MAHALLALARDA JAMOAT XAVFSIZLIGINI TAʼMINLASh VA HUQUQBUZARLIKLARNING OLDINI OLISh YuZASIDAN SEMINAR-TRENING OʻTKAZILDI

Amudaryo tumanida hududdagi mahallalarda “Obod va xavfsiz mahalla” tamoyili asosida jamoat xavfsizligini taʼminlash va ijtimoiy profilaktikani amalga oshirish tartibi yuzasidan kasbiy bilimlarini yanada oshirish boʻyicha seminar-trening oʻtkazildi.

8-sentyabr kuni boʻlib oʻtgan ushbu seminarda Qoraqalpogʻiston Respublikasi Ichki ishlar vazirligining Huquqbuzarliklar profilaktikasi boshqarmasi ijtimoiy profilaktika boʻlimi boshligʻi, podpolkovnik Niyetbay Qidirbayev ishtirok etdi. Shuningdek, tuman hokimi oʻrinbosarlari Mahmud Shermetov, Goʻzal Soburova hamda tuman Ichki ishlar, Maktab va maktabgacha taʼlim, Kambagʻallikni qisqartirish va bandlikka koʻmaklashish boʻlimlari, Yoshlar ishlari agentligi masʼullari ham qatnashishdi.

Seminarda voyaga yetmaganlar, yoshlar oʻrtasida huquqbuzarlik va jinoyatchilikning oldini olish borasida “mahalla beshligi”, yaʼni profilaktika inspektori, mahalla raisi, xokim yordamchisi, xotin-qizlar faoli, yoshlar yetakchisi tomonidan hamkorlikda tegishli chora-tadbirlar belgilab olinishi, mahallani jinoyatchilikdan xoli hududga aylantirishda birgalikda ish olib borilishi kerakligi xususida soʻz yuritildi.

Shuningdek, profilaktika boʻyicha mahalla “beshligi”ning kunlik faoliyatini yangicha tizimda davom ettirish, jinoyatchilik va huquqbuzarliklar profilaktikasini tizimli olib borish boʻyicha kasbiy malakalar oshirildi.

Seminar davomida voyaga yetmaganlar, yoshlar oʻrtasida huquqbuzarlik va jinoyatchilikning oldini olish borasida “Qoʻqon shahar tajribasi” asosida “mahalla beshligi” tizimi faoliyati samaradorligini oshirishga qaratilgan oʻquv-seminar moduli hamda hamkorlikda ishlash boʻyicha metodik qoʻllanma ishlab chiqilgani, mazkur metodik qoʻllanmaga asosan “Obod va xavfsiz mahalla” tamoyili boʻyicha amalga oshirilishi lozim boʻlgan ishlar yuzasidan oʻquv-seminarlar boʻlib oʻtayotgani taʼkidlab oʻtildi.

Shuningdek, Qoraqalpogʻiston Respublikasi va Amudaryo tumani hududida voyaga yetmaganlar, yoshlar oʻrtasidagi huquqbuzarliklar va jinoyatchilik holatiga alohida eʼtibor qaratildi. Ayniqsa, tuman hududidagi mahallalarda, chekka qishloqlarda, jinoyatchilik salmogʻi ortgan “qizil” toifadagi hududlarda sodir etilgan, huquqbuzarlik hamda jinoyatchilikning asl sabablari, unga turtki boʻlgan omillar, mavjud kamchiliklar birma-bir tahlil qilinib, tegishli xulosalar qilindi.

Shuningdek, voyaga yetmagan va yoshlarning jismoniy va fiziologik rivojlanishi darajasi, ularning oʻtish vaqtida turli salbiy taʼsirlarga tushib jinoyat sodir etish holatlarining soni ortib borayotganligi ular bilan nafaqat profilaktik suhbat oʻtkazish, targʻibot tadbirlarini amalga oshirish, balki tegishli tashkilotlar bilan hamkorlikda maʼnaviy-maʼrifiy, harbiy-vatanparvarlik ruhidagi tadbirlarni tashkil etish, har xil toʻgarak mashgʻulotlari, qisqa muddatli sport-harbiy yigʻinlarning tashkil etilishi maqsadga muvofiqligi ham alohida aytib oʻtildi.

Undan tashqari, seminarga jalb qilingan masʼul xodimlar uchun tegishli mavzularida mashgʻulotlar oʻtkazildi. “Yoshlar va voyaga yetmaganlar tomonidan sodir etilayotgan jinoyatlarning oldini olishda “mahalla beshligi”ning hamkorligi”, “Mahallalardagi yoshlar yetakchilari faoliyatini samarali tashkil etish hamda ular ishtirokida jinoyatchilik profilaktikasini amalga oshirish mexanizmlari”, “Taʼlim muassasalari yoshlari oʻrtasida jinoyatchilikning oldini olish”, “Nizoli oilalar bilan ishlash va ularning farzandlarini ijtimoiylashuvini taʼminlash”, “Mahallalarda xavfsiz muhitni yaratish va ijtimoiy profilaktikani tashkil etish”, “Mahalla – tuman – hudud” kesimida voyaga yetmaganlar va yoshlar oʻrtasida huquqbuzarliklarning oldini olishning samarali tizimini yaratish” kabi mavzulardagi mashgʻulotlarda keng malaka va tushunchalar berildi.

Oʻquv-seminar yakunida hududda “Qoʻqon shahar tajribasi” asosida jinoyatchilikni jilovlash va huquqbuzarliklarning oldini olish, aholi bilan manzilli ishlash, mahallalarni ijtimoiy-iqtisodiy rivojlantirish chora-tadbirlarini maqsadli tashkil etish, bu borada ilgʻor tajribalarni ommalashtirish yuzasidan tegishli chora-tadbirlar belgilab olindi.

M.Sitmuradov, tuman IIB JXX HPB katta inspektori, kapitan