MAHALLALAR KOʻChALARI OBODONLAShTIRILIB, AHOLIGA QULAYLIK YaRATILMOQDA

Soʻnggi yillarda mamlakatimizda xalq farovonligini oshirish, yashash sharoitlarini yaxshilash, eng chekka hududlar aholisi uchun ham munosib va sifatli turmush tarzini shakllantirish, xalqimizning oʻz hayotidan rozi yashashlari uchun zarur boʻlgan imkoniyatlarni yaratishga alohida eʼtibor qaratilmoqda. Ayniqsa, Oʻzbekiston Respublikasi Prezidentining 2022-yil 25-oktyabrdagi “2022-2023-yillarda mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi Qarorining ijrosini taʼminlashga qaratilgan keng qamrovli qurilish-obodonlashtirish ishlari ovul va mahallalar qiyofasini tubdan oʻzgartirib yubordi.

Mazkur Qaror ijrosini taʼminlash maqsadida Amudaryo tumani hududidagi mavjud muammolarni bartaraf etish, ovul va mahallalar infratuzilmasini rivojlantirishga alohida eʼtibor qaratilmoqda. Tumanda ushbu maqsadlar uchun 25 mlrd. 595 mln. soʻm mablagʻ ajratilishi koʻzda tutilgan. Unga koʻra, jami 26 ta obʼektda, jumladan 20 ta mahallada ichki yoʻllarni taʼmirlash, 2 ta mahallada suv inshootlarini rekonstruktsiya qilish, 2 ta mahalla uchun maʼmuriy bino barpo etish, 1 ta mahallada bolalar sport maydonchasini yangidan qurish, 1 ta mahallada elektr tarmoqlarini tortish ishlarini amalga oshirish belgilangan.

Ovul va mahallalarni obodonlashtirish maqsadida ajratilishi koʻzda tutilgan mablagʻlar hisobidan 20 ta ovul va mahallalar hududidagi umumiy qiymati 11 mlrd. 267 mln. soʻmlik 55,2 km. uzunlikdagi ichki yoʻllarni taʼmirlash, shundan 51,5 km. qismiga shagʻal-tosh yotqizish, 1,6 km. qismiga asfalt qoplamasini va 2,1 km. uzunlikdagi koʻchalarga tosh-shagʻal aralashmasi qoplamasini yotqizish ishlarini amalga oshirish belgilangan boʻlib, ayni paytda, rejalashtirilgan jami obʼektlarda 350 mln. soʻmlik qurilish-taʼmirlash ishlari amalga oshirildi.

Shuningdek, tumandagi Namuna, Qumyop mahallalari, Qipchoq shaharchasi, Doʻstlik, Xizr eli, Yuqori qishloq, Jumurovul, Daryoboʻyi, Arna boʻyi, Gulzor, A.Navoiy nomli mahallalar hamda Oʻrta qalʼa ovul fuqarolar yigʻini hududlarida amalga oshirilishi koʻzda tutilgan qurilish-taʼmirlash va bunyodkorlik ishlari pudratchi tashkilotlar tomonidan belgilangan rejaga muvofiq amalga oshirilmoqda.

Mangʻit shahrining Doʻstlik mahalla fuqarolar yigʻini hududida ham mavjud muammolarni bartaraf etish, mahalla infratuzilmasini rivojlantirishga qaratilgan qurilish-taʼmirlash, obodonlashtirish ishlari belgilangan reja asosida muvaffaqiyatli amalga oshirilmoqda. Ayniqsa, mahalla koʻchalarida tiklash-taʼmirlash ishlarining sifatli bajarilishiga asosiy eʼtibor qaratilmoqda. Mahalla hududida qiymati 334,3 mln. soʻmlik bolalar sport maydonchasini yangidan qurish, shuningdek, 2,7 metr uzunlikdagi koʻchalarda tiklash- taʼmirlash, obodonlashtirish ishlarini amalga oshirish belgilangan boʻlib, ayni paytda hudud koʻchalarida olib borilayotgan keng koʻlamli qurilish-taʼmirlash ishlarini “Taxiatosh yoʻllardan muntazam foydalanish” idorasi yoʻl quruvchilari amalga oshirishmoqda.

Mahalla hududidagi “Iqbol” va “Shoʻrchi” koʻchalarining 2,7 metr qismiga shagʻal-tosh yotqizish, asfaltlash ishlarida mazkur idoraning yoʻl quruvchi-texnik ustasi Amanbek Arisov, avtogreyderchi Joldasbay Habiballuyev va katok agregatini Bayram Berdimuratovlar koʻchalarning sifatli taʼmirlanishida fidoyilik bilan mehnat qilishmoqda. Chunki yoʻl va koʻchalarning obodligi ushbu hududda istiqomat qiluvchi aholi uchun qulay va obod manzillar barpo etishdagi birinchi muhim vazifa ekanligini yoʻl quruvchi-ustalar juda yaxshi bilishadi. Mahalla ahli esa qor-yomgʻirli kunlarda noqulaylik tugʻdirayotgan koʻchalar tekis va ravon, obodonlashib borayotganidan mamnun.

Robiya YOʻLDOShEVA.