МУНОСИБ ЭЪТИРОФ

Аждодларимиздан мерос миллий қадриятларимиз, анъаналаримиз ва урф-одатларимизни ўзида мужассам этувчи маҳалла институтининг жамиятимиз ривожида муҳим ўрни бор. Ахир маҳалла – Ватан ичра кичик Ватандир. Бу ҳудуднинг тинч-осойишталиги, фаровонлиги, ҳамжиҳатлиги эл оқсоқолига кўп жиҳатдан боғлиқ.

Туманимиздаги Қиличбой овул фуқаролар йиғини раиси Баҳром Қодиров  5 йилдан бери ана шундай масъулиятли лавозимда фаолият юритиб келмоқда.

Унинг асли мутахассислиги инженер-механик. Фарғона политехника институтини битириб келиб, илк мутахассислик фаолиятини Манғит махсус тажриба заводида инженер-конструктор бўлиб ишлашдан бошлаган.

Кейинчалик собиқ М.Горький номли давлат хўжалигида таъминотчи, 41-сонли ва Амударё маиший хизмат кўрсатиш касб-ҳунар коллежида масъул лавозимларда, шу муассаса директори бўлиб фаолият юритди. 2019 йилдан бери эса овул  фуқаролар йиғини раиси лавозимида ишлаб келаётир.

Ҳудуд аҳолиси кўпмиллатли. Уларнинг миллий қадриятлари, урф-одатларини ҳурмат қилган ҳолда ривожлантиришга кўмаклашиш, маҳаллий аҳамиятга молик масалаларни ҳамжиҳатликда ҳал этиш, уларнинг маданияти ва ижтимоий фаоллигини ошириш, “Обод ва хавфсиз маҳалла” тамойили асосида фуқароларнинг тинч-осойишталигини, ижтимоий-маънавий муҳит барқарорлигини таъминлаш табиийки, йиғин раисидан тинимсиз меҳнатни талаб қилади. Баҳром Қодиров вақт билан ҳисоблашмай, аҳоли мурожаатларига ечим топишга интилади, ҳар бир хонадондаги аҳвол билан танишиб, улар ҳаётини яхшилаш юзасидан чоралар излайди.

Кейинги йилларда ишсиз ёшларнинг бандлигини таъминлаш, тадбиркорлик фаолиятига жалб қилиш, ўз-ўзини банд қилишига эришиш борасида маҳалладаги ҳоким ёрдамчиси, ёшлар етакчиси, хотин-қизлар фаоли билан ҳамкорликда кўпгина ишлар қилинди. Шунингдек, ижтимоий ҳимояга муҳтож оилаларни, боқувчисини йўқотган, ногиронлиги бўлган аъзоси бор оилаларни қўллаб-қувватлашга ҳам алоҳида эътибор қаратилмоқда. Турли миллат вакиллари орасида яқин қўшничилик ришталари мустаҳкам, ўзаро аҳил яшаётган қиличбойликлар Баҳром Қодировнинг овулдаги ривожланиш, янгиланишлардаги, ҳудудни ободонлаштириш, кўкаламзорлаштириш, файзли масканга айлантиришдаги хизматларини юксак эътироф этишади. Шу боисдан уни Қиличбой сайлов округидан туман Кенгашига депутат қилиб ҳам сайлашган.

Жорий йилнинг 22 март санаси Баҳром Қодировнинг ҳаётида ўчмас из қолдирди: у фуқароларнинг ўзини ўзи бошқариш органларининг ўрни ва ролини кучайтириш, ҳудудда маънавий муҳит барқарорлигини, миллатлараро ҳамжиҳатликни таъминлаш, ёш авлодни юртимизга муносиб инсонлар қилиб тарбиялаш ишига қўшган ҳиссаси учун “Маҳалла ифтихори” кўкрак нишони билан тақдирланди.

2017 йилда давлатимиз раҳбари  Ш.Мирзиёев қарорига мувофиқ таъсис этилган ушбу кўкрак нишонига муносиб кўрилгани Баҳром Қодировга чексиз қувонч бахш этиш билан бирга янада улкан масъулият юклади.

Меҳнатларининг муносиб эътироф этилаётгани эса унга куч-қувват бағишлайди.

Биз маҳалла ифтихорига айланган Баҳром Қодировнинг келгуси ишларида ҳам муваффақиятлар тилаймиз.

Севара ИСМОИЛОВА.