Хотин-қизлар бандлигини таъминлашга катта эътибор қаратилмоқда

Амударё туманида фаолият юритаётган “Жайхун илҳомлари” нодавлат нотижорат ташкилоти томонидан “Беш ташаббус – беш имконият!” лойиҳасининг иш режаси бўйича турли тадбирлар, учрашувлар, танловлар ўтказилиб келинмоқда. Президентимизнинг беш муҳим ташаббусидан биринчи ташаббуси доирасида ўтказилаётган ёшларнинг мусиқа, рассомлик, адабиёт, театр ва санъатнинг бошқа турларига қизиқишларини оширишга, истеъдодини юзага чиқаришга қаратилган танловлар, давра суҳбатлари, тадбирлар ҳам шулар жумласидандир.

Иккинчи ташаббус доирасида ёшларни жисмоний чиниқтириш, уларнинг спорт соҳасида қобилиятларини намойиш қилишлари учун зарур шароитлар яратиш мақсадида ташкилот қошида тренажёрлар хонаси ташкил қилинди. Учинчи ташаббус доирасида ёшлар ўртасида компьютер технологиялари ва интернетдан самарали фойдаланишга қаратилган тадбирлар, “Очиқ дарслар” ўтказилмоқда. Тўртинчи ташаббус доирасида ёшлар маънавиятини юксалтириш, улар ўртасида китобхонликни кенг тарғиб қилиш бўйича танловлар, учрашувлар, давра суҳбатлари, “Китоблар карвони” тадбирлари ташкил қилинмоқда. Бешинчи ташаббус доирасида эса ёш аёл-қизларни ишга жойлаштириш мақсадида учрашувлар ташкил қилиниб, ўзини ўзи банд қилган ва тадбиркорлик билан шуғулланиб, даромад топаётган ёш аёл-қизларнинг иш тажрибалари оммалаштирилмоқда.

Ишбилармон, тадбиркор, ўзини-ўзи банд қилган ҳолда, уй шароитида меҳнат қилиб даромад топаётган аёл-қизлар ҳақида “Тараққиёт кўзгуси”, “Менинг оилам” газеталарида мақолалар, Амударё телевидениеси орқали телекўрсатувлар намойиш қилиб борилмоқда.

Ушбу лойиҳа доирасида ташкилот масъуллари манзилли қўллаб-қувватлаш дафтарларига киритилган хотин-қизларнинг бандлигига кўмаклашиш мақсадида ўзини-ўзи банд қилган ҳолда уй-шароитида меҳнат қилиб даромад топаётган Янгиобод маҳалласида истиқомат қилувчи аёл-қизлар фаолияти билан яқиндан танишди.

Янгиобод маҳалласида ҳозирги кунда 378та хонадонда 510та оилада 1905 нафар аҳоли истиқомат қилмоқда. Маҳаллада давлатимиз томонидан белгиланган муҳим йўналишлар асосида камбағалликни қисқартириш, аҳолининг иш билан бандлигини таъминлаш, ободонлаштириш ишлари ижобий тарзда қўлга олинмоқда. Маҳалла аҳли хизмат кўрсатиш ва савдо йўналишлари ҳамда қўшимча ўсиш нуқталари – томорқа ерларига иссиқхона қуриш, паррандачилик ва чорвачилик билан шуғулланиб қўшимча даромад олишни мақсад қилиб қўйган. 3та корхона, 2та якка тартибдаги тадбиркорлик субъекти янгидан очилиб, 3та корхонага кредит маблағи ажратиб берилди.

Янгиободлик 50 нафар фуқарога оилавий тадбиркорликни ривожлантириш дастурлари асосида 850,6 миллион сўмлик кредитлар ажратилди. 52 нафар фуқароларнинг бандлиги таъминланди. Шундан 24 нафари хусусий секторда ишга жойлашган бўлса, 3 нафари ҳақ тўланадиган жамоат ишларига жалб этилди, 25 нафари эса ўзини ўзи банд қилди.

“Ёшлар дафтари”га киритилган Клара Ражабовага “Ёшлар дафтари” субсидияси асосида 5 млн. 300 минг сўмлик тикув машинаси олиб берилди.

Шу хонадон бекаси Роҳатой Халиллаевага эса ўз аризасига биноан 24 миллион сўмлик электромотороллер олиб берилди.

Бундай хайрли ишлар туманимизнинг Фаровон маҳалласида ҳам муваффақиятли амалга оширилмоқда. Маҳаллада жами 71 нафар аёл-қизлар “Аёллар дафтари”га киритилган. Йил бошидан буён маҳалладаги 60 нафардан ортиқ фуқарога иш билан бандлигини таъминлаш учун тавсияномалар берилди.

Маҳаллада фаолият юритаётган ҳоким ёрдамчиси Муқаддас Бекназарованинг ташаббуси билан маҳалладаги аёл-қизлар олдида турган асосий муаммо – ишсизликни бартараф этишга катта эътибор қаратилмоқда.

Маҳаллада яшовчи Ирода Йўлдошевага ҳар хил пишириқлар, тўй дастурхони учун турли таомлар тайёрлаш мумкин бўлган 33 миллион сўмлик ускуналар олиб берилди. Нафиса Оллаёрова эса субсидия асосида харид қилинган тикув машинасида турли хил бичимдаги кийимларни буюртма асосида тикиб, барчанинг миннатдорлигига эга бўлмоқда. Ўз-ўзини банд қилиб, уй шароитида даромад топишни ният қилган 4 нафар аёлга ҳам ана шундай тикув машиналарини олиб бериш режаси тузилган. Тикувчи Нафиса Оллаёрова маҳалла раҳбариятининг ўзига яратиб берган бу имкониятидан жуда миннатдор.

Бундай хайрли ишлар туманимизнинг барча маҳаллаларида ҳам жадал тарзда давом эттирилмоқда.

Ўрозали РЕЙИМОВ.