Жайҳун маҳалласида аҳоли бандлигини таъминлаш мақсадида ва тадбиркорлик лойиҳалари қўллаб-қувватланмоқда
Амударё туманининг Жайҳун маҳалласида бугунги кунда 3946 нафар аҳоли истиқомат қилади. Маҳалладаги мавжуд меҳнат ресурсларини тўғри йўналтириш ва янги иш ўринларини яратиш мақсадида 2026 йил учун аниқ ва манзилли режалар ишлаб чиқилган. Жорий йилда жами 70 нафар фуқаронинг бандлигини таъминлаш мақсад қилинган бўлиб, бу орқали ҳудуддаги 52 нафар ишсиз ҳамда меҳнат бозорига кириб келаётган ёшларнинг доимий даромад манбаига эга бўлиши кўзда тутилган. Бу жараёнда 2025 йил 19 мартдан буён маҳаллада фаолият юритиб келаётган ҳоким ёрдамчиси Хурсанд Ҳайитбоевнинг ҳиссаси катта.
Маҳалла учун “Ҳар бир оила – тадбиркор” дастури доирасида 2026 йилга жами 1,384 миллиард сўм миқдоридаги имтиёзли кредит лимити ажратилган. Ҳозирги кунга қадар ушбу маблағлар ҳисобидан ишлаб чиқариш, хизмат кўрсатиш ва чорвачилик йўналишларини ривожлантириш мақсадида 50дан ортиқ ишсиз фуқарога 700 миллион сўмдан ортиқ имтиёзли кредитлар ажратилди.
Маҳаллада яшовчи Алишер Абдуллаев ушбу дастур асосида 33 миллион сўм имтиёзли кредит олиб, миллий нон ва патирлар тайёрлаш фаолиятини йўлга қўйди. У ажратилган маблағ эвазига замонавий печь ва хамир тайёрлаш ускуналарини харид қилиб, ўз оилавий тадбиркорлигини муваффақиятли бошлади.
Деҳқончилик ва чорвачиликка ихтисослашган ушбу маҳаллада томорқадан унумли фойдаланиш бўйича ҳам самарали ишлар амалга оширилмоқда. Жумладан, Маърифат кўчасида истиқомат қилувчи Бекберган Тулубаев ажратилган имтиёзли кредит ҳисобидан ўз томорқасининг 7 сотих майдонида замонавий иссиқхона барпо этди. Тадбиркор ушбу майдоннинг 5 сотихига бодринг, қолган 2 сотихига эса помидор кўчатларини эккан. Бунинг натижасида у ҳозирги кунда ҳар ойда 4 тонна бодринг ва 3,5 тонна помидор етиштириб, маҳаллий бозорларни сифатли қишлоқ хўжалиги маҳсулотлари билан таъминлашга ҳисса қўшиб келмоқда.
Бу каби тизимли саъй-ҳаракатлар маҳалладаги ижтимоий ҳимояга муҳтож аҳолини қўллаб-қувватлаш ва камбағалликни қисқартиришда ўзининг яққол натижасини бермоқда. Ҳозирда маҳалладаги камбағаллик реестрида 48 та оила рўйхатда туради ва юқорида таъкидланган тадбиркорлик лойиҳалари, имтиёзли кредитлар ҳамда субсидиялар ажратиш орқали жорий йилда 30 та оилани ушбу рўйхатдан чиқариш чоралари кўрилмоқда.
Жайҳун маҳалласида олиб борилаётган бундай кенг кўламли ва манзилли ишлар аҳоли бандлигини таъминлаш, уларнинг даромадларини ошириш ҳамда ҳудуднинг иқтисодий салоҳиятини юксалтиришга хизмат қилиб, маҳалладошларнинг фаровон ҳаёти учун мустаҳкам замин яратмоқда.
Мақсет Ҳабибуллаев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
