Хавфсиз муҳит – фаровон ҳаёт гарови: Амударё туманида профилактик тадбирлар кучайтирилмоқда

Жамият тараққиёти, инсон фаровонлиги ва юрт осойишталигининг энг асосий гарови бу шубҳасиз, тинчлик ва хавфсизликдир. Ҳар бир фуқаронинг ўз уйида, кўчасида ва маҳалласида хотиржам ҳаракатланиши унинг эртанги кунга бўлган ишончини мустаҳкамлайди, осойишта ҳаёт кечириши учун замин яратади. Айни шу мақсадда мамлакатимизда ҳуқуқ-тартибот тизимини янада такомиллаштириш, жиноятчилик ва ҳуқуқбузарликларнинг оқибатлари билан курашишдан кўра, уларнинг барвақт олдини олишга устувор аҳамият қаратилмоқда.

Ўзбекистон Республикаси Президентининг “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги қарори бу борадаги ишларни мутлақо янги босқичга олиб чиқди. Мазкур муҳим қарор ижроси доирасида бугунги кунда юртимизнинг барча ҳудудларида хавфсиз муҳит яратиш масаласи кун тартибидаги энг долзарб вазифалардан бирига айланди. Сабаби, ҳуқуқбузарликларнинг барвақт олдини олиш, инсон ҳаётига ва соғлиғига хавф туғдириши мумкин бўлган ҳар қандай омилларни тезкорлик билан бартараф этиш бугунги куннинг кечиктириб бўлмас қатъий талабидир.

Айни шу йўналишдаги тизимли, мақсадли ва самарали ишларнинг ёрқин амалий ифодасини Амударё туманида олиб борилаётган кенг кўламли тадбирлар мисолида ҳам яққол кўриш мумкин. Ҳудудда фуқаролар хавфсизлигини ва қонун устуворлигини таъминлаш мақсадида Амударё тумани прокуратураси ҳамда Ички ишлар бўлими томонидан ўзаро ҳамкорликда тизимли ишлар йўлга қўйилган. Ўзаро ҳамкорликда ташкил этилаётган профилактик тадбирлар ва назорат рейдлари, аввало, инсон қадрини улуғлаш ва унинг бебаҳо ҳаётини ҳимоя қилишдек эзгу мақсадга хизмат қилмоқда. Хусусан, аҳоли гавжум жойлар, ички ва умумдавлат аҳамиятига эга автомобиль йўлларида ҳаракат хавфсизлигини таъминлаш, содир этилиши мумкин бўлган йўл-транспорт ҳодисаларининг олдини олиш мақсадида мунтазам равишда рейд тадбирлари ўтказиб келинмоқда.

Маълумки, йўл ҳаракати хавфсизлиги бутун жамиятнинг хотиржамлиги билан бевосита боғлиқ бўлган муҳим йўналиш ҳисобланади. Йўллардаги ҳар бир қоидабузарлик нафақат ўша транспортни бошқараётган ҳайдовчининг, балки атрофдаги бегуноҳ йўловчилар, болалар ва пиёдаларнинг ҳаётига жиддий хавф туғдиради. Шу сабабли, Амударё тумани Ички ишлар бўлимининг Жамоат хавфсизлиги хизмати Йўл ҳаракати хавфсизлиги бўлинмаси ходимлари томонидан ўтказилган навбатдаги рейд тадбири давомида йўллардаги барча ҳаракат иштирокчиларининг белгиланган қоидаларга қатъий ва сўзсиз риоя этиши назоратга олинди.

Афсуски, давлатимиз томонидан кўрилаётган кенг қамровли чора-тадбирлар ва мунтазам олиб борилаётган тушунтириш-тарғибот ишларига қарамасдан, айрим ҳайдовчилар томонидан йўл ҳаракати қоидаларига беписандлик билан муносабатда бўлиш ҳолатлари ҳамон учраб турибди. Йўл ҳаракати хавфсизлиги бўлинмасининг масъул ходимлари томонидан ўтказилган навбатдаги назорат-рейд тадбирлари давомида мана шундай бир қатор қўпол қоидабузарликлар қайд этилди. Автотранспорт воситаларини тегишли ҳужжатларсиз бошқариш, ёш болаларни олдинги ўриндиққа жойлаштириш, маст ҳолда рулга ўтириш ва бошқа қатор қоидабузарликлар шулар жумласидандир.

Шу билан бирга, рейд давомида йўл қоидаларини қўпол равишда бузиш, тезликни белгиланган меъёрдан кескин ошириб, мақтанчоқлик ёки шошқалоқлик оқибатида атрофдагилар учун реал хавф яратиш ҳолатлари ҳам бартараф этилди. Шунингдек, мототранспорт воситаларини бошқаришда тегишли талабларга риоя қилмаслик, жумладан, ҳимоя шлемларидан фойдаланмаслик ва йўлларда қайрилиш, бурилиш ва қувиб ўтиш жараёнида хавфсизлик қоидаларига риоя қилмаслик каби қонунбузарликлар назоратчиларнинг диққат марказидан четда қалмади.

Тадбирлар давомида ҳуқуқбузарларга нисбатан қонунчиликда белгиланган тартибда тегишли маъмурий жарималар қўлланилди. Зарур ҳолларда, яъни транспорт воситасини бошқаришга ҳуқуқи бўлмаган ёки маст ҳолда бошқарган ҳайдовчиларнинг автомототранспорт воситалари жарима майдончаларига жойлаштирилиб, кўплаб эҳтимолий фожиаларнинг олди олинди.

Хулоса ўрнида шуни алоҳида таъкидлаш лозимки, маҳаллаларда ва йўлларда хавфсиз муҳитни яратиш бир марталик ёки мавсумий тадбир эмас, балки кундалик, тизимли ва мунтазам давом этадиган узлуксиз жараёндир. Давлатимиз томонидан олиб борилаётган бундай қатъий сиёсатнинг негизида фақат битта улуғвор мақсад – инсон, унинг ҳаёти, эркинлиги, шаъни, қадр-қиммати ва бошқа ажралмас ҳуқуқларини ҳимоя қилиш мақсади ётади. Қонун устуворлиги таъминланган ва тартиб-интизом қарор топган жамиятдагина ривожланиш, тинчлик ва ҳақиқий фаровонлик бўлади. Шундай экан, йўлларда ҳаракатланиш чоғида ўрнатилган қоидаларга қатъий амал қилиш орқали нафақат ўзимизнинг, балки атрофдагиларнинг ҳам хавфсизлиги ва ҳаётини асраб қолишимизни ҳеч қачон унутмаслигимиз лозим.