Шаҳзодалар эртакда бўлади...(ми?)

Муҳаббат ҳақида кўп ёзасан, дейишади менга. Ўйлаб қарасам, ҳақиқатан шундай экан. Бундай бўлиши табиий. Ахир инсон – муҳаббат меваси.  Муҳаббатсиз бир кунингизни тасаввур қилиб кўринг...  Сизга ҳар куни:

– Ўзингни эҳтиёт қилгин, онаси, – дея "танбеҳ" берадиган турмуш ўртоғингизни, фараз қилинг, йўқотиб қўйдингиз. Айтайлик, қаергадир сафарга кетди. Сизга ҳар куни:

– Дадаси, қаердасиз? Нима қиляпсиз? Ишдан келишингизга нима овқат қилиб қўяй? – дея саволларга кўмиб ташлайдиган аёлингиз, сиздан бир куни умуман хабар олмади. Қўнғироқларингизга ҳам жавоб бермади. Жим-жит...

Менимча, яхши кўрган инсонингни йўқотишни тасаввур қилишнинг ўзи бир қўрқинчли... Шоирона қилиб айтадиган бўлсам, муҳаббат бу – дунёнинг устуни! Аммо ана шу устунни барпо этиш, кимнингдир кўнглидан жой олиш, кимдир сенинг кўнглингдан жой олиши ва муҳаббатнинг яралиши қизиқ-да.

Яқинда менга бир нотаниш рақамдан қўнғироқ бўлди. Қўнғироққа жавоб бермадим.  Телефон қўнғироқлари тинмади. Ниҳоятда безор бўлганимдан сўнг, гўшакни кўтардим. Нотаниш йигит мендан ҳол-аҳвол сўраб бўлгач, мақсадга кўчди. Агар рози бўлсам, мен билан оила қурмоқчилигини айтди. Орага бир лаҳза жимлик чўкди. Ва менинг унга:

– Қандай қизни орзу қиласиз? – деган саволим орадаги жимликни бузди.  Йигит жавоб берди:

– Ўқиган. Уйим-жойим дейдиган. Онам кўп айтади, ўқиган, қўлида дипломи бор қизга уйлансанг, сени хор қилмайди...

Унинг охирги гапларини эшитмасдан, телефонни қўйиб қўйдим. Зеро, менинг кўнглимда ва жамики қизларнинг қалбида бундай орсиз, тепса-тебранмас "шаҳзода"ларга ўрин йўқ!

Йигитнинг сўнгги сўзларини эшитиб, бир кулгинг келади, бир йиғлагинг. Ўйлаб қолдим, келажакдаги рўзғорини хотинининг бўйнига мўлжаллаб, "дипломли малика" ахтариб юрган ориятсиз йигитлар ҳам бор экан-да. Савол туғилади: келажакни бўлғуси келин болага ишониб юрган бу йигитнинг бугуни қандай кечаётган экан?!  Хуллас, шу тариқа "оқ отли шаҳзода"лар ҳақидаги хаёлларим лойқаланиб кетди. Назаримда, шаҳзодалар фақат эртакда бўладигандай туюлди.

Ҳа, қизларнинг қалбида ўзи яратиб олган "оқ отли шаҳзода"си борки, у барча нуқсонлардан йироқ, мукаммал шахс. Унда ҳеч қандай камчилик йўқ. У қизнинг талабларига тўлиқ жавоб беради. У меҳрибон. У ҳеч кимга ўхшамайди... Мана унинг хаёлий портрети. Бояги йигитга ўхшаганлар эса... Уларга сўз увол. Уларга умр увол. Чунки ҳақиқий муҳаббатда манфаат бўлмайди. Агар манфаат бор бўлса, у муҳаббат бўлмайди. Бу менинг шахсий фикрим. Маъқуллашга мажбур эмассиз. "Дипломли малика" излаётганлар, сиздан илтимос, бировнинг тақдири билан ўйнашманг. Чунки  келажак бировнинг ҳисобига  режалаштирилмайди. Гендер тенглик бу – эркак ва аёл олдидаги тенг имкониятлар дегани. Ўзаро тенг ҳуқуқлилик дегани. Оилада эр-хотиннинг ўз ваколатлари ва вазифалари бор. Энг муҳими, ваколатлар алмашиб қолмаса бўлди...

 Юқоридаги гаплар ҳамма йигитларга тегишли эмас, гап эгасини топади.

Яширингул.