Xotin-qizlar bandligini taʼminlashga katta eʼtibor qaratilmoqda

Amudaryo tumanida faoliyat yuritayotgan “Jayxun ilhomlari” nodavlat notijorat tashkiloti tomonidan “Besh tashabbus – besh imkoniyat!” loyihasining ish rejasi boʻyicha turli tadbirlar, uchrashuvlar, tanlovlar oʻtkazilib kelinmoqda. Prezidentimizning besh muhim tashabbusidan birinchi tashabbusi doirasida oʻtkazilayotgan yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirishga, isteʼdodini yuzaga chiqarishga qaratilgan tanlovlar, davra suhbatlari, tadbirlar ham shular jumlasidandir.

Ikkinchi tashabbus doirasida yoshlarni jismoniy chiniqtirish, ularning sport sohasida qobiliyatlarini namoyish qilishlari uchun zarur sharoitlar yaratish maqsadida tashkilot qoshida trenajyorlar xonasi tashkil qilindi. Uchinchi tashabbus doirasida yoshlar oʻrtasida kompyuter texnologiyalari va internetdan samarali foydalanishga qaratilgan tadbirlar, “Ochiq darslar” oʻtkazilmoqda. Toʻrtinchi tashabbus doirasida yoshlar maʼnaviyatini yuksaltirish, ular oʻrtasida kitobxonlikni keng targʻib qilish boʻyicha tanlovlar, uchrashuvlar, davra suhbatlari, “Kitoblar karvoni” tadbirlari tashkil qilinmoqda. Beshinchi tashabbus doirasida esa yosh ayol-qizlarni ishga joylashtirish maqsadida uchrashuvlar tashkil qilinib, oʻzini oʻzi band qilgan va tadbirkorlik bilan shugʻullanib, daromad topayotgan yosh ayol-qizlarning ish tajribalari ommalashtirilmoqda.

Ishbilarmon, tadbirkor, oʻzini-oʻzi band qilgan holda, uy sharoitida mehnat qilib daromad topayotgan ayol-qizlar haqida “Taraqqiyot koʻzgusi”, “Mening oilam” gazetalarida maqolalar, Amudaryo televideniyesi orqali telekoʻrsatuvlar namoyish qilib borilmoqda.

Ushbu loyiha doirasida tashkilot masʼullari manzilli qoʻllab-quvvatlash daftarlariga kiritilgan xotin-qizlarning bandligiga koʻmaklashish maqsadida oʻzini-oʻzi band qilgan holda uy-sharoitida mehnat qilib daromad topayotgan Yangiobod mahallasida istiqomat qiluvchi ayol-qizlar faoliyati bilan yaqindan tanishdi.

Yangiobod mahallasida hozirgi kunda 378ta xonadonda 510ta oilada 1905 nafar aholi istiqomat qilmoqda. Mahallada davlatimiz tomonidan belgilangan muhim yoʻnalishlar asosida kambagʻallikni qisqartirish, aholining ish bilan bandligini taʼminlash, obodonlashtirish ishlari ijobiy tarzda qoʻlga olinmoqda. Mahalla ahli xizmat koʻrsatish va savdo yoʻnalishlari hamda qoʻshimcha oʻsish nuqtalari – tomorqa yerlariga issiqxona qurish, parrandachilik va chorvachilik bilan shugʻullanib qoʻshimcha daromad olishni maqsad qilib qoʻygan. 3ta korxona, 2ta yakka tartibdagi tadbirkorlik subʼekti yangidan ochilib, 3ta korxonaga kredit mablagʻi ajratib berildi.

Yangiobodlik 50 nafar fuqaroga oilaviy tadbirkorlikni rivojlantirish dasturlari asosida 850,6 million soʻmlik kreditlar ajratildi. 52 nafar fuqarolarning bandligi taʼminlandi. Shundan 24 nafari xususiy sektorda ishga joylashgan boʻlsa, 3 nafari haq toʻlanadigan jamoat ishlariga jalb etildi, 25 nafari esa oʻzini oʻzi band qildi.

“Yoshlar daftari”ga kiritilgan Klara Rajabovaga “Yoshlar daftari” subsidiyasi asosida 5 mln. 300 ming soʻmlik tikuv mashinasi olib berildi.

Shu xonadon bekasi Rohatoy Xalillayevaga esa oʻz arizasiga binoan 24 million soʻmlik elektromotoroller olib berildi.

Bunday xayrli ishlar tumanimizning Farovon mahallasida ham muvaffaqiyatli amalga oshirilmoqda. Mahallada jami 71 nafar ayol-qizlar “Ayollar daftari”ga kiritilgan. Yil boshidan buyon mahalladagi 60 nafardan ortiq fuqaroga ish bilan bandligini taʼminlash uchun tavsiyanomalar berildi.

Mahallada faoliyat yuritayotgan hokim yordamchisi Muqaddas Beknazarovaning tashabbusi bilan mahalladagi ayol-qizlar oldida turgan asosiy muammo – ishsizlikni bartaraf etishga katta eʼtibor qaratilmoqda.

Mahallada yashovchi Iroda Yoʻldoshevaga har xil pishiriqlar, toʻy dasturxoni uchun turli taomlar tayyorlash mumkin boʻlgan 33 million soʻmlik uskunalar olib berildi. Nafisa Ollayorova esa subsidiya asosida xarid qilingan tikuv mashinasida turli xil bichimdagi kiyimlarni buyurtma asosida tikib, barchaning minnatdorligiga ega boʻlmoqda. Oʻz-oʻzini band qilib, uy sharoitida daromad topishni niyat qilgan 4 nafar ayolga ham ana shunday tikuv mashinalarini olib berish rejasi tuzilgan. Tikuvchi Nafisa Ollayorova mahalla rahbariyatining oʻziga yaratib bergan bu imkoniyatidan juda minnatdor.

Bunday xayrli ishlar tumanimizning barcha mahallalarida ham jadal tarzda davom ettirilmoqda.

Oʻrozali REYIMOV.