МАҲАЛЛАЛАРДА ЖАМОАТ ХАВФСИЗЛИГИНИ ТАЪМИНЛАШ ВА ҲУҚУҚБУЗАРЛИКЛАРНИНГ ОЛДИНИ ОЛИШ ЮЗАСИДАН СЕМИНАР-ТРЕНИНГ ЎТКАЗИЛДИ

Амударё туманида ҳудуддаги маҳаллаларда “Обод ва хавфсиз маҳалла” тамойили асосида жамоат хавфсизлигини таъминлаш ва ижтимоий профилактикани амалга ошириш тартиби юзасидан касбий билимларини янада ошириш бўйича семинар-тренинг ўтказилди.

8 сентябрь куни бўлиб ўтган ушбу семинарда Қорақалпоғистон Республикаси Ички ишлар вазирлигининг Ҳуқуқбузарликлар профилактикаси бошқармаси ижтимоий профилактика бўлими бошлиғи, подполковник Ниетбай Қидирбаев иштирок этди. Шунингдек, туман ҳокими ўринбосарлари Маҳмуд Шерметов, Гўзал Собурова ҳамда туман Ички ишлар, Мактаб ва мактабгача таълим, Камбағалликни қисқартириш ва бандликка кўмаклашиш бўлимлари, Ёшлар ишлари агентлиги масъуллари ҳам қатнашишди.

Семинарда вояга етмаганлар, ёшлар ўртасида ҳуқуқбузарлик ва жиноятчиликнинг олдини олиш борасида “маҳалла бешлиги”, яъни профилактика инспектори, маҳалла раиси, хоким ёрдамчиси, хотин-қизлар фаоли, ёшлар етакчиси томонидан ҳамкорликда тегишли чора-тадбирлар белгилаб олиниши, маҳаллани жиноятчиликдан холи ҳудудга айлантиришда биргаликда иш олиб борилиши кераклиги хусусида сўз юритилди.

Шунингдек, профилактика бўйича маҳалла “бешлиги”нинг кунлик фаолиятини янгича тизимда давом эттириш, жиноятчилик ва ҳуқуқбузарликлар профилактикасини тизимли олиб бориш бўйича касбий малакалар оширилди.

Семинар давомида вояга етмаганлар, ёшлар ўртасида ҳуқуқбузарлик ва жиноятчиликнинг олдини олиш борасида “Қўқон шаҳар тажрибаси” асосида “маҳалла бешлиги” тизими фаолияти самарадорлигини оширишга қаратилган ўқув-семинар модули ҳамда ҳамкорликда ишлаш бўйича методик қўлланма ишлаб чиқилгани, мазкур методик қўлланмага асосан “Обод ва хавфсиз маҳалла” тамойили бўйича амалга оширилиши лозим бўлган ишлар юзасидан ўқув-семинарлар бўлиб ўтаётгани таъкидлаб ўтилди.

Шунингдек, Қорақалпоғистон Республикаси ва Амударё тумани ҳудудида вояга етмаганлар, ёшлар ўртасидаги ҳуқуқбузарликлар ва жиноятчилик ҳолатига алоҳида эътибор қаратилди. Айниқса, туман ҳудудидаги маҳаллаларда, чекка қишлоқларда, жиноятчилик салмоғи ортган “қизил” тоифадаги ҳудудларда содир этилган, ҳуқуқбузарлик ҳамда жиноятчиликнинг асл сабаблари, унга туртки бўлган омиллар, мавжуд камчиликлар бирма-бир таҳлил қилиниб, тегишли хулосалар қилинди.

Шунингдек, вояга етмаган ва ёшларнинг жисмоний ва физиологик ривожланиши даражаси, уларнинг ўтиш вақтида турли салбий таъсирларга тушиб жиноят содир этиш ҳолатларининг сони ортиб бораётганлиги улар билан нафақат профилактик суҳбат ўтказиш, тарғибот тадбирларини амалга ошириш, балки тегишли ташкилотлар билан ҳамкорликда маънавий-маърифий, ҳарбий-ватанпарварлик руҳидаги тадбирларни ташкил этиш, ҳар хил тўгарак машғулотлари, қисқа муддатли спорт-ҳарбий йиғинларнинг ташкил этилиши мақсадга мувофиқлиги ҳам алоҳида айтиб ўтилди.

Ундан ташқари, семинарга жалб қилинган масъул ходимлар учун тегишли мавзуларида машғулотлар ўтказилди. “Ёшлар ва вояга етмаганлар томонидан содир этилаётган жиноятларнинг олдини олишда “маҳалла бешлиги”нинг ҳамкорлиги”, “Маҳаллалардаги ёшлар етакчилари фаолиятини самарали ташкил этиш ҳамда улар иштирокида жиноятчилик профилактикасини амалга ошириш механизмлари”, “Таълим муассасалари ёшлари ўртасида жиноятчиликнинг олдини олиш”, “Низоли оилалар билан ишлаш ва уларнинг фарзандларини ижтимоийлашувини таъминлаш”, “Маҳаллаларда хавфсиз муҳитни яратиш ва ижтимоий профилактикани ташкил этиш”, “Маҳалла – туман – ҳудуд” кесимида вояга етмаганлар ва ёшлар ўртасида ҳуқуқбузарликларнинг олдини олишнинг самарали тизимини яратиш” каби мавзулардаги машғулотларда кенг малака ва тушунчалар берилди.

Ўқув-семинар якунида ҳудудда “Қўқон шаҳар тажрибаси” асосида жиноятчиликни жиловлаш ва ҳуқуқбузарликларнинг олдини олиш, аҳоли билан манзилли ишлаш, маҳаллаларни ижтимоий-иқтисодий ривожлантириш чора-тадбирларини мақсадли ташкил этиш, бу борада илғор тажрибаларни оммалаштириш юзасидан тегишли чора-тадбирлар белгилаб олинди.

М.Ситмурадов, туман ИИБ ЖХХ ҲПБ катта инспектори, капитан