САЛОҲИЯТЛИ ЁШЛАР КАМОЛ ТОПАЁТГАН ДАРГОҲ

Бугунги кунда таълим тизимида амалга оширилаётган ислоҳотлар ҳар бир мактаб фаолиятида ўз ифодасини топмоқда. Замонавий билим бериш, ёш авлодни маънавий ва жисмоний баркамол этиб тарбиялаш, уларни замон талабларига мос кадрлар сифатида шакллантириш — бугунги куннинг устувор вазифаларидандир. Амударё туманидаги 19-сонли мактаб жамоаси ҳам ана шу миссияни шараф билан адо этиб келмоқда.

Мазкур мактабнинг ҳозирги биноси 1970 йилда қурила бошлаган бўлиб, 1971 йилда 400 ўринга мўлжаллаб фойдаланишга топширилган. Бугунги кунда эса бу ерда 780 нафар ўқувчи таълим-тарбия олмоқда. Таълим жараёнига 65 нафар педагог жалб этилгани мактаб жамоасининг салоҳияти юқори эканини кўрсатади.

Педагоглар таркиби сифат жиҳатидан ҳам диққатга сазовор: 10 нафар олий тоифали, 21 нафар 1-тоифали, 14 нафар 2-тоифали ҳамда 23 нафар мутахассис ўқитувчилар фаолият юритмоқда. Шунингдек, 10 нафар ўқитувчи миллий ва халқаро сертификатларга эга. Инглиз тили фани ўқитувчиси Аяпберган Қудайбергеновнинг Мактабгача ва мактаб таълими вазири жамғармаси ҳисобидан иш ҳақига 70 фоиз устама олаётгани эса юқори малака ва самарали меҳнатнинг муносиб баҳоланаётганидан далолат беради. Мактаб ўқувчиларидан 12 нафарида миллий сертификатлар мавжудлиги таълим сифати натижаларда ўз аксини топаётганини кўрсатади.

Ҳар қандай ютуқ замирида мустаҳкам бошқарув ва тизимли меҳнат фаолияти ётади. Мактаб раҳбарияти деярли ҳар уни эрталаб директор ҳузурида йиғилиб, кун тартибидаги масалаларни муҳокама қилади. Мактаб директори Нодира Тажимуратова ҳафта давомидаги ютуқ ва камчиликларни таҳлил қилиб, навбатдаги вазифалар юзасидан аниқ режалар белгилаб олади ва тегишли масъулларга топшириқлар беради.

Мактаб жамоасининг илмий йўналишдаги ютуқлари ниҳоятда салмоқли. Мактаб ўқувчиси Жаҳонгир Саъдуллаев фан олимпиадасида туманда фахрли 1-ўринни эгаллади. Жорий йилда Марказий Осиё давлатлари ўртасида ўтказилган Архимед халқаро олимпиадасида 6-синф ўқувчиси Бунёдбек Гулмирзаев саралаш босқичида олтин, финалда эса кумуш медални қўлга киритди. У бошқа халқаро олимпиадаларда ҳам юқори натижаларга эришиб келмоқда. Ёш математикнинг муваффақиятларида устози, тажрибали математика фани ўқитувчиси Зулфия Маткаримованинг меҳнати беқиёсдир.

Ўқувчилар нафақат таълимда, балки маҳаллий ва халқаро миқёсдаги спорт мусобақаларида ҳам муносиб иштирок этмоқда. Жумладан, 2025 йил октябрь ойида спортнинг тайквандо йўналишида 11-синф ўқувчиси Гулбону Ўринбоева Ўзбекистон чемпиони бўлди. Бу натижа мактабда жисмоний тарбия ва спортга берилаётган эътибор самарасидир.

