БЕЛГИЛАНМАГАН ҲУДУДЛАРДА ЧЎМИЛИШ –ҲАЁТ УЧУН ХАВФЛИ

Ҳар фаслнинг ўзига хос гашти, шу билан бирга етарлича  ташвишлари ҳам бор. Айниқса, ёз фаслининг жазирама иссиқ об-ҳавоси ёш-у кексани бирдай салқинланишга мажбур қилади. Ҳатто саратон қуёши заптига олган кунларда соя-салқин жойларда ҳам иссиқ ҳовурдан одамнинг нафаси қайтиб кетади ва беихтиёр сув ҳавзаларини қўмсаб қоламиз.

Оқар сувда чўмилишнинг ҳам ажиб гашти, инсон саломатлиги учун фойдали жиҳатлари бор. Лекин чўмилиш қоидаларига қатъий амал қилинмаса, кўпдан-кўп нохуш ҳолатлар юз бериши табиий. Айниқса, оқар сувнинг оқиш тезлиги юқори, сув сатҳи чуқур бўлса, чўкиб кетиш ёки оғиз ва бурунга сув кириши оқибатида жиддий касалликка чалиниш хавфи юқори бўлади. Шу боис, ҳар йили ёз мавсумида фуқаролар, айниқса, ёш болаларни бундай хавф-хатардан ҳимоялаш мақсадида Фавқулодда вазиятлар Вазирлиги ва мазкур Вазирликнинг туманлардаги бўлимлари томонидан зарур чора-тадбирлар кўрилиб, ҳудудлардаги барча сув ҳавзалари қатъий назоратга олинади ва чўмилиш тақиқланган ҳудудларга махсус таъқиқловчи белгилар ўрнатилиб, фавқулодда вазиятлар ходимлари томонидан тушунтириш ишлари олиб борилади. Аҳоли ўртасида тез оқар сув йўлларида, ўта чуқур бўлган каналларда, айниқса, дарёларда иложи бўлса, чўмилмаслик бўйича тавсиялар берилади.

Шундай бўлса-да, ҳар йили юртимизда айрим фуқаролар белгиланмаган жойларда, спиртли ичимликлар истеъмол қилган ҳолда чўмилишлари ва бошқа сабабларга кўра, юзлаб инсонлар нобуд бўлмоқда. Уларнинг аксарияти вояга етмаганларни ташкил этади. Бу каби ҳолатларнинг олдини олиш ҳар биримизнинг бурчимиз саналади. Шундай экан, азизлар, ҳар биримиздан фарзандларимизни назоратсиз қолдирмаслик, чўмилиш қоидаларига қатъий риоя қилиш талаб этилади.

Қорақалпоғистон Республикаси Вазирлар Кенгашининг Раиси – Фуқаро муҳофазаси бошлиғининг 2023 йил 18 май кунги ва Амударё тумани ҳокими – Фуқаро муҳофазаси бошлиғининг 2023 йил 22 майдаги “2023 йил чўмилиш мавсумида аҳолининг сувда чўкиши билан боғлиқ бахтсиз ҳодисаларнинг олдини олиш бўйича комплекс чора-тадбирлар тўғрисида”ги буйруғи ва кўрсатмалари раҳбарликка олишни таъминлаш мақсадида Амударё тумани Фавқулодда вазиятларнинг олдини олиш ва уларни бартараф этиш бўлими томонидан давлат қуйи тизимига кирувчи идора, корхона ва ташкилотлар билан биргаликда рейдлар ўтказилмоқда.

Амударё тумани Фақулодда вазиятлар бўлими бўлинма бошлиғи капитан Бекзод Тажибоев раҳбарлигида тегишли ташкилотлар билан туманимиз ҳудудидан оқиб ўтувчи Амударё дарёсининг қирғоқларида белгиланмаган ҳудудларда чўмилаётган ёшлар билан учрашувлар ўтказилиб, уларга сувда чўкканда биринчи ёрдам кўрсатиш бўйича зарур тавсиялар берилмоқда ва биринчи ёрдам кўрсатиш бўйича амалий машғулотлар ташкиллаштирилмоқда.

Шу билан бир қаторда дарё бўйида ва дарёга яқин ҳудудларда яшовчи фуқароларга кичик ҳажмли кема (қайиқ)лардан тўғри фойдаланиш, ўз вақтида рўйхатдан ва техник кўрикдан ўтказиш бўйича огоҳлантиришлар берилиб, бундай ҳолатларга йўл қўйган шахслар тегишли тартибда маъмурий жавобгарлик тортилиши ҳақида тушунтириш ишлари ҳам олиб борилмоқда.

Азиз юртдошлар! Халқимиз бекорга “сув балосидан асрасин”, деган хавф-хатардан огоҳ этувчи иборани такрорламайди. Сув – қанчалик қимматли оби-ҳаёт манбаи бўлишидан қатъий назар, очиқ ва тезоқар сув ҳавзаларида чўмилиш шунчалик хавфли ва айрим ҳолатларда инсон  умрига нуқта қўйиши мумкин. Шу боис,  фарзандларингизнинг белгиланмаган ҳудудларда чўмилишига асло йўл қўйманг.

Робия ЙЎЛДОШЕВА.