Aholiga yetkazib berilayotgan ichimlik suvidan namunalar olinib, sifati tekshirilmoqda

Qoraqalpogʻiston Respublikasi qurilish va uy-joy kommunal xoʻjaligi sohasida nazorat qilish inspektsiyasi xodimlari isteʼmolchilarga yetkazib berilayotgan ichimlik suvining sifati, xavfsizligi va uzluksizligini doimiy ravishda nazorat qilib borishmoqda. Bu jarayonda nafaqat suv taʼminoti korxonalarining faoliyati, balki bevosita mahallalar va xonadonlardagi joʻmraklardan oqayotgan suvning tarkibi ham muntazam ravishda oʻrganib borilmoqda.

Mazkur yoʻnalishdagi navbatdagi nazorat-oʻrganish tadbirlari Amudaryo tumani hududida tashkil etildi.

Tuman Sanitariya-epidemiologik osoyishtalik va jamoat salomatligi boʻlimi hamda “Qoraqalpoq suv taʼminoti” aktsiyadorlik jamiyatining tuman boʻlimi mutaxassislaridan iborat ishchi guruh aʼzolari aholi yashash xonadonlariga tashrif buyurib, odamlarning kundalik turmushda isteʼmol qilayotgan suv tarmoqlaridan maxsus chuqurlashtirilgan laboratoriya tahlillari uchun tegishli namunalar olishdi. Bunday amaliy tadbirlar suvning real holatini baholash va yuzaga kelishi mumkin boʻlgan turli xil kasalliklarning erta oldini olish imkonini beradi.

Respublika miqyosida suv sifatini nazorat qilish tadbirlari keng koʻlamda va muntazam ravishda olib borilmoqda. Aniq raqamlarga murojaat qiladigan boʻlsak, 2026-yilning oʻtgan 7 oyi davomida Qoraqalpogʻiston Respublikasi Sanitariya-epidemiologik osoyishtalik va jamoat salomatligi qoʻmitasi bilan hamkorlikda markazlashgan tarmoqlar orqali yetkazib berilayotgan ichimlik suvi sifati boʻyicha jami 914 ta laboratoriya tahlillari oʻtkazilgan. Bu kabi murakkab tahlillar isteʼmolchilarga taqdim etilayotgan suvning amaldagi milliy standart talablariga qay darajada muvofiqligini aniqlash imkonini beradi.

Oʻrganishlar natijalariga koʻra, baʼzi hududlardagi suvning tarkibida belgilangan sanitariya meʼyorlaridan chetga chiqish holatlari qayd qilingan. Yaʼni 28 ta salbiy holat aniqlangan boʻlib, shulardan suvning kimyoviy koʻrsatkichlari boʻyicha Nukus tumanida 2 ta, Toʻrtkoʻl tumanida 3 ta, Xoʻjayli tumanida 4 ta hamda Taxiatosh tumanida 3 ta holatda nomuvofiqliklar qayd etilgan. Suvning bakteriologik koʻrsatkichlar boʻyicha esa Qoraoʻzak tumanida 2 ta va Nukus shahrida 2 ta salbiy holat aniqlangan.

Aniqlangan ushbu salbiy holatlar boʻyicha inspektsiya tomonidan zudlik bilan tezkor choralar koʻrilgan. Xususan, “Qoraqalpoq suv taʼminoti” aktsiyadorlik jamiyatiga yoʻl qoʻyilgan kamchiliklarni qisqa muddatlarda bartaraf etish yuzasidan qatʼiy koʻrsatma va tegishli taqdimnomalar kiritilgan.

Olib borilgan tezkor saʼy-harakatlar natijasida, yuqorida qayd etilgan hududlardagi ichimlik suvi tarmoqlari toʻliq tozalangan hamda suv taqsimlash inshootlari va obʼektlaridagi barcha uskunalarni yuvish, dezinfektsiya qilish ishlari belgilangan tartibda, sifatli amalga oshirilgan.

Aholini toza ichimlik suvi bilan taʼminlash borasidagi bunday tizimli oʻrganishlar va kundalik nazorat tadbirlari bundan keyin ham izchil davom ettiriladi.