Xizr eli mahallasining hokim yordamchisi aholining yaqin koʻmakchisiga aylanmoqda

Oʻzbekiston  Respublikasi Prezidentining 2021-yil 3-dekabr kungi “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi Qarori qabul qilingan edi.

Qarorga muvofiq mahallalarda ish boshlagan  hokim yordamchilari  hududlardagi  ishsiz aholini ish bilan taʼminlab,  ularga doimiy daromad manbaini yaratishga koʻmaklashishmoqda. Mahalladagi muvaffaqiyatga erishgan tadbirkorlik subʼektlarining ish faoliyatini oʻrnak qilib koʻrsatish orqali barchani tadbirkorlik faoliyatiga jalb qilishga harakat qilishmoqda, oʻzlari xizmat olib borayotgan ovul va mahallalarda har bir xonadonga tashrif buyurib, mavjud holatni oʻrgangan holda aholiga amalga oshirilayotgan davlat siyosati va islohotlarning mazmun-mohiyatini tushuntirib, aniqlangan muammolarni joyida hal qilish choralarini koʻrishmoqda.

Tumanning Xizr eli mahallasida faoliyat olib borayotgan hokim yordamchisi Anvar Tojiboyev 2023-yil boshida   mahalla hududidagi mavjud  4126ta xonadonlarni toʻliq xatlovdan oʻtkazdi.  Natijalarga koʻra, xonadonlar  3ta toifaga ajratib olindi. Shundan, birinchi toifaga  265ta, ikkinchi toifaga 387ta, uchinchi toifaga  246ta  xonadonlar kiritildi.

Xatlov oʻtkazilgan xonadonlarda 161 nafar mehnatga layoqatli, ishsizlar aniqlanib, imtiyozli kreditlar hamda subsidiyalar ajratish orqali ularning bandligi taʼminlandi.

Anvar Tojiboyev mahallada tadbirkorlik qilish istagida boʻlgan fuqarolar roʻyxatini shakllantirib, ularga faoliyat boshlashlari uchun koʻmaklashish,  eskirgan elektr simyogʻochlarini yangisiga almashtirish, koʻchalarga  tuproq-shagʻal yotqizish, hunarmandchilik va tomorqachilikni rivojlantirish, yangi ish oʻrinlari yaratish kabi yoʻnalishlarda reja asosida ish olib bormoqda.

Mahallada turli yoʻnalishlarda tadbirkorlik qilish uchun sharoit yetarli. Jumladan, issiqxona qurish, chorvachilik, parrandachilik, asalarichilik, tadbirkorlik va hunarmandchilik bilan shugʻullanish istagini bildirganlar esa talaygina. Hokim yordamchisi ular bilan suhbatlashib, muammolarini oʻrganish natijasida 274 nafar fuqaroni domiy ish bilan taʼminlab, 163 nafar fuqarolarga oilaviy tadbirkorlikni rivojlantirish dasturi doirasida imtiyozli kreditlar ajratilishiga hamda 70 nafar fuqaroga “e-auksion” savdo platformasi orqali yer maydonlari ajratilishiga  amaliy yordam berdi.

Shuningdek, hokim yordamchisi koʻmagida mahalladagi 166 nafar  ishsiz fuqaroga subsidiya asosida asbob-uskunalar ajratilib, bandligi taʼminlandi,  76 nafar fuqaroga esa 6 mlrd. soʻmlik kreditlar ajratildi. Albatta, bundan maqsad mahallada  ishsizlikni kamaytirish, fuqarolarni tomorqachilik, tadbirkorlikka jalb qilish va ishlab chiqarish sohalarini, qolaversa, oilaviy tadbikorlikni rivojlantirish orqali ularning doimiy  daromad manbaiga ega boʻlishiga erishishdir.

Eng muhimi, hozirda bu fuqarolar  oʻzlarining faoliyatlarini yoʻlga qoʻyib olishdi. Kimdir oʻz tomorqasida asalarichilik, chorvachilik va parrandachilik bilan,  yana kimdir hunarmandchilik bilan shugʻullanmoqda.

Aholi turmush farovonligini oshirishning muhim sharti – bandlikdir. Shu maʼnoda olib qaraydigan boʻlsak, Xizr eli mahallasida tadbirkorlikni rivojlantirish, kambagʻallikni qisqartirish va aholi bandligini taʼminlash boʻyicha hokim yordamchisi Anvar Tojiboyevning olib borayotgan saʼy-harakatlari ham kelgusida oʻzining ijobiy natijalarini beradi, albatta.

Sevara ISMOILOVA.