Xizr eli mahallasi: ijtimoiy himoya — inson qadrini yuksaltirishga xizmat qilmoqda

Yurtimizda ehtiyojmand oilalar, nogironligi boʻlgan shaxslar va ogʻir hayotiy vaziyatga tushib qolgan fuqarolarni har tomonlama qoʻllab-quvvatlash maqsadida keng koʻlamli islohotlar amalga oshirilmoqda. Ayniqsa, aholi bilan doimiy muloqot oʻrnatish, ularni qiynayotgan muammolarni joyida oʻrganish va hal etishning yangi, samarali mexanizmlari joriy etilib, bugun kundalik hayotimizda oʻz natijasini bermoqda. Bu boradagi tizimli ishlarning yorqin ifodasini Amudaryo tumani markazidan 12 kilometr uzoqlikda joylashgan Xizr eli mahalla fuqarolar yigʻini misolida ham yaqqol koʻrish mumkin.

Mazkur mahallada bugungi kunda jami 3946 nafar aholi istiqomat qiladi. Hududdagi 101 ta oila ijtimoiy reyestr roʻyxatiga kiritilgan boʻlib, ular davlatning doimiy eʼtibori va gʻamxoʻrligi ostidadir. Shuningdek, mahallada 112 nafar nogironligi boʻlgan shaxslar roʻyxatga olingan. Ularning tarkibiga nazar tashlaydigan boʻlsak, 1-guruh nogironlari 17 nafarni, 2-guruh 65 nafarni, 3-guruh esa 8 nafarni tashkil etadi. Bundan tashqari, 6 yoshgacha boʻlgan bolalar 12 nafar hamda 7-17 yoshdagilar ham 12 nafardan iborat. Prezidentimiz tashabbusi bilan mahallalarda joriy etilgan yangi tizim asosida bu yerda ijtimoiy xodim Sohiba Sobirova faoliyat olib bormoqda va ijtimoiy xizmatlarning bevosita aholi xonadonlarigacha kirib borishini taʼminlamoqda.

Ijtimoiy xodim tomonidan mahalladagi ehtiyojmand fuqarolarning toʻliq va aniq bazasini shakllantirish maqsadida keng qamrovli xatlov jarayonlari oʻtkazildi. Xususan, 12 ta toifa boʻyicha aholining yashash sharoitlari oʻrganilib, ularning dardu tashvishlariga quloq tutildi. Amaliy yordam koʻrsatish maqsadida joriy yilning oʻtgan davri mobaynida ijtimoiy himoyaga muhtoj, ishsiz hamda nogironligi boʻlgan shaxslarni parvarishlayotgan ota-onalarning bandligini taʼminlash masalasiga jiddiy eʼtibor qaratildi va 10 nafar fuqaro bilan bu borada tegishli amaliy ishlar olib borildi. Qolaversa, 80 yoshga toʻlgan keksa nuroniylar hamda 1-guruh nogironligi boʻlgan shaxslarga qarab turish holatlari oʻrganilib, qonuniy asosda dalolatnomalar rasmiylashtirildi.

Ijtimoiy koʻmak faqatgina hujjatlashtirish bilan cheklanib qolmay, balki real hayotiy yordamlar ham koʻrsatilmoqda. Jumladan, ehtiyojmand 2 nafar nogironligi boʻlgan fuqaroga maxsus protez-ortopediya moslamalari bepul yetkazib berildi. Joriy yilda muborak Ramazon oyi munosabati bilan ijtimoiy reyestrda turuvchi, davlat taʼminotidagi oilalarga bir martalik moddiy yordam pullari ajratilib, ularning xonadonlariga bayramona quvonch olib kirildi.

Bunday ezgu ishlarning natijasini insonlar taqdirida sodir boʻlayotgan ijobiy oʻzgarishlarda yaqqol koʻrish mumkin. Masalan, Xizr eli mahallasida yashovchi, 2-guruh nogironligi boʻlgan Zafar Tajiboyevning koʻzi homiylar jalb etilgan holda muvaffaqiyatli operatsiya qilinib, uning salomatligini tiklashga katta hissa qoʻshildi. Shuningdek, mahallada yakka-yolgʻiz yashovchi Aqilajon opa Eshniyozova holidan ham doimiy xabar olinib, unga oʻz vaqtida zarur ijtimoiy yordamlar koʻrsatib kelinmoqda. Yana bir fuqaro, 2-guruh nogironligi boʻlgan Komila Xamidova ham eʼtibordan chetda qolmagan boʻlib, unga homiylar va ijtimoiy xizmatlar tomonidan muntazam ravishda kerakli koʻmaklar berib kelinmoqda.

Xulosa oʻrnida shuni taʼkidlash lozimki, fuqarolarning dardiga sherik boʻlish, ularga eʼtibor va mehr koʻrsatish insonparvarlikning eng yuqori choʻqqisidir. Olib borilayotgan bu kabi saʼy-harakatlar ogʻir vaziyatdagi fuqarolarning jamiyatga tezroq moslashuviga va ertangi kunga boʻlgan ishonchining ortishiga xizmat qilmoqda. Davlat tomonidan yaratilayotgan bunday imkoniyatlar va tizimli gʻamxoʻrlik yurtimizda hech bir inson eʼtibordan chetda emasligini, har bir fuqaro jamiyatda oʻzining munosib oʻrnini topib, farovon hayot kechirishi uchun barcha shart-sharoitlar yaratilayotganini amalda isbotlamoqda.