УЛКАН FАЛАБАГА МУНОСИБ ҲИССА

Ҳар йили пахта йиғим-теримига сафарбарлик бошланганида "Амударёга”, деганхитобдан талаба ёшлар севиниб кетишади. Улар олийгоҳимизда ўқиш жараёнида пахта-йиғим теримида амударёлик деҳқонларга ҳашарга келиб, уларнинг ўз фарзандларидай кутиб олишларидан, уйининг тўридан жой бериб, ғамхўрлик қилишидан кўнгиллари шу эл одамлари билан боғланиб кетган.

Халқимизда асрлар оша яшаб келаётган шундай анъана бор: қийин-қистовли кунда бир-бировга ёрдам беради, ташвишларига елкадош бўлади. Уни оддийгина қилиб ҳашар, деб атаймиз.

Бутун мамлакатимизда деҳқонларимизнинг йил - ўн икки ой даладаги заҳматли меҳнатларининг самараси - етиштирилган мўл пахта ҳосили йиғим-терими тобора авж олаётган шу кунларда умрбоқий анъанамиз юрагида Ватан меҳри, билагида кучи бор барчани пахтазорларга чорламоқда. Боиси, пахта деҳқоннинг меҳнати маҳсули бўлса-да, уни барвақт йиғиб-териб олиб, юқори навларга сотишдан барчамиз манфаатдормиз. Негаки, пахта мамлакатимизнинг асосий қишлоқ хўжалик экини, миллий бойлиги.

Бизнинг Нукус Давлат педагогика институтимиз талаба ёшлари ҳам ҳар йили амударёлик пахтакорларга йиғим-теримда кўмакчи бўладилар.

Олийгоҳимизда таҳсил олаётган 5200 нафар талабалардан 3800 нафари Амударё туманида, 800 нафари эса Шўманай туманида пахта теримида қатнашмоқдалар. Туманда 162 та отряд таркибида пахтакорлар билан ёнма-ён эр-тадан кечгача ҳосил тераётган талабаларимизнинг ғайрат-шижоати таҳсинга лойиқ бўлаётир. Улар кунига ўртача 70-75 килограммдан пахта теришиб, шу кунгача уйган хирмони 3400 тоннадан ошиб кетди.

Айниқса, педагогика, бошланғич таълим, табиатшунослик факультетлари талабалари мавсумда бошқа факультетлар талабаларига намуна бўлишмоқда.

Мана 15 йилдирки институтимиз ёшларининг Амударё туманида худди ўзларининг оиласидагидек илиқ, меҳрли масканларда яшаётганлиги, меҳнатлари муносиб рағбатлантирилиб борилаётганлиги уларга янада куч-ғайрат бағишламоқда.

Шу ойнинг 27-санасида "Оқ олтин" овулидаги "Олламберган Ҳожи бобо" фермер хўжалигида ҳар бир факультетнинг энг илғор теримчиларидан иборат 30 нафар талабалар орасида мусобақа ташкил қилинди.

Йиғим-теримнинг боришини туман раҳбарияти вакиллари, фермер хўжалиги раиси, отряд раҳбари - ҳаммамиз ҳаяжон билан кузатдик. Ҳамманинг кўнглида шу савол: ким ғолиб бўларкан, қанча тераркан?

Далада бири-биридан қолишмасликка интилиб пахта тераётган йигит-қизларни кузатиб, уларнинг шижоатига қойил қолади одам. Ниҳоят, кечқурун барчанинг меҳнати маҳсули тарозига тортилганида, педагогика факультети 2-курс талабаси Бибимарям Жиямуродова 320 кг. пахта териб, мусобақа ғолиби бўлди.

Шу куни 30 нафар талаба томонидан 6659 кг. пахта терилиб, ҳар бир талабага ўртача 222 кг.дан тўғри келди.

28 сентябрь куни энг илғор 8 нафар талабалар орасидаги беллашувда эса бошланғич таълим факультети талабаси Қамарой Ҳабибуллаева 377 кг. пахта териб, пешқадам бўлди.

Мусобақада қатнашганларнинг барчаси туман ҳокимлиги, туман прокуратураси ва ички ишлар бўлими томонидан юксак баҳоланди ҳамда қимматбаҳо совғалар билан тақдирланди.

Бундай эътибор, рағбатдан руҳланган талабаларимиз бугун янада ўзгача куч-ғайрат билан ишга киришдилар.

Хўжаликнинг мусобақа ўтказилган 1,8 гектарлик даласида биринчи теримнинг ўзидаёқ 37 центнердан ҳосил етиштирган деҳқонларига, уларга раҳбарлик қилаётган фидойи инсонларга чин қалбимдан таъзим қиламан.

Пахта терими! Эҳтимол бу пахта даласига кириб кўрмаган одам учун оғир ишдай туюлар? Бироқ ҳаёт йўли, кўнгли мамлакатимизнинг асосий даромад манбаи бўлган пахтачилик билан боғланган одам учун жуда мароқли, завқли жараён. Чунки териб олаётган оппоқ пахтангнинг ҳар мисқоли юртимиз қудратига қудрат қўшиши кўнглингни қувончга тўлдиради. Ва шу баробарида чаноқлардан тошиб чиқиб турган оқ момиқ деҳқонларимизнинг йил бошидан бери далада қишнинг изғиринида, ёзнинг жазирама офтоби тиғида қийинчиликларни писанд этмай, қилган меҳнатлари маҳсули эканлигини ҳис этганинг сайин ҳосилини тезроқ, кўпроқ тергинг келаверади.

"Ҳайт, деган туяга мадор”, дейишади. Ҳа, бутун эл оғзибирчиликда эзгу ниятлар сари бирлашиб интилса, албатта самараси қувонарли бўлади. Бизнинг олийгоҳимиз талабалари ҳам пахтакорлар, турли касб эгалари, уюшмаган аҳолидан тузилган гуруҳлар билан ёнма-ён туриб, амударёликларнинг юксак пахта хирмони бунёд этилишига муносиб ҳиссаларини қўшдилар. Шунинг учун ҳам бутун туманда ҳамма пахтачиликда эришилган улкан ютуқ хабаридан шодумон бўлаётган ушбу дамларда талаба ёшларимизнинг, биз ўқитувчиларнинг ҳам қувончимиз чексиз.

Энг муҳими, далаларда ҳали ҳам ҳосил оппоқ бўлиб чамандай очилиб турибди. Ҳатто ҳосили энди илк бор терилаётган далалар ҳам бор. Биз куннинг илиқ кунларидан фойдаланиб, қолган ҳосилни йиғиштириб олишга ҳам ўзларимизнинг муносиб ҳиссамизни қўшамиз.

Фурсатдан фойдаланиб, юксак "оқ олтин" хирмонини бунёд этган бутун Амударёнинг оқ кўнгил инсонларини, туман раҳбариятини, барча қишлоқ хўжалиги соҳаси ходимларини эришилган улкан ғалаба билан табриклайман! Хирмонлар янада юксалаверсин!

Туманда пахта топшириш йиллик режасининг адо этилиши қувончи ҳукмрон бўлаётган шу лаҳзаларда барча ўқитувчилар ва мураббийларни 1 октябрь - касб байралари билан ҳам қутлайман. Ёш авлодга таълим-тарбия бериш, касб-ҳунар ўргатишдек эзгу ишларига муваффақиятлар тилайман.

Қувондиқ ҚОДИРОВ,

Ажиниёз номидаги НДПИ проректори.