ЭЛГА ЯРАШГАН ЭЗГУ АНЪАНА

Халқимиз азал-азалдан байрамларни, қутлуғ кунларни ўзгача тайёргарлик билан қаршилайди. Аввало, кўча ва гузарларни, хонадон ва ҳовлиларни тартибга келтириб, тозалик ва орасталикни бош масала қилиб белгилайди. Кун сайин яқинлашаётган улуғ айём – Наврўзи олам арафасида халқимизнинг ана шу эзгу анъанаси умумхалқ хашари кўринишида бутун Республикамиз бўйлаб уюшқоқлик билан ўтказилди.

Халқимизнинг асрлар оша ҳаётидан теран жой эгаллаган ва бизгача етиб келган урф-одатлари, анъаналари ва қадриятларини ўзида жамлаган асл миллий байрамимиз – Наврўзи оламни муносиб нишонлашга ҳозирлик қизғин паллага кирган 14-15 март кунлари бутун мамлакатимизда бўлгани каби туманимизда ҳам умумхалқ ҳайрия хашари ўтказилди.

Ҳашар – элга ярашар, -дейди халқимиз. Чиндан-да меҳнат жамоалари, умумтаълим мактаблари, ўрта махсус касб-ҳунартаълими ўқувчилари, ўқитувчилари, вақтинча ишсиз, меҳнатга яроқли фуқароларнинг ҳашар давомида оғзибирчиликда қилган меҳнатлари туфайли чор-атрофимиз ўзгача чирой касб этди. Хусусан, ҳашар кунларида ўнлаб километр ариқ ва зовурлар тозаланди, чиқиндилар ташкилий равишда чиқариб ташланди. Минглаб туп мевали ва манзарали дарахтлар, гул кўчатлари экилди. Дарахтларга шакл берилди.

Маълумки, жорий йилнинг март ва апрел ойлари Ободонлаштириш ва кўкаламзорлаштириш ойлиги деб белгиланган эди. туман ҳокимлигининг ушбу фармойишни қабул қилишдан мақсад овул ва маҳаллалар ҳудудларини, аҳоли турар жойларини ободонлаштириш ва кўкаламзорлаштириш, санитария-эпидемиология ҳолатини яхшилашдан иборатдир. Бугун ҳар бир овул ва маҳаллада оммавий равишда гул кўчатлари, мевали ва манзарали дарахтлар экиш учун ерларни тайёрлаш, бўш ҳудудларда боғлар барпо этиш, дарахтларни буташ ва оқлаш, кўчалар ҳамда йўлакларни тартибга келтириш каби ишларга уюшқоқлик билан киришилмоқда.

Муҳими, хашар кунлари жойларда нафақат ободонлаштириш ишлари амалга оширилди, балки турли мутасадди ташкилотларда меҳнат қилаётган ходимларнинг бир кунлик иш ҳақи миқдоридаги маблағлар Ўзбекистон "Маҳалла” хайрия жамоат фондининг республика бошқаруви ҳамда унинг ҳудудий бўлинмасининг банкдаги ҳисоб-рақамларига ўтказилади. Бу маблағлар эса аҳолининг эҳтиёжманд қатламига, ёлғиз қариялар, ногирон ва муҳтожлар ҳолидан хабар олиш, кам таъминланган, кўп болали, боқувчисини йўқотган оилаларга моддий ва маънавий жиҳатдан кўмак бериш, ижтимоий ёрдам кўрсатишдек хайрли амалларга сарфланиши кўзда тутилган.

Жойларда ободонлаштириш ишлари билан бир қаторда, асосий эътибор, «Кексаларни эъзозлаш йили» Давлат дастури тадбирлари ижросини таъминлашга қаратилди. Умумхалқ хайрия ҳашари кунларида маҳаллаларда истиқомат қилаётган нуронийларнинг ҳолидан хабар олиниб, ёшлар уларнинг уй ишларига ёрдамлашдилар ва дуоларини олдилар.

Қадамжолар, зиёратгоҳлар, қабристонларни тартибга келтирилиб, тозалаш ишлари олиб борилди.

Юртдошларимизнинг ҳашар кунларида бир оила фарзандларидай бўлиб, ҳамжиҳатликда қилган меҳнатлари туфайли умумий уйимиз - юртимиз ўзгача чирой касб этди, ҳашар байрам тусини олди.

Ғ.Ешниёзов