МАҲАЛЛАЛАР КЎЧАЛАРИ ОБОДОНЛАШТИРИЛИБ, АҲОЛИГА ҚУЛАЙЛИК ЯРАТИЛМОҚДА

Сўнгги йилларда мамлакатимизда халқ фаровонлигини ошириш, яшаш шароитларини яхшилаш, энг чекка ҳудудлар аҳолиси учун ҳам муносиб ва сифатли турмуш тарзини шакллантириш, халқимизнинг ўз ҳаётидан рози яшашлари учун зарур бўлган имкониятларни яратишга алоҳида эътибор қаратилмоқда. Айниқса, Ўзбекистон Республикаси Президентининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги Қарорининг ижросини таъминлашга қаратилган кенг қамровли қурилиш-ободонлаштириш ишлари овул ва маҳаллалар қиёфасини тубдан ўзгартириб юборди.

Мазкур Қарор ижросини таъминлаш мақсадида Амударё тумани ҳудудидаги мавжуд муаммоларни бартараф этиш, овул ва маҳаллалар инфратузилмасини ривожлантиришга алоҳида эътибор қаратилмоқда. Туманда ушбу мақсадлар учун 25 млрд. 595 млн. сўм маблағ ажратилиши кўзда тутилган. Унга кўра, жами 26 та объектда, жумладан 20 та маҳаллада ички йўлларни таъмирлаш, 2 та маҳаллада сув иншоотларини реконструкция қилиш, 2 та маҳалла учун маъмурий бино барпо этиш, 1 та маҳаллада болалар спорт майдончасини янгидан қуриш, 1 та маҳаллада электр тармоқларини тортиш ишларини амалга ошириш белгиланган.

Овул ва маҳаллаларни ободонлаштириш мақсадида ажратилиши кўзда тутилган маблағлар ҳисобидан 20 та овул ва маҳаллалар ҳудудидаги умумий қиймати 11 млрд. 267 млн. сўмлик 55,2 км. узунликдаги ички йўлларни таъмирлаш, шундан 51,5 км. қисмига шағал-тош ётқизиш, 1,6 км. қисмига асфальт қопламасини ва 2,1 км. узунликдаги кўчаларга тош-шағал аралашмаси қопламасини ётқизиш ишларини амалга ошириш белгиланган бўлиб, айни пайтда, режалаштирилган жами объектларда 350 млн. сўмлик қурилиш-таъмирлаш ишлари амалга оширилди.

Шунингдек, тумандаги Намуна, Қумёп маҳаллалари, Қипчоқ шаҳарчаси, Дўстлик, Хизр эли, Юқори қишлоқ, Жумуровул, Дарёбўйи, Арна бўйи, Гулзор, А.Навоий номли маҳаллалар ҳамда Ўрта қалъа овул фуқаролар йиғини ҳудудларида амалга оширилиши кўзда тутилган қурилиш-таъмирлаш ва бунёдкорлик ишлари пудратчи ташкилотлар томонидан белгиланган режага мувофиқ амалга оширилмоқда.

Манғит шаҳрининг Дўстлик маҳалла фуқаролар йиғини ҳудудида ҳам мавжуд муаммоларни бартараф этиш, маҳалла инфратузилмасини ривожлантиришга қаратилган қурилиш-таъмирлаш, ободонлаштириш ишлари белгиланган режа асосида муваффақиятли амалга оширилмоқда. Айниқса, маҳалла кўчаларида тиклаш-таъмирлаш ишларининг сифатли бажарилишига асосий эътибор қаратилмоқда. Маҳалла ҳудудида қиймати 334,3 млн. сўмлик болалар спорт майдончасини янгидан қуриш, шунингдек, 2,7 метр узунликдаги кўчаларда тиклаш- таъмирлаш, ободонлаштириш ишларини амалга ошириш белгиланган бўлиб, айни пайтда ҳудуд кўчаларида олиб борилаётган кенг кўламли қурилиш-таъмирлаш ишларини “Тахиатош йўллардан мунтазам фойдаланиш” идораси йўл қурувчилари амалга оширишмоқда.

Маҳалла ҳудудидаги “Иқбол” ва “Шўрчи” кўчаларининг 2,7 метр қисмига шағал-тош ётқизиш, асфальтлаш ишларида мазкур идоранинг йўл қурувчи-техник устаси Аманбек Арисов, автогрейдерчи Жолдасбай Ҳабибаллуев ва каток агрегатини Байрам Бердимуратовлар кўчаларнинг сифатли таъмирланишида фидойилик билан меҳнат қилишмоқда. Чунки йўл ва кўчаларнинг ободлиги ушбу ҳудудда истиқомат қилувчи аҳоли учун қулай ва обод манзиллар барпо этишдаги биринчи муҳим вазифа эканлигини йўл қурувчи-усталар жуда яхши билишади. Маҳалла аҳли эса қор-ёмғирли кунларда ноқулайлик туғдираётган кўчалар текис ва равон, ободонлашиб бораётганидан мамнун.

Робия ЙЎЛДОШЕВА.