MUNOSIB EʼTIROF

Ajdodlarimizdan meros milliy qadriyatlarimiz, anʼanalarimiz va urf-odatlarimizni oʻzida mujassam etuvchi mahalla institutining jamiyatimiz rivojida muhim oʻrni bor. Axir mahalla – Vatan ichra kichik Vatandir. Bu hududning tinch-osoyishtaligi, farovonligi, hamjihatligi el oqsoqoliga koʻp jihatdan bogʻliq.

Tumanimizdagi Qilichboy ovul fuqarolar yigʻini raisi Bahrom Qodirov  5-yildan beri ana shunday masʼuliyatli lavozimda faoliyat yuritib kelmoqda.

Uning asli mutaxassisligi injener-mexanik. Fargʻona politexnika institutini bitirib kelib, ilk mutaxassislik faoliyatini Mangʻit maxsus tajriba zavodida injener-konstruktor boʻlib ishlashdan boshlagan.

Keyinchalik sobiq M.Gorkiy nomli davlat xoʻjaligida taʼminotchi, 41-sonli va Amudaryo maishiy xizmat koʻrsatish kasb-hunar kollejida masʼul lavozimlarda, shu muassasa direktori boʻlib faoliyat yuritdi. 2019-yildan beri esa ovul  fuqarolar yigʻini raisi lavozimida ishlab kelayotir.

Hudud aholisi koʻpmillatli. Ularning milliy qadriyatlari, urf-odatlarini hurmat qilgan holda rivojlantirishga koʻmaklashish, mahalliy ahamiyatga molik masalalarni hamjihatlikda hal etish, ularning madaniyati va ijtimoiy faolligini oshirish, “Obod va xavfsiz mahalla” tamoyili asosida fuqarolarning tinch-osoyishtaligini, ijtimoiy-maʼnaviy muhit barqarorligini taʼminlash tabiiyki, yigʻin raisidan tinimsiz mehnatni talab qiladi. Bahrom Qodirov vaqt bilan hisoblashmay, aholi murojaatlariga yechim topishga intiladi, har bir xonadondagi ahvol bilan tanishib, ular hayotini yaxshilash yuzasidan choralar izlaydi.

Keyingi yillarda ishsiz yoshlarning bandligini taʼminlash, tadbirkorlik faoliyatiga jalb qilish, oʻz-oʻzini band qilishiga erishish borasida mahalladagi hokim yordamchisi, yoshlar yetakchisi, xotin-qizlar faoli bilan hamkorlikda koʻpgina ishlar qilindi. Shuningdek, ijtimoiy himoyaga muhtoj oilalarni, boquvchisini yoʻqotgan, nogironligi boʻlgan aʼzosi bor oilalarni qoʻllab-quvvatlashga ham alohida eʼtibor qaratilmoqda. Turli millat vakillari orasida yaqin qoʻshnichilik rishtalari mustahkam, oʻzaro ahil yashayotgan qilichboyliklar Bahrom Qodirovning ovuldagi rivojlanish, yangilanishlardagi, hududni obodonlashtirish, koʻkalamzorlashtirish, fayzli maskanga aylantirishdagi xizmatlarini yuksak eʼtirof etishadi. Shu boisdan uni Qilichboy saylov okrugidan tuman Kengashiga deputat qilib ham saylashgan.

Joriy yilning 22-mart sanasi Bahrom Qodirovning hayotida oʻchmas iz qoldirdi: u fuqarolarning oʻzini oʻzi boshqarish organlarining oʻrni va rolini kuchaytirish, hududda maʼnaviy muhit barqarorligini, millatlararo hamjihatlikni taʼminlash, yosh avlodni yurtimizga munosib insonlar qilib tarbiyalash ishiga qoʻshgan hissasi uchun “Mahalla iftixori” koʻkrak nishoni bilan taqdirlandi.

2017-yilda davlatimiz rahbari  Sh.Mirziyoyev qaroriga muvofiq taʼsis etilgan ushbu koʻkrak nishoniga munosib koʻrilgani Bahrom Qodirovga cheksiz quvonch baxsh etish bilan birga yanada ulkan masʼuliyat yukladi.

Mehnatlarining munosib eʼtirof etilayotgani esa unga kuch-quvvat bagʻishlaydi.

Biz mahalla iftixoriga aylangan Bahrom Qodirovning kelgusi ishlarida ham muvaffaqiyatlar tilaymiz.

Sevara ISMOILOVA.