“Korruptsiyaga qarshi birgalikda kurashamiz” mavzusida oʻtkazilgan insholar tanlovi gʻoliblari aniqlandi

Korruptsiya – insonni qiyin ahvolga solib, ruhan ezishi, adolatsizlikka keng yoʻl ochishi bilan ham juda xavflidir. Bu shaxsning oʻz mansab yoki xizmat mavqeidan foydalanib, shaxsiy manfaat orttirishi yoʻlidagi harakatlaridan koʻpchilik aziyat chekadigan illatdir. Inson huquq va erkinliklarining poymol boʻlishiga olib kelishidan tashqari, har qanday davlat yoki jamiyatning siyosiy-iqtisodiy rivojlanishiga jiddiy putur yetkazadi.

Korruptsiya jinoyati faqatgina bir yoki bir nechta davlatlarga xos emas. Balki, dunyo miqyosida hal etilishi lozim boʻlgan global muammodir. Ushbu jinoyat sodir etilishi xalqning davlat boshqaruviga boʻlgan ishonchi susayishiga olib kelishi uning eng achinarli oqibatlaridan biridir. Shu boisdan ham mamlakatimizda hozirgi vaqtda ijtimoiy-iqtisodiy va siyosiy-huquqiy muammolar orasida korruptsiyaga qarshi kurash muammosi muhim oʻrin tutadi.

Bu boradagi ishlarni yuqori tashkil etish, zararli illatga qarshi kurashni keng avj oldirish, korruptsiyaning zararli oqibatlarini jamoatchilikka targʻib etish maqsadida mamlakatimizda 9-dekabr – Xalqaro korruptsiyaga qarshi kurashish kuni qilib belgilangan. Sana munosabati bilan Aksilkorruptsiya haftaligi oʻtkazildi.

Haftalik doirasida tumanimizda ham korruptsiyaning insoniyat va jamiyat taraqqiyotiga salbiy taʼsirini ifodalovchi koʻpgina tadbirlar oʻtkazildi. Tumanimizdagi umumiy oʻrta taʼlim maktablarining 8-, 11-sinflari oʻquvchilari orasida tuman hokimligi, tuman Xalq taʼlimi va Yoshlar ishlari agentligi tuman boʻlimi tomonidan “Korruptsiyaga qarshi birgalikda kurashamiz” mavzusida oʻtkazilgan insholar tanlovi ham shular jumlasidandir.

Tanlovda oʻquvchilarning korruptsiyaning salbiy oqibatlari xususidagi va bu illatga qarshi kurash samaradorligini oshirishga qaratilgan taʼsirchan choralar amalga oshirilishi lozimligi xususidagi yozgan fikrlari eʼtiborni tortadi.

Hakamlar hayʼati aʼzolarining bildirishicha, oʻquvchilarning aksariyati korruptsiyani oʻz shaxsiy manfaati yoʻlida pora olish yoki pora berish sifatida taʼriflashgan. Ayrimlari esa shaxsning oʻz manfaati yoʻlidagi qonunga xilof harakati sifatida baholashgan.

Tanlovga taqdim etilgan insholar gʻoyaviy jihatdan mazmundorligi, xatolarsiz, chiroyli yozilishiga qarab, haqqoniy baholandi.

Tanlovda ishtirok etgan oʻquvchilar orasida 31-sonli maktab oʻquvchisi Shahnoza Tozaboyeva 89 ball toʻplab birinchi, 61-sonli maktab oʻquvchisi 85 ball toʻplab ikkinchi, 26-sonli maktab oʻquvchisi Ruxshona Husanova 78 ball toʻplab uchinchi oʻrinlarni egalladilar.

9-dekabr kuni tuman hokimligida ushbu tanlov gʻoliblarini taqdirlash marosimi boʻlib oʻtdi. Unda insholar tanlovi gʻoliblari, ularning ustozlari ishtirok etdilar.

Yigʻilishni tuman hokimi oʻrinbosari Rashid Salayev ochdi va olib bordi. U korruptsiyaviy huquqbuzarliklarni oʻz vaqtida aniqlash, ularning oqibatlarini bartaraf etish, oldini olish, shu toifadagi huquqbuzarlikni sodir etganlik uchun javobgarlikning muqarrarligi taʼminlanishi xususida maʼruza qildi. Shu mavzuda oʻquvchilarning bilimlarini sinash maqsadida oʻtkazilgan insholar tanlovidagi gʻolib boʻlgan oʻquvchilarni ragʻbatlantirish maqsadida taklif etilganligini maʼlum qildi.

Insholar tanlovida tanlovida gʻoliblikni qoʻlga kiritgan oʻquvchilarga tuman hokimligining sovgʻalari taqdim etildi.

Korruptsiya chegara bilmaydigan, keng koʻlamli ijtimoiy hodisadir. Uning kelib chiqishi, salbiy oqibatlari haqida oʻquvchi-yoshlarning oʻz fikri va xulosalari borligi juda ahamiyatlidir.

Oygul RAJABOVA.