“Коррупцияга қарши биргаликда курашамиз” мавзусида ўтказилган иншолар танлови ғолиблари аниқланди

Коррупция – инсонни қийин аҳволга солиб, руҳан эзиши, адолатсизликка кенг йўл очиши билан ҳам жуда хавфлидир. Бу шахснинг ўз мансаб ёки хизмат мавқеидан фойдаланиб, шахсий манфаат орттириши йўлидаги ҳаракатларидан кўпчилик азият чекадиган иллатдир. Инсон ҳуқуқ ва эркинликларининг поймол бўлишига олиб келишидан ташқари, ҳар қандай давлат ёки жамиятнинг сиёсий-иқтисодий ривожланишига жиддий путур етказади.

Коррупция жинояти фақатгина бир ёки бир нечта давлатларга хос эмас. Балки, дунё миқёсида ҳал этилиши лозим бўлган глобал муаммодир. Ушбу жиноят содир этилиши халқнинг давлат бошқарувига бўлган ишончи сусайишига олиб келиши унинг энг ачинарли оқибатларидан биридир. Шу боисдан ҳам мамлакатимизда ҳозирги вақтда ижтимоий-иқтисодий ва сиёсий-ҳуқуқий муаммолар орасида коррупцияга қарши кураш муаммоси муҳим ўрин тутади.

Бу борадаги ишларни юқори ташкил этиш, зарарли иллатга қарши курашни кенг авж олдириш, коррупциянинг зарарли оқибатларини жамоатчиликка тарғиб этиш мақсадида мамлакатимизда 9 декабрь – Халқаро коррупцияга қарши курашиш куни қилиб белгиланган. Сана муносабати билан Аксилкоррупция ҳафталиги ўтказилди.

Ҳафталик доирасида туманимизда ҳам коррупциянинг инсоният ва жамият тараққиётига салбий таъсирини ифодаловчи кўпгина тадбирлар ўтказилди. Туманимиздаги умумий ўрта таълим мактабларининг 8-, 11-синфлари ўқувчилари орасида туман ҳокимлиги, туман Халқ таълими ва Ёшлар ишлари агентлиги туман бўлими томонидан “Коррупцияга қарши биргаликда курашамиз” мавзусида ўтказилган иншолар танлови ҳам шулар жумласидандир.

Танловда ўқувчиларнинг коррупциянинг салбий оқибатлари хусусидаги ва бу иллатга қарши кураш самарадорлигини оширишга қаратилган таъсирчан чоралар амалга оширилиши лозимлиги хусусидаги ёзган фикрлари эътиборни тортади.

Ҳакамлар ҳайъати аъзоларининг билдиришича, ўқувчиларнинг аксарияти коррупцияни ўз шахсий манфаати йўлида пора олиш ёки пора бериш сифатида таърифлашган. Айримлари эса шахснинг ўз манфаати йўлидаги қонунга хилоф ҳаракати сифатида баҳолашган.

Танловга тақдим этилган иншолар ғоявий жиҳатдан мазмундорлиги, хатоларсиз, чиройли ёзилишига қараб, ҳаққоний баҳоланди.

Танловда иштирок этган ўқувчилар орасида 31-сонли мактаб ўқувчиси Шаҳноза Тозабоева 89 балл тўплаб биринчи, 61-сонли мактаб ўқувчиси 85 балл тўплаб иккинчи, 26-сонли мактаб ўқувчиси Рухшона Ҳусанова 78 балл тўплаб учинчи ўринларни эгалладилар.

9 декабрь куни туман ҳокимлигида ушбу танлов ғолибларини тақдирлаш маросими бўлиб ўтди. Унда иншолар танлови ғолиблари, уларнинг устозлари иштирок этдилар.

Йиғилишни туман ҳокими ўринбосари Рашид Салаев очди ва олиб борди. У коррупциявий ҳуқуқбузарликларни ўз вақтида аниқлаш, уларнинг оқибатларини бартараф этиш, олдини олиш, шу тоифадаги ҳуқуқбузарликни содир этганлик учун жавобгарликнинг муқаррарлиги таъминланиши хусусида маъруза қилди. Шу мавзуда ўқувчиларнинг билимларини синаш мақсадида ўтказилган иншолар танловидаги ғолиб бўлган ўқувчиларни рағбатлантириш мақсадида таклиф этилганлигини маълум қилди.

Иншолар танловида танловида ғолибликни қўлга киритган ўқувчиларга туман ҳокимлигининг совғалари тақдим этилди.

Коррупция чегара билмайдиган, кенг кўламли ижтимоий ҳодисадир. Унинг келиб чиқиши, салбий оқибатлари ҳақида ўқувчи-ёшларнинг ўз фикри ва хулосалари борлиги жуда аҳамиятлидир.

Ойгул РАЖАБОВА.