Jayhun mahallasida aholi bandligini taʼminlash maqsadida va tadbirkorlik loyihalari qoʻllab-quvvatlanmoqda

Amudaryo tumanining Jayhun mahallasida bugungi kunda 3946 nafar aholi istiqomat qiladi. Mahalladagi mavjud mehnat resurslarini toʻgʻri yoʻnaltirish va yangi ish oʻrinlarini yaratish maqsadida 2026-yil uchun aniq va manzilli rejalar ishlab chiqilgan. Joriy yilda jami 70 nafar fuqaroning bandligini taʼminlash maqsad qilingan boʻlib, bu orqali hududdagi 52 nafar ishsiz hamda mehnat bozoriga kirib kelayotgan yoshlarning doimiy daromad manbaiga ega boʻlishi koʻzda tutilgan. Bu jarayonda 2025-yil 19-martdan buyon mahallada faoliyat yuritib kelayotgan hokim yordamchisi Xursand Hayitboyevning hissasi katta.

Mahalla uchun “Har bir oila – tadbirkor” dasturi doirasida 2026-yilga jami 1,384 milliard soʻm miqdoridagi imtiyozli kredit limiti ajratilgan. Hozirgi kunga qadar ushbu mablagʻlar hisobidan ishlab chiqarish, xizmat koʻrsatish va chorvachilik yoʻnalishlarini rivojlantirish maqsadida 50dan ortiq ishsiz fuqaroga 700 million soʻmdan ortiq imtiyozli kreditlar ajratildi.

Mahallada yashovchi Alisher Abdullayev ushbu dastur asosida 33 million soʻm imtiyozli kredit olib, milliy non va patirlar tayyorlash faoliyatini yoʻlga qoʻydi. U ajratilgan mablagʻ evaziga zamonaviy pech va xamir tayyorlash uskunalarini xarid qilib, oʻz oilaviy tadbirkorligini muvaffaqiyatli boshladi.

Dehqonchilik va chorvachilikka ixtisoslashgan ushbu mahallada tomorqadan unumli foydalanish boʻyicha ham samarali ishlar amalga oshirilmoqda. Jumladan, Maʼrifat koʻchasida istiqomat qiluvchi Bekbergan Tulubayev ajratilgan imtiyozli kredit hisobidan oʻz tomorqasining 7 sotix maydonida zamonaviy issiqxona barpo etdi. Tadbirkor ushbu maydonning 5 sotixiga bodring, qolgan 2 sotixiga esa pomidor koʻchatlarini ekkan. Buning natijasida u hozirgi kunda har oyda 4 tonna bodring va 3,5 tonna pomidor yetishtirib, mahalliy bozorlarni sifatli qishloq xoʻjaligi mahsulotlari bilan taʼminlashga hissa qoʻshib kelmoqda.

Bu kabi tizimli saʼy-harakatlar mahalladagi ijtimoiy himoyaga muhtoj aholini qoʻllab-quvvatlash va kambagʻallikni qisqartirishda oʻzining yaqqol natijasini bermoqda. Hozirda mahalladagi kambagʻallik reyestrida 48 ta oila roʻyxatda turadi va yuqorida taʼkidlangan tadbirkorlik loyihalari, imtiyozli kreditlar hamda subsidiyalar ajratish orqali joriy yilda 30 ta oilani ushbu roʻyxatdan chiqarish choralari koʻrilmoqda.

Jayhun mahallasida olib borilayotgan bunday keng koʻlamli va manzilli ishlar aholi bandligini taʼminlash, ularning daromadlarini oshirish hamda hududning iqtisodiy salohiyatini yuksaltirishga xizmat qilib, mahalladoshlarning farovon hayoti uchun mustahkam zamin yaratmoqda.

Maqset Habibullayev