ELGA YaRAShGAN EZGU ANʼANA

Xalqimiz azal-azaldan bayramlarni, qutlugʻ kunlarni oʻzgacha tayyorgarlik bilan qarshilaydi. Avvalo, koʻcha va guzarlarni, xonadon va hovlilarni tartibga keltirib, tozalik va orastalikni bosh masala qilib belgilaydi. Kun sayin yaqinlashayotgan ulugʻ ayyom – Navroʻzi olam arafasida xalqimizning ana shu ezgu anʼanasi umumxalq xashari koʻrinishida butun Respublikamiz boʻylab uyushqoqlik bilan oʻtkazildi.

Xalqimizning asrlar osha hayotidan teran joy egallagan va bizgacha yetib kelgan urf-odatlari, anʼanalari va qadriyatlarini oʻzida jamlagan asl milliy bayramimiz – Navroʻzi olamni munosib nishonlashga hozirlik qizgʻin pallaga kirgan 14-15-mart kunlari butun mamlakatimizda boʻlgani kabi tumanimizda ham umumxalq hayriya xashari oʻtkazildi.

Hashar – elga yarashar, -deydi xalqimiz. Chindan-da mehnat jamoalari, umumtaʼlim maktablari, oʻrta maxsus kasb-hunartaʼlimi oʻquvchilari, oʻqituvchilari, vaqtincha ishsiz, mehnatga yaroqli fuqarolarning hashar davomida ogʻzibirchilikda qilgan mehnatlari tufayli chor-atrofimiz oʻzgacha chiroy kasb etdi. Xususan, hashar kunlarida oʻnlab kilometr ariq va zovurlar tozalandi, chiqindilar tashkiliy ravishda chiqarib tashlandi. Minglab tup mevali va manzarali daraxtlar, gul koʻchatlari ekildi. Daraxtlarga shakl berildi.

Maʼlumki, joriy yilning mart va aprel oylari Obodonlashtirish va koʻkalamzorlashtirish oyligi deb belgilangan edi. tuman hokimligining ushbu farmoyishni qabul qilishdan maqsad ovul va mahallalar hududlarini, aholi turar joylarini obodonlashtirish va koʻkalamzorlashtirish, sanitariya-epidemiologiya holatini yaxshilashdan iboratdir. Bugun har bir ovul va mahallada ommaviy ravishda gul koʻchatlari, mevali va manzarali daraxtlar ekish uchun yerlarni tayyorlash, boʻsh hududlarda bogʻlar barpo etish, daraxtlarni butash va oqlash, koʻchalar hamda yoʻlaklarni tartibga keltirish kabi ishlarga uyushqoqlik bilan kirishilmoqda.

Muhimi, xashar kunlari joylarda nafaqat obodonlashtirish ishlari amalga oshirildi, balki turli mutasaddi tashkilotlarda mehnat qilayotgan xodimlarning bir kunlik ish haqi miqdoridagi mablagʻlar Oʻzbekiston "Mahalla” xayriya jamoat fondining respublika boshqaruvi hamda uning hududiy boʻlinmasining bankdagi hisob-raqamlariga oʻtkaziladi. Bu mablagʻlar esa aholining ehtiyojmand qatlamiga, yolgʻiz qariyalar, nogiron va muhtojlar holidan xabar olish, kam taʼminlangan, koʻp bolali, boquvchisini yoʻqotgan oilalarga moddiy va maʼnaviy jihatdan koʻmak berish, ijtimoiy yordam koʻrsatishdek xayrli amallarga sarflanishi koʻzda tutilgan.

Joylarda obodonlashtirish ishlari bilan bir qatorda, asosiy eʼtibor, «Keksalarni eʼzozlash yili» Davlat dasturi tadbirlari ijrosini taʼminlashga qaratildi. Umumxalq xayriya hashari kunlarida mahallalarda istiqomat qilayotgan nuroniylarning holidan xabar olinib, yoshlar ularning uy ishlariga yordamlashdilar va duolarini oldilar.

Qadamjolar, ziyoratgohlar, qabristonlarni tartibga keltirilib, tozalash ishlari olib borildi.

Yurtdoshlarimizning hashar kunlarida bir oila farzandlariday boʻlib, hamjihatlikda qilgan mehnatlari tufayli umumiy uyimiz - yurtimiz oʻzgacha chiroy kasb etdi, hashar bayram tusini oldi.

Gʻ.Yeshniyozov