Қум ёп маҳалласи: хотин-қизлар манфаати доимий эътиборда

2026 йил юртимизда “Маҳаллани ривожлантириш ва жамиятни юксалтириш йили” деб эълон қилиниши муносабати билан барча жойларда бўлгани каби Амударё туманининг Қум ёп маҳалласида ҳам кенг кўламли ишлар амалга оширилмоқда. Бугунги кунда мазкур ҳудудда 731 та хонадон мавжуд бўлиб, уларда жами 1860 та оила истиқомат қилади. Маҳалла аҳолисининг 2248 нафарини хотин-қизлар ташкил этади.

Ўзбекистон Республикаси Президентининг 2022 йил 31 мартдаги Фармони ижросини таъминлаш доирасида Қум ёп маҳалласининг хотин-қизлар фаоли Роза Қонарбаева томонидан жорий йилнинг 1-ярмида қатор хайрли ишлар амалга оширилди. Хусусан, маҳалладаги барча хонадонлар ҳолати чуқур ўрганилиб, ногиронлиги бўлган шахслар, кам таъминланган оилалар, боқувчисини йўқотганлар ҳамда ёлғиз яшаётган кексаларнинг ҳолидан мунтазам хабар олиш тизими йўлга қўйилди.

Оилалардаги ижтимоий-маънавий муҳитни ўрганишни янада самарали ташкил этиш ва маҳалла ҳаётига кенг жамоатчиликни жалб қилиш мақсадида ҳудудда “Нуронийлар” ҳамда “Қайноналар кенгаши” каби жамоатчилик тузилмалари ташкил этилган. Чиндан ҳам, жамият тараққиётида кўп йиллик ҳаётий тажрибага эга нуронийларнинг ўрни беқиёс. Мисол учун, маҳалла фахри бўлган ҳожи она Орзигул Йўлдашеванинг ҳаёт йўли барча ёшларга ўрнакдир. Онахоннинг 6 нафар қизи, 4 нафар ўғли, 40 нафар невараси ва 12 нафар чевараси бор. Унинг панд-насиҳатлари ёшларга намуна сифатида етказилмоқда.

Ёш авлод тарбияси ва оилалар мустаҳкамлигини таъминлаш мақсадида хотин-қизлар фаоли маҳалла раиси ҳамда Орзигул Йўлдашева каби фаол онахонлар билан биргаликда хонадонларга кириб, ёш оилаларнинг яшаш тарзи билан яқиндан танишмоқда. Фарзанд тарбиясига салбий таъсир кўрсатаётган ота-оналар билан қатъий иш олиб борилиб, ҳудудда жиноятчилик, ўз жонига қасд қилиш, фоҳишабозлик, гиёҳвандлик, ичкиликбозлик ҳамда вояга етмаган қизларни эрта турмушга бериш каби иллатларнинг олдини олишга алоҳида эътибор қаратилмоқда.

Маҳалладаги Бахтиёр Бекниязов ва Маможон Казакбаевалар оиласи ҳам ёшлар учун ҳақиқий ибрат намунасидир. Нафақадаги бу фахрий ўқитувчилар уйда бекор ўтирмасдан, ўз томорқаларида турли экинлар етиштириб, мўл ҳосил олмоқдалар.

Томорқада ҳосил етиштириш, умуман, жисмоний меҳнат билан банд бўлиш саломатликка ҳам ижобий таъсир қилади. Аҳоли, айниқса аёллар саломатлиги ҳақида гап кетганида шуни айтиш лозимки, ҳудудда соғлом турмуш тарзини тарғиб қилиш, ҳомиладор аёллар ва ёш оналарга эътиборни кучайтириш борасидаги тарғибот ишлари ўз самарасини бермоқда. Жорий йилнинг 1-ярми давомида маҳаллада 65 та туғилиш қайд этилди ва патронаж ҳамшираларнинг мунтазам назорати натижасида оналар ва болалар ўлимига умуман йўл қўйилмади. Тиббий хизмат қамровини кенгайтириш мақсадида туғиш ёшидаги 880 нафар аёллар чуқурлаштирилган тиббий кўрикдан ўтказилди.

Қишлоқ шароитида томорқа аҳолининг энг муҳим даромад манбаларидан бири саналади. Маҳаллада яшовчи яна бир нуроний онахон Пардагул Гаипова ҳам ёши улуғлигига қарамасдан, ўз хонадонидаги томорқадан унумли фойдаланиб, барчага меҳнатсеварлик намунасини кўрсатиб келмоқда.

Жамиятда хотин-қизларнинг ўрнини мустаҳкамлашда оилавий тадбиркорликни ривожлантириш ғоят катта аҳамият касб этади. Иш билан таъминланган ва доимий даромад манбаига эга бўлган аёл жамиятнинг энг фаол аъзосига айланади. Қум ёп маҳалласида яшовчи Тўлғаной Бозорбаева ўз тикувчилик цехини ташкил қилиб, аҳолига сифатли хизмат кўрсатиш билан бирга, ёшларга ўз ҳунарини ўргатиб, кўплаб шогирдлар тайёрламоқда. Худди шундай, маҳалладаги яна бир намунали оила Шадиёр Шерманов ва Саёра Қурбаниязоваларнинг қизи ҳам тикувчилик соҳасига меҳр қўйиб, бугунги кунда ўз бизнесини муваффақиятли йўлга қўйган ҳолда ёшларга ҳунар ўргатмоқда.

Хулоса қилиб айтганда, Қум ёп маҳалласида олиб борилаётган бундай кенг қамровли ишлар оилалар мустаҳкамлигини таъминлаш, ёш авлодни соғлом ва баркамол этиб вояга етказиш ҳамда хотин-қизларнинг жамиятдаги мавқеини янада юксалтиришга улкан ҳисса қўшмоқда. Ташкил этилган ҳар бир тадбир ва кўрсатилаётган эътибор, аввало, инсон қадрини улуғлашдек эзгу мақсадга хизмат қилмоқда.