим ва амалий кўникмаларга бевосита боғлиқдир.
Шу мақсадда, жойларда мунтазам равишда турли ўқув-семинарлари ҳамда ҳуқуқий тушунтириш ишлари олиб борилмоқда. Ана шундай муҳим ва аҳамиятли тадбирларнинг навбатдагиси Амударё тумани ҳокимлигида бўлиб ўтди.
Туман Адлия бўлими томонидан ўтказилган “Ҳокимлик соати” тадбири давлат хизматчиларининг касбий малакасини ошириш, қонунчилик ҳужжатларининг мазмун-моҳиятини тушунтириш ҳамда аҳоли мурожаатлари билан ишлаш тизимини янада такомиллаштириш мақсадида ташкил қилинди.
Тадбир кун тартибидаги энг асосий масала – бу бугунги кунда давлат ва жамият ўртасидаги ўзаро мулоқотнинг асосий кўприги вазифасини ўтовчи мурожаатлар институти бўлди. Иштирокчиларга “Жисмоний ва юридик шахсларнинг мурожаатлари тўғрисида”ги Қонуннинг ҳамда ушбу соҳага оид бошқа муҳим қонунчилик ҳужжатларининг мазмун-моҳияти ва амалий аҳамияти тушунтирилди.
Маълумки, фуқароларнинг мурожаатлари билан ишлаш масъул ходимдан юксак масъулият, эътибор ва қонунларга қатъий итоат этишни талаб қилади. Шу боис, семинар давомида мурожаатларни кўриб чиқиш тартиби, муддатлари ва уларни қонуний ҳал этишнинг ўзига хос жиҳатлари бўйича батафсил маълумотлар берилди. Шунингдек, мурожаатларни кўриб чиқиш тартибини бузиш, фуқароларнинг ҳақли эътирозларига сабаб бўлувчи сансоларлик ҳолатларига йўл қўйиш қандай ҳуқуқий оқибатларга олиб келиши ҳақида алоҳида тўхталиб ўтилди.
“Ҳокимлик соати” доирасида фақатгина ҳуқуқий масалалар билан чекланиб қолинмади. Бугунги кунда долзарб бўлиб турган экологик ҳолат, атроф-муҳит озодалиги ва ҳудудларни ободонлаштириш масалаларига ҳам алоҳида эътибор қаратилди. Биламизки, экологик тозаликни сақлаш жамиятнинг фаол аъзоси, айниқса, раҳбар ходимларнинг энг асосий бурчлари қаторида туради. Хусусан, тадбир иштирокчиларига маҳаллалар ва кўчаларни чиқиндилардан тозалаш, ҳудудларда санитария-гигиена қоидаларига риоя этишни таъминлаш ҳамда кенг кўламли ободонлаштириш ишларини ташкил этиш бўйича зарур тушунтиришлар ва кўрсатмалар берилди.
Қизғин ва очиқ мулоқот руҳида ўтган тадбир якунида кун тартибидаги барча масалалар юзасидан ўзаро фикр алмашилди. Давлат органлари ва ташкилотлари ходимлари ўзларини қизиқтирган саволларга мутахассислар томонидан аниқ ва қонунчиликка асосланган ҳолда батафсил жавоблар олдилар.
Бундай форматдаги очиқ мулоқотлар ходимларнинг ҳуқуқий билимларини мустаҳкамлаш билан бирга, уларнинг кундалик иш фаолиятида дуч келадиган турли муаммоли вазиятларни қонуний ва адолатли ҳал этишлари учун мустаҳкам пойдевор бўлиб хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
