КАМТАРЛИКДАН КАМОЛ ТОПГАН АЁЛ

Аёл – сирли хилқат! Унинг нозиккина жуссасида бир олам қудрат, сабр-бардош, уммондек поёнсиз меҳр-муҳаббат яширин. Оиладаги муҳит, фарзандлар тарбияси аёлнинг салоҳиятига, фидойилигига боғлиқ. Шунингдек, жамиятимизда аёллар меҳнат қилмайдиган бирор соҳа йўқ. Улар юртимиз равнақига ҳам муносиб ҳисса қўшадилар.

Манғит шаҳрининг Янгиобод маҳалласида истиқомат қилувчи Раъно опа Йўлдошева ҳам бекалик, ҳам оналик бурчини адо этиш баробарида умр бўйи турли масъул лавозимларда ишлаб, эл меҳрини, эътиборини қозонганларнинг бири.

Опа  илм-маърифатли инсон, ҳаёти давомида масъул лавозимларда ишлаб, туманимиз тарихида муносиб из қолдирган Йўлдош Бобониёзов ва Шалман Бобониёзовалар оиласида 1949 йилда тўртинчи фарзанд бўлиб дунёга келди. Ўрта мактабни тугатгач, ўзидан катта акаси, опалари каби илм олишга интилди. Бироқ у туғишганлари каби ўқитувчиликка эмас, пиллачилик соҳасига қизиқди. Шу боис, Самарқанд давлат қишлоқ хўжалиги институтига ўқишга кириб, олим-агроном мутахассислигига эга бўлди.

Раъно Йўлдошева 1971-1973 йилларда туманимизнинг Қангли хўжалигида ипакчилик агрономи, 1973-1979 йилларда Манғит бош пиллахонаси мутахассиси, 1979-1986 йилларда туман партия қўмитаси йўриқчиси, 1986-1988 йилларда Дўстлик хўжалиги партия қўмитаси котиби, 1988-1992 йилларда туман партия қўмитасининг мафкура бўйича котиби, 1992-1999 йилларда туман Меҳнат биржаси директори, 1999-2003 йилларда “Манғит пилла” очиқ акциядорлик жамияти раиси бўлиб ишлади. 2003 йилдан бери эса нафақада, турмуш ўртоғи, бир умр туман Сув қурилиши бошқармасида масъул лавозимларда ишлаган Жуманиёз Шомуродов билан бирга бунёд этган мўъжаз ва аҳил оиласида неваралар тарбияси билан банд.

Яратганнинг уларга берган энг улуғ инъоми – уч ўғил, икки қизни тарбиялаб вояга етказиш, оилада бекалик бурчини адо этиш, рўзғор ташвишлари билан бир қаторда бир умр масъул раҳбарлик лавозимларида ишлашни опа қандай уддалади, менга қоронғу.

Бироқ шу нарсани аниқ айта оламан: у мансабдорман, деб кибрга берилмади, хизмат машинасида бораётириб ҳам йўлида учраганга салом беришни канда қилмади, катта-ю кичикни бирдай ҳурмат қилди, қабулига муаммоларини айтиб келган одамни ноумид қайтармади.

Камтарга камол, дейди доно халқимиз. Эҳтимол, Раъно Йўлдошева ҳам камтарлиги, юртдошларимизга жонкуярлиги, ҳалол меҳнатлари туфайли бугунгидай бахтиёр аёл, элда эъзозли нуроний онахонга айлангандир? Олий маълумотли мутахассислар бўлиб етишиб, турли соҳаларда ота-онаси каби фидойилик билан меҳнат қилаётган Рашиджон, Нигора, Расулжон, Моҳира, Раҳмонжонларнинг камолига қувониб, омонлигини тилаб ўтирган опанинг тилидан шукрона тушмайди. Ўзбек аёлининг матонати, ақл-идроки, салоҳияти, одамгарчилиги, камтарлиги шу кичкина жуссасига жо бўлган Р.Йўлдошеванинг меҳнатлари ҳам қадрланиб, муносиб эътироф этилган: у 2001 йилда “Ўзбекистон Республикаси Мустақиллигининг 10 йиллиги” кўкрак нишони, шу йилда “Қорақалпоғистонда хизмат кўрсатган пиллачи” Фахрий унвони соҳибаси бўлди.

Опанинг ҳаётида жорий йилнинг 19 августида яна бир қувончли воқеа бўлди.  У биринчи даражали “Меҳнат фахрийси” кўкрак нишони билан тақдирланди. Бу унинг узоқ йиллар давомидаги самарали меҳнатларига берилган баҳодир.

Опани меҳнатларининг эътирофи билан қутлаб, узоқ умр, сиҳат-саломатлик тилаб қоламиз.

Ойгул РАЖАБОВА.