Shahzodalar ertakda boʻladi...(mi?)

Muhabbat haqida koʻp yozasan, deyishadi menga. Oʻylab qarasam, haqiqatan shunday ekan. Bunday boʻlishi tabiiy. Axir inson – muhabbat mevasi.  Muhabbatsiz bir kuningizni tasavvur qilib koʻring...  Sizga har kuni:

– Oʻzingni ehtiyot qilgin, onasi, – deya "tanbeh" beradigan turmush oʻrtogʻingizni, faraz qiling, yoʻqotib qoʻydingiz. Aytaylik, qayergadir safarga ketdi. Sizga har kuni:

– Dadasi, qayerdasiz? Nima qilyapsiz? Ishdan kelishingizga nima ovqat qilib qoʻyay? – deya savollarga koʻmib tashlaydigan ayolingiz, sizdan bir kuni umuman xabar olmadi. Qoʻngʻiroqlaringizga ham javob bermadi. Jim-jit...

Menimcha, yaxshi koʻrgan insoningni yoʻqotishni tasavvur qilishning oʻzi bir qoʻrqinchli... Shoirona qilib aytadigan boʻlsam, muhabbat bu – dunyoning ustuni! Ammo ana shu ustunni barpo etish, kimningdir koʻnglidan joy olish, kimdir sening koʻnglingdan joy olishi va muhabbatning yaralishi qiziq-da.

Yaqinda menga bir notanish raqamdan qoʻngʻiroq boʻldi. Qoʻngʻiroqqa javob bermadim.  Telefon qoʻngʻiroqlari tinmadi. Nihoyatda bezor boʻlganimdan soʻng, goʻshakni koʻtardim. Notanish yigit mendan hol-ahvol soʻrab boʻlgach, maqsadga koʻchdi. Agar rozi boʻlsam, men bilan oila qurmoqchiligini aytdi. Oraga bir lahza jimlik choʻkdi. Va mening unga:

– Qanday qizni orzu qilasiz? – degan savolim oradagi jimlikni buzdi.  Yigit javob berdi:

– Oʻqigan. Uyim-joyim deydigan. Onam koʻp aytadi, oʻqigan, qoʻlida diplomi bor qizga uylansang, seni xor qilmaydi...

Uning oxirgi gaplarini eshitmasdan, telefonni qoʻyib qoʻydim. Zero, mening koʻnglimda va jamiki qizlarning qalbida bunday orsiz, tepsa-tebranmas "shahzoda"larga oʻrin yoʻq!

Yigitning soʻnggi soʻzlarini eshitib, bir kulging keladi, bir yigʻlaging. Oʻylab qoldim, kelajakdagi roʻzgʻorini xotinining boʻyniga moʻljallab, "diplomli malika" axtarib yurgan oriyatsiz yigitlar ham bor ekan-da. Savol tugʻiladi: kelajakni boʻlgʻusi kelin bolaga ishonib yurgan bu yigitning buguni qanday kechayotgan ekan?!  Xullas, shu tariqa "oq otli shahzoda"lar haqidagi xayollarim loyqalanib ketdi. Nazarimda, shahzodalar faqat ertakda boʻladiganday tuyuldi.

Ha, qizlarning qalbida oʻzi yaratib olgan "oq otli shahzoda"si borki, u barcha nuqsonlardan yiroq, mukammal shaxs. Unda hech qanday kamchilik yoʻq. U qizning talablariga toʻliq javob beradi. U mehribon. U hech kimga oʻxshamaydi... Mana uning xayoliy portreti. Boyagi yigitga oʻxshaganlar esa... Ularga soʻz uvol. Ularga umr uvol. Chunki haqiqiy muhabbatda manfaat boʻlmaydi. Agar manfaat bor boʻlsa, u muhabbat boʻlmaydi. Bu mening shaxsiy fikrim. Maʼqullashga majbur emassiz. "Diplomli malika" izlayotganlar, sizdan iltimos, birovning taqdiri bilan oʻynashmang. Chunki  kelajak birovning hisobiga  rejalashtirilmaydi. Gender tenglik bu – erkak va ayol oldidagi teng imkoniyatlar degani. Oʻzaro teng huquqlilik degani. Oilada er-xotinning oʻz vakolatlari va vazifalari bor. Eng muhimi, vakolatlar almashib qolmasa boʻldi...

 Yuqoridagi gaplar hamma yigitlarga tegishli emas, gap egasini topadi.

Yashiringul.