Қош қора бўлса ҳам, манглай қора бўлмасин!
Турмушга чиқишдан олдин менга ёмон қайнсингил учраши ҳақида хаёл ҳам қилмаган эканман. Чунки бу дунёнинг қайтар дунё эканлигини ҳар қадамда англаб, ўз янгаларимга нисбатан ҳамиша ҳурматни, одоб-у андишани сақлаб муомала қилганман. Ҳа, адашмаяпсиз, бу – мақтаниш! Баъзида инсон ўзидаги яхши фазилатлари билан мақтаниб, буни эшитган кимдир ўзига ибрат олса, мақтаниш ҳам хайрли бўлади. Инсоннинг эрта бир кун борди-келди қилиб, яхши ва ёмон кунларида ёнида турадиган яқинлари ҳам, албатта, қайнсингил, қайнопа, овсин ва янгаларимиздир.
Ёмон қайнсингил ҳақида хаёл ҳам қилмаганман, шукурки, ўз синглимдай яқин, сирдош, янгасини ўз опасидай қабул қилган сингил учради! Мен унга "қайни" сўзини қўшмасдан сингил деб мурожаат қиляпман. Сабаби ҳар доим синглим бўлишини орзу қилганман. Демоқчиманки, ҳамма нарса ниятга боғлиқ экан, дунёда. Сен хаёлингдан ўтказган қисқагина фикр ҳам реал ҳаётда, албатта, содир бўлади.
Ҳаётий мисол.
Талабалик йилларимиз гуруҳдошларимиз билан кўп мавзуларда тез-тез баҳслашардик. Ҳаётий мавзуларни ўртага ташлаб, ўша мавзуни муҳокама қилар эдик. Эркин фикр билдириш эса журналистика факультети талабалари учун дунёқарашни кенгайтирувчи восита бўлиб хизмат қиларди назаримизда.
Шундай баҳсларнинг бирида курсдош қиз бир фикр айтди: "Агарда мен келажакда турмушга чиқсам, эрим бошқа бир аёлни танлаб, унга уйланмоқчи бўлса, мен унга ўзим совчи бўлиб бораман, кундош масаласини табиий қабул қиламан", деди. Биз унинг бу гапидан ниҳоятда ажабландик. Бу гапни бошқа айтмаслигини, айтган гапларини қайтариб олишини сўраб, дашном бердик. У эса ўз фикрида содиқ қолди. Бу орада у оила қурди, фарзандли бўлди, бир меҳрибон ва мард йигит унга умр йўлдош бўлди. Ўша курсдошимнинг instagramдаги саҳифаларини, унга жойлаётган расмларини-ю, видеоларини кўриб, у дунёдаги энг бахтли аёлдан бирига айланган, деб ўйлар эдим. Аммо кейинчалик билсам, у эри билан ажрашганига бир йилдан ошибди. Эри оиласидан воз кечиб, ўзидан ёши анча катта хотин билан қўшни давлатга кетиб, ўша жойда яшаётган экан. Биз томонларга эса фақатгина фарзандидан хабар олиш учунгина келади, дея нола қилади курсдош қиз... Ниятинг – йўлдошинг, дегани шу бўлса керак.
Ҳаётий яна бир мисол. Қўшнимиз бўлар эди, уйига маҳалланинг болалари бирга ўйнаш учун ўғлини сўраб боришса, ўғлининг исмини айтиб, фалончи ўлди, дея остонада турган болаларни ҳайдаб соларди. Орадан вақт ўтди-ю, ўғил йигирмага чиқар-чиқмас оламдан ўтди...
Балки буларнинг ниятга, билиб-билмай оғиздан чиққан гапларга алоқаси йўқдир. Балки бу тақдирдир, бироқ яхши ният ва гўзал сўз ёмон тақдирни яхши томонга ўзгартира олишига ишонгимиз келади. Қайсидир маънода ишонамиз ҳам.
"Манглайи қора", дея танбеҳ беради боласига айрим оналар. Нақадар жирканч сўз! "Хароб бўлгур", дея дилингни қон қилади яна бир бефаросат келин ҳали беш ёшга ҳам тўлмаган норасидага. Ачиниб кетасан, хўш, шу ниятинг амалга ошиб, боланг ҳақиқатан манглайи қора бўлса, нима қиласан?! Фарзандинг кўз ўнгингда хароб бўлса, унинг азиятини фақат ва фақат ўзинг чекасан, шундай эмасми?! Ёки билиб-билмай айтилган қарғиш ҳам ижобат бўлиб қолишидан чўчимайдими улар?
Ҳа, азизлар, ҳаётингиз мобайнида ниятларингиз ўзингизга ҳамроҳ бўлади. Фикрларингиз сизни бошқаради. Онгимиздаги ўй-хаёлларни коинотга сигнал сифатида юборамиз-у, у ўзимизга яхши ва ёмон вазиятлар, тақдирлар кўринишида қайтади. Бу менинг гапим эмас, мутахассисларнинг неча йиллик изланишлари давомида исботланган ҳақиқат. Шундай экан, ҳамиша ўзингизга эзгу фикр, эзгу сўз, эзгу амални эп кўринг, зеро, ниятлар биз билан ҳамиша ҳамқадам. Оналаримизнинг, айниқса, ёш оналарнинг қулоғига бир гапим бор: билиб-билмай болангизнинг манглайини қора қилиб қўйманг...
Яширингул
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
