Аҳолига етказиб берилаётган ичимлик сувидан намуналар олиниб, сифати текширилмоқда

Қорақалпоғистон Республикаси қурилиш ва уй-жой коммунал хўжалиги соҳасида назорат қилиш инспекцияси ходимлари истеъмолчиларга етказиб берилаётган ичимлик сувининг сифати, хавфсизлиги ва узлуксизлигини доимий равишда назорат қилиб боришмоқда. Бу жараёнда нафақат сув таъминоти корхоналарининг фаолияти, балки бевосита маҳаллалар ва хонадонлардаги жўмраклардан оқаётган сувнинг таркиби ҳам мунтазам равишда ўрганиб борилмоқда.

Мазкур йўналишдаги навбатдаги назорат-ўрганиш тадбирлари Амударё тумани ҳудудида ташкил этилди.

Туман Санитария-эпидемиологик осойишталик ва жамоат саломатлиги бўлими ҳамда “Қорақалпоқ сув таъминоти” акциядорлик жамиятининг туман бўлими мутахассисларидан иборат ишчи гуруҳ аъзолари аҳоли яшаш хонадонларига ташриф буюриб, одамларнинг кундалик турмушда истеъмол қилаётган сув тармоқларидан махсус чуқурлаштирилган лаборатория таҳлиллари учун тегишли намуналар олишди. Бундай амалий тадбирлар сувнинг реал ҳолатини баҳолаш ва юзага келиши мумкин бўлган турли хил касалликларнинг эрта олдини олиш имконини беради.

Республика миқёсида сув сифатини назорат қилиш тадбирлари кенг кўламда ва мунтазам равишда олиб борилмоқда. Аниқ рақамларга мурожаат қиладиган бўлсак, 2026 йилнинг ўтган 7 ойи давомида Қорақалпоғистон Республикаси Санитария-эпидемиологик осойишталик ва жамоат саломатлиги қўмитаси билан ҳамкорликда марказлашган тармоқлар орқали етказиб берилаётган ичимлик суви сифати бўйича жами 914 та лаборатория таҳлиллари ўтказилган. Бу каби мураккаб таҳлиллар истеъмолчиларга тақдим этилаётган сувнинг амалдаги миллий стандарт талабларига қай даражада мувофиқлигини аниқлаш имконини беради.

Ўрганишлар натижаларига кўра, баъзи ҳудудлардаги сувнинг таркибида белгиланган санитария меъёрларидан четга чиқиш ҳолатлари қайд қилинган. Яъни 28 та салбий ҳолат аниқланган бўлиб, шулардан сувнинг кимёвий кўрсаткичлари бўйича Нукус туманида 2 та, Тўрткўл туманида 3 та, Хўжайли туманида 4 та ҳамда Тахиатош туманида 3 та ҳолатда номувофиқликлар қайд этилган. Сувнинг бактериологик кўрсаткичлар бўйича эса Қораўзак туманида 2 та ва Нукус шаҳрида 2 та салбий ҳолат аниқланган.

Аниқланган ушбу салбий ҳолатлар бўйича инспекция томонидан зудлик билан тезкор чоралар кўрилган. Хусусан, “Қорақалпоқ сув таъминоти” акциядорлик жамиятига йўл қўйилган камчиликларни қисқа муддатларда бартараф этиш юзасидан қатъий кўрсатма ва тегишли тақдимномалар киритилган.

Олиб борилган тезкор саъй-ҳаракатлар натижасида, юқорида қайд этилган ҳудудлардаги ичимлик суви тармоқлари тўлиқ тозаланган ҳамда сув тақсимлаш иншоотлари ва объектларидаги барча ускуналарни ювиш, дезинфекция қилиш ишлари белгиланган тартибда, сифатли амалга оширилган.

Аҳолини тоза ичимлик суви билан таъминлаш борасидаги бундай тизимли ўрганишлар ва кундалик назорат тадбирлари бундан кейин ҳам изчил давом эттирилади.