БИР КЕЛИБ-КЕТИНГ, ҚИШЛОҒИМИЗГА
З.М.Бобур номли овул, “Обод қишлоқ” дастури доирасидаги қурилиш-таъмирлаш ва ободонлаштириш тадбирларидан сўнг, янада кўркам ва обод гўшага айланиб бормоқда. Қишлоққа элтувчи йўлнинг икки ёқасидаги ям-яшил арчалар кундан-кунга бўй чўзиб, қишлоқ чиройига-чирой қўшмоқда.
Ҳудуддаги барча кўчаларга шағал-тош тўшалиб, асфальт ётқизилмоқда. Тунги чироқлар ўрнатилган кўчаларимиз чароғонлигини кўриб, кўнглимиз янада ёришади. Овул фуқаролар йиғини раисаси Гулбаҳор Раимова ташаббуси ҳамда ишларни тўғри ташкил этгани боис, Бобур номли қишлоғимизда аҳоли муаммолари босқичма-босқич ижобий ҳал этилмоқда. Қишлоқ ҳудудида фаолият олиб борувчи ҳоким ёрдамчиси Алишер Ялғашев, хотин-қизлар фаоли Сабоҳат Ражабовалар уйма-уй кириб бориб, ёшлар ва аёл-қизлар ҳаётига доир муаммоларни жойларига чиқиб ўрганиш орқали ҳал қилишмоқда. Ёшлар етакчиси Асилбек Реимов ҳоким ёрдамчиси Алишер Ялғашев билан ҳамкорликда ёшлар муаммоларини тизимли асосда ўрганиб, уларнинг иш билан бандлигини таъминлашларига яқиндан ёрдам бериб келмоқда. У иқтидорли қиз Умида Ибрагимова “Беш ташаббус олимпиадаси” мусобақаларида туманда 1-ўринни, Республикада 2-ўринни эгаллашида барча зарур шароитларни яратиб берди ва ушбу муваффақияти билан “STREET WORKOUT” спорт майдончасини ютиб олди.
Тўйларимиз ҳамда бошқа оилавий тадбирлар тинч, файзли ўтишида профилактика инспектори Ҳамид Нурекеев ҳамда ёрдамчиси, инспектор Бахтиёр Ражабовларнинг ҳиссалари катта.
Қишлоғимизга кираверишда, катта йўл ёқасида жойлашган, Гулрухсора Нафасованинг кундалик эҳтиёж моллар дўкони очилишида ҳам Бобур ОФЙ масъулларининг хизматлари катта. Аҳоли эндиликда кундалик харажат учун туман марказига қатнамайдиган бўлишди. Бундан ташқари, қишлоғимизда минерал ўғитлар қишлоқ хўжалик моллари, озиқ-овқат, кийим-кечак дўконлари ҳам фаолият юритаётгани, икки қаватли тўйхона ҳамда супермаркет қурилаётганидан аҳоли мамнун. Телерадио устаси Ойбек Аллаберганов, сартарошлар Аъзам Холимбетов, Шаҳзод Қурбонбоев, этикдўз уста Хуршид Ражабов, дорихона мудири Отабек Чоршамовлар ҳам эл-юрт хизматига камарбаста. Нодирбек Қодиров, Бахтиёр Хидировлар томонидан ҳар куни хонадонларга тоза ичимлик суви беминнат етказиб берилмоқда. Ёш тадбиркор, чевар қизларимиз Наргиза Ғўчбоева, Мардона Адҳамовалар хизматидан, “Баҳром — Лолагул” МЧЖ пазанда нонвойлари ёпаётган иссиқ нон, патирлар лаззатидан халқимиз миннатдор. Зулхумор Бекатова, Нилуфар Ражабова, Шарофат Сафарбоева каби тадбиркор аёл-қизлар меҳнати туфайли элимиз дастурхонидан ёғли патир ва иссиқ нон аримайди.
Неъмат Бобожонов, Турғун Қулимбетовлар ясаган уй ва ошхона мебель жиҳозлари эса ҳамиша харидоргир. Бу мебеллар қўшни маҳаллалар хонадонларига ҳам кўрк бағишлаб турибди.
Янгидан қурилиб, ишга туширилган “Жасурбек” кафеси, кафе яқинидаги гўшт дўкони хизмати ҳам барчага манзур.
Қишлоғимизда амалга оширилаётган барча эзгу ишларда “маҳалла еттилиги”нинг хизматлари катта. Уларнинг ҳамкорликдаги, эл-юрт манфаати йўлидаги фидойиликлари туфайли З.М.Бобур номли қишлоғимиз тумандаги иқтисоди равнақ топаётган обод гўшага айланиб бормоқда. Қишлоғимизга бир бора келиб-кетсангиз, бу ўзгаришларнинг яққол гувоҳи бўласиз.
Гулора ДЎСЧАНОВА, З.М.Бобур номли овул, пенсионер.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
