Очиқ сув ҳавзаларида чўмилиш инсон ҳаёти учун хавфли эканлиги кўргазмали семинар ва махсус тактик ўқув машқларда кўрсатиб берилди

Қорақалпоғистон Республикаси Вазирлар Кенгаши Раиси − Фуқаро муҳофазаси бошлиғининг 2022 йил 17 май кунги “Чўмилиш мавсумида аҳолининг сувда чўкиши билан боғлиқ бахтсиз ҳодисаларнинг олдини олиш бўйича комплекс чора-тадбирлар тўғрисида”ги буйруғининг ижросини таъминлаш мақсадида Амударё тумани Қипчоқ овул фуқаролар йиғини ҳудудидан оқиб ўтувчи Амударё дарёси бўйида кўргазмали семинар ва амалий махсус тактик ўқув машқи ўтказилди.

Ушбу амалий тактик ўқув машқига туман ҳудудидаги маҳалла раислари, мактаб директорлари ҳамда корхона ва ташкилот раҳбарлари жалб қилиниб, сувда чўкиш билан боғлиқ бахтсиз ҳодисаларнинг олдини олиш ва оқибатларини бартараф этиш бўйича билим ва кўникмаларга эга бўлишди.

Cеминарни Қорақалпоғистон Республикаси Фавқулодда вазиятлар бошқармаси бўлим бошлиғи, подполковник Радмир Чимбергенов олиб борди ҳамда семинар қатнашчиларига мамлакатимизда сувга чўкиш билан боғлиқ аниқланган ноҳуш ҳолатлар юзасидан маълумот бериб ўтди.

Семинарда ёзнинг иссиқ кунлари бошланиши билан инсонларда сувга чўмилишга эҳтиёж кескин ошиши, айрим вақтларда ота-оналарнинг эътиборсизлиги натижасида ёшларнинг тақиқланган сув ҳавзаларига чўмилишлари оқибатида сувга чўкиш билан боғлиқ бахтсиз ҳодисаларнинг содир бўлиши кузатилаётгани таъкидланди.

Шунингдек, нафақат ёш болалар, балки ёши катта инсонларнинг дарё, каналларда чўмилишлари натижасида сувга чўкиш ҳолатларининг ҳам учраётгани айтилди. 

Бундан ташқари, ҳар йили юртимизда фуқароларнинг белгиланмаган жойларда спиртли ичимликлар истеъмол қилган ҳолатларда чўмилишлари ва бошқа сабабларга кўра юзлаб инсонлар нобуд бўлаётганлиги ачинарли ҳолат эканлигини ва ҳар бир инсон ўз ҳаёти учун аввало, ўзи жавобгар эканлигини таъкидлади.

Махсус тактик ўқув машқининг амалий қисмида фуқароларнинг сувда чўкиши, қутқарилиши яъни сувда чўкаётган инсонни рўпарасидан эмас, аксинча орқа томонидан бориб унга ёрдам бериш кераклиги ҳамда биринчи тиббий ёрдам кўрсатилиши амалда кўрсатиб берилди.

 Ушбу амалий ўқув машқига жами 12 та техника ва 144 нафар фуқаро қатнашиб “Чекланган тайёр” деб баҳоландилар. Махсус тактик ўқув машқи якунида иштирокчиларнинг йўл қўйган хато ва камчиликлари кўрсатиб ўтилди. Шунингдек, келгусида бундай камчиликларга йўл қўймаслик учун нималар қилиш лозимлиги батафсил тушунтирилиб фикр-мулоҳазалар алмашилди.

Семинар якунида қатнашчилар ўзларини қизиқтирган саволлар билан мурожаат қилиб батафсил маълумот олдилар.

Туман ҳокимлигининг Ахборот хизмати.