Таълим масканида ўқувчиларга фақат билим бериш билан чекланилмасдан, касбга йўналтириш ишларига ҳам алоҳида эътибор қаратилади. Қорақалпоғистон Республикаси Мактабгача ва мактаб таълими вазирлигининг 2025 йил 1 июлдаги 220-сонли буйруғи ижросини таъминлаш мақсадида мактабда касбий ривожлантириш соатлари сифатли ташкил этилган. Бу соатларни инглиз тили фани ўқитувчиси Аяпберган Қудайбергенов олиб бориб, ўқувчиларга чуқур билим беришга ва уларни келажак учун фойдали бўлган касбларга йўналтиришга алоҳида эътибор қаратмоқда.

Мактабда фан ва касб тўгараклари ҳам самарали йўлга қўйилган. Технология фани ўқитувчиси Сапарбой Тангирбергенов раҳбарлигидаги “Моҳир қўллар” тўгарагида ўқувчи қизлар бичиш-тикиш ва мунчоқ тикиш бўйича амалий кўникмаларга эга бўлмоқда.

Ўқув ишлари бўйича директор ўринбосари Рустам Ўтамуратов, тарих фани ўқитувчиси Бахрам Сапарбоев ва математика фани ўқитувчиси Зулфия Маткаримова томонидан ўтилаётган қизиқарли дарслар ўқувчиларнинг билим даражасини янада юксалтиришга хизмат қилмоқда.

Мактабда дарслар ўзбек ва қозоқ тилларида олиб борилади. Бу эса кўп миллатли жамиятда таълим олиш имкониятларини кенгайтиради. Ёш ва тажрибали бошланғич синф ўқитувчиси Маҳфуза Ўпаева қозоқ синфида болажонларга меҳр ва фидойилик билан дарс бериб, уларни билим оламига етакламоқда.

Мактаб кутубхонасида 1140 та бадиий китоб ва 20 мингдан ортиқ дарслик мавжуд. Ўқитувчи ва ўқувчилар бўш вақтларида керакли адабиётларни мутолаа қилиб, билим доирасини кенгайтирмоқда.

Мактаб психологи Гулшод Хўжанафасова ўқувчилар билан мунтазам тренинглар ўтказиб, уларни қизиқишларига қараб касб танлашга йўналтирмоқда. Тарбиясида ўзгариш кузатилаётган ўқувчилар билан якка тартибда суҳбатлар ўтказилиб, керакли тавсиялар бериб борилиши таълим-тарбия жараёнининг муҳим қисмига айланган.

Мактабга бириктирилган инспектор-психолог Ғиёсжон Кенжабоев, маънавий-маърифий ишлар бўйича директор ўринбосари Кундуз Казакова ва мактаб психологи Гулшод Хўжанафасова мактабда эрталабки рейд ташкил этиб, ўқувчиларнинг дарсликларни тўлиқ олиб келиши, сумкаларида тиғли буюмлар мавжуд ёки йўқлигини кўздан кечиради. Бундай тадбирлар мактабда хавфсиз муҳит яратиш ва интизомни мустаҳкамлашда муҳим аҳамият касб этади.

Шунингдек, таълим масканида турли саналар муносабати билан байрам тадбирлари, адабий-бадиий кечалар тез-тез ўтказилади. Она тили фани ўқитувчиси Нафиса Абдуллаева томонидан 14 февраль — Заҳириддин Муҳаммад Бобур таваллуд кунига бағишлаб ўтказилган тадбир ҳам шулар жумласидандир. Мазкур тадбирда ўқувчилар фаол иштирок этиб, Бобурнинг ҳаёт ва ижод йўли, асарлари ҳақидаги билимларини янада мустаҳкамладилар.

Куюк кўпир овулидаги 19-сонли умумтаълим мактаби ўзининг кўп йиллик тарихи, малакали педагоглари, ўқувчиларнинг юқори натижалари ва педагоглар жамоасининг ҳамжиҳатлиги билан намуна бўла оладиган таълим муассасаларидан биридир. Бундай масканларда тарбия топаётган ёшлар келажакда юрт равнақига муносиб ҳисса қўшадиган малакали кадрлар бўлиб етишиши шубҳасиз.