Ochiq suv havzalarida choʻmilish inson hayoti uchun xavfli ekanligi koʻrgazmali seminar va maxsus taktik oʻquv mashqlarda koʻrsatib berildi

Qoraqalpogʻiston Respublikasi Vazirlar Kengashi Raisi − Fuqaro muhofazasi boshligʻining 2022-yil 17-may kungi “Choʻmilish mavsumida aholining suvda choʻkishi bilan bogʻliq baxtsiz hodisalarning oldini olish boʻyicha kompleks chora-tadbirlar toʻgʻrisida”gi buyrugʻining ijrosini taʼminlash maqsadida Amudaryo tumani Qipchoq ovul fuqarolar yigʻini hududidan oqib oʻtuvchi Amudaryo daryosi boʻyida koʻrgazmali seminar va amaliy maxsus taktik oʻquv mashqi oʻtkazildi.

Ushbu amaliy taktik oʻquv mashqiga tuman hududidagi mahalla raislari, maktab direktorlari hamda korxona va tashkilot rahbarlari jalb qilinib, suvda choʻkish bilan bogʻliq baxtsiz hodisalarning oldini olish va oqibatlarini bartaraf etish boʻyicha bilim va koʻnikmalarga ega boʻlishdi.

Ceminarni Qoraqalpogʻiston Respublikasi Favqulodda vaziyatlar boshqarmasi boʻlim boshligʻi, podpolkovnik Radmir Chimbergenov olib bordi hamda seminar qatnashchilariga mamlakatimizda suvga choʻkish bilan bogʻliq aniqlangan nohush holatlar yuzasidan maʼlumot berib oʻtdi.

Seminarda yozning issiq kunlari boshlanishi bilan insonlarda suvga choʻmilishga ehtiyoj keskin oshishi, ayrim vaqtlarda ota-onalarning eʼtiborsizligi natijasida yoshlarning taqiqlangan suv havzalariga choʻmilishlari oqibatida suvga choʻkish bilan bogʻliq baxtsiz hodisalarning sodir boʻlishi kuzatilayotgani taʼkidlandi.

Shuningdek, nafaqat yosh bolalar, balki yoshi katta insonlarning daryo, kanallarda choʻmilishlari natijasida suvga choʻkish holatlarining ham uchrayotgani aytildi. 

Bundan tashqari, har yili yurtimizda fuqarolarning belgilanmagan joylarda spirtli ichimliklar isteʼmol qilgan holatlarda choʻmilishlari va boshqa sabablarga koʻra yuzlab insonlar nobud boʻlayotganligi achinarli holat ekanligini va har bir inson oʻz hayoti uchun avvalo, oʻzi javobgar ekanligini taʼkidladi.

Maxsus taktik oʻquv mashqining amaliy qismida fuqarolarning suvda choʻkishi, qutqarilishi yaʼni suvda choʻkayotgan insonni roʻparasidan emas, aksincha orqa tomonidan borib unga yordam berish kerakligi hamda birinchi tibbiy yordam koʻrsatilishi amalda koʻrsatib berildi.

 Ushbu amaliy oʻquv mashqiga jami 12 ta texnika va 144 nafar fuqaro qatnashib “Cheklangan tayyor” deb baholandilar. Maxsus taktik oʻquv mashqi yakunida ishtirokchilarning yoʻl qoʻygan xato va kamchiliklari koʻrsatib oʻtildi. Shuningdek, kelgusida bunday kamchiliklarga yoʻl qoʻymaslik uchun nimalar qilish lozimligi batafsil tushuntirilib fikr-mulohazalar almashildi.

Seminar yakunida qatnashchilar oʻzlarini qiziqtirgan savollar bilan murojaat qilib batafsil maʼlumot oldilar.

Tuman hokimligining Axborot xizmati